Mangala Jyothi

Diocesan Biblical, Catechetical and Liturgical Center
Diocese of Mangalore

Mangala Jyothi

Diocesan Biblical, Catechetical and Liturgical Center
Diocese of Mangalore
Home Departments Prayers News Photo Gallery Results Magazines Sunday Reading Contact

Select a date

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ - ಪಯ್ಲೆಂ ವಾಚಪ್

ಉತ್ಪತ್ತಿ 2:7-9; 3:1-7 ತೆದ್ನಾ ಸರ್ವೆಸ್ಪರಾ ದೆವಾನ್ ಧರ್ಣಿಚೆ ಮಾತಿಯೆಚೊ ಮನ್ಶಾಕ್ ಕೆಲೊ ಆನಿ ತಾಚ್ಯಾ ನಾಕಾಚ್ಯಾ ಪುಡಾಂನಿ ಜಿವಾಚೊ ಸ್ವಾಸ್ ಫುಂಕ್ಲೊ ಆನಿ ಮನಿಸ್ ಏಕ್ ಜಿವೊ ಪ್ರಾಣಿ ಜಾಲೊ. ಸರ್ವೆಸ್ಪರಾ ದೆವಾನ್ ಉದೆಂತಿಕ್ ಆಸ್ಲಲ್ಯಾ ಏದೆನಾಂತ್ ಏಕ್ ಬಾಗ್ ಕೆಲಿ ಆನಿ ಆಪ್ಣೆಂ ರಚ್ಲ್ಲ್ಯಾ ಮನ್ಶಾಕ್ ತಾಂತುಂ ದವರ್ಲೊ. ಸರ್ವೆಸ್ಪರಾ ದೆವಾನ್ ತೆ ಬಾಗೆಂತ್ ಸರ್ವ್ ಜಿನ್ಸಾಂಚೆ ರೂಕ್ ವಾಡೊಂಕ್ ಸೊಡ್ಲೆ. ಪಳೆಂವ್ಕ್ ತೆ ಸೊಭಿತ್ ಆಸ್ಲೆ ಆನಿ ತಾಂಚಿಂ ಫಳಾಂ ರುಚಿಕ್ ಆಸ್ಲಿಂ. ಬಾಗೆಚ್ಯಾ ಮಧೆಕತ್ ಜಿವಿತಾಚೊ ರೂಕ್ ಆಸ್ಲೊ ಆನಿ ಬರ್ಯಾ ವಾಯ್ಟಾಚೆ ಸಮ್ಜಣೆಚೊ ರೂಕ್ಯೀ ಆಸ್ಲೊ. ಸರ್ವೆಸ್ಪರಾ ದೆವಾನ್ ರಚ್ಲ್ಲ್ಯಾ ಸರ್ವ್ ಮೊನ್ಜಾತಿಂ ಪಯ್ಕಿ ಸೊರಪ್ ಭೋವ್ ಹುಶಾರ್. ತಾಣೆಂ ಸ್ತ್ರಿಯೆಕ್ ವಿಚಾರ್ಲೆಂ: “ಬಾಗೆಂತ್ಲ್ಯಾ ಖಂಯ್ಚ್ಯಾಯ್ ರುಕಾಚೆಂ ಫಳ್ ತುಮಿ ಖಾಂವ್ಕ್ ನಜೊ ಮ್ಹಣ್ ದೆವಾನ್ ತುಮ್ಕಾಂ ಖರೆಂಚ್ ಸಾಂಗ್ಲಾಂ?” ಸ್ತ್ರಿಯೆನ್ ಸೊರ್ಪಾಕ್ ಜಾಪ್ ದಿಲಿ: “ಬಾಗೆಚ್ಯಾ ರುಕಾಂಚಿಂ ಪಳಾಂ ಆಮಿ ಖಾವ್ಯೆತ್; ಪೂಣ್ ಬಾಗೆಚ್ಯಾ ಮಧೆಕತ್ ಆಸಾ ತ್ಯಾ ರುಕಾಚ್ಯಾ ಫಳಾಂ ವಿಶಿಂ ದೆವಾನ್ ಆಮ್ಕಾಂ ಸಾಂಗ್ಲಾಂ: ‘ತಿಂ ತುಮಿ ಖಾಂವ್ಕ್ ನಜೊ, ಮಾತ್ರ್ ನ್ಹಯ್ ತಿಂ ಆಪ್ಡುಂಕ್ ಲೆಗುನ್ ನಜೊ; ತಶೆಂ ಕೆಲ್ಯಾರ್ ತುಮಿ ಮರ್ತಲ್ಯಾತ್.’ ” ತೆದ್ನಾ ಸೊರ್ಪಾನ್ ಸ್ತ್ರಿಯೆಕ್ ಮ್ಹಳೆಂ: “ನಾ, ತುಮಿ ಮರ್ಚಿಂ ನಾಂತ್. ದೇವ್ ಹೆಂ ಜಾಣಾ; ಜೆದ್ನಾ ತುಮಿ ತೆಂ ಖಾತಾತ್, ತೆದ್ನಾ ತುಮ್ಚೆ ದೊಳೆ ಉಗ್ತೆ ಜಾತಲೆ. ದೆವಾ ಸಾರ್ಕಿಂ ತುಮಿ ಜಾತಲ್ಯಾತ್ ಆನಿ ಬರೆಂ ಆನಿ ವಾಯ್ಟ್ ತುಮಿ ಸಮ್ಜತಲ್ಯಾತ್.” ಸ್ತ್ರಿಯೆಕ್ ತ್ಯಾ ರುಕಾಚಿಂ ಫಳಾಂ ಖಾಂವ್ಕ್ ರುಚಿಕ್ ಮ್ಹಣ್ ದಿಸ್ಲಿಂ ಆನಿ ತೊ ರೂಕ್ ಪಳೆಂವ್ಕ್ ಸೊಭಿತ್ ಆನಿ ಜಾಣ್ವಾಯ್ ಜೊಡುನ್ ಘೆಂವ್ಚೆ ಖಾತಿರ್ ಆಶೆಂವ್ಕ್ ಯೋಗ್ಯ್ ಜಾಲ್ಲೊ ಮ್ಹಣ್ ಭೊಗ್ಲೆಂ. ದೆಕುನ್ ತಾಚೆಂ ಏಕ್ ಫಳ್ ತಿಣೆಂ ಕಾಡ್ಲೆಂ ಆನಿ ಖೆಲೆಂ. ಉಪ್ರಾಂತ್ ಆಪ್ಲ್ಯಾ ಪತಿಕ್ಯೀ ತಿಣೆಂ ತೆಂ ದಿಲೆಂ ಆನಿ ತಾಣೆಂಯ್ ತೆಂ ಖೆಲೆಂ. ತೆದ್ನಾ ತಾಂಚೆ ದೊಗಾಂಯ್ಚೆ ದೊಳೆ ಉಗ್ತೆ ಜಾಲೆ ಆನಿ ಆಪುಣ್ ವಿಣ್ಗಿಂ ಆಸಾತ್ ಮ್ಹಣ್ ತಾಂಕಾಂ ಸಮ್ಜಲೆಂ. ದೆಕುನ್ ತಾಂಣಿಂ ಆಂಜುರಾಚ್ಯಾ ರುಕಾಚಿಂ ಪಾನಾಂ ಗುಂತುನ್ ತಿಂ ಆಪ್ಲ್ಯಾ ಪೆಂಕ್ಟಾಕ್ ಬಾಂದ್ಲಿಂ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ – ಕೀರ್ತನ್

ಕೀರ್ತನ್ : 50 ಶ್ಲೋಕ್ : ಆಮಿ ಪಾತ್ಕಿ, ಸೊಮಿಯಾ, ತುಜಿ ಕಾಕುಳ್ತ್ ಮಾಗ್ತಾಂವ್. 1. ಕಾಕುಳ್ದಾರಾ ದೆವಾ, ಮ್ಹಜಿ ಕಾಕುಳ್ತ್ ಕರ್, ಭೋವ್ ಕಣ್ವಾಳ್ಯಾ ದೆವಾ, ಮ್ಹಜೆ ಗುನ್ಯಾಂವ್ ಪುಸುನ್ ಕಾಡ್. ಧು ತುಂ ಮ್ಹಾಕಾ ಮ್ಹಜ್ಯಾ ಅಪ್ರಾಧಾಚ್ಯಾ ಖತಾಂತ್ಲೊ, ನಿತಳ್ ಕರ್ ಮ್ಹಾಕಾ ಮ್ಹಜ್ಯಾ ಪಾತ್ಕಾಚ್ಯಾ ಚಿಕ್ಲಾಂತ್ಲೊ. 2. ಮ್ಹಜೊ ಗುನ್ಯಾಂವ್ ಹಾಂವ್ ಒಳ್ಕುನ್ ಘೆತಾಂ, ಮ್ಹಜೆಂ ಪಾತಕ್ ಸದಾಂಚ್ ಮ್ಹಜ್ಯೆ ಮುಖಾರ್ ದವರ್ತಾಂ. ತುಜೆರ್, ವ್ಹಯ್ ತುಜೆರ್ಚ್ ಹಾಂವ್ ಚುಕ್ಲಾಂ, ಆನಿ ತುಜ್ಯೆ ಮುಖಾರ್ ವಾಯ್ಟ್ ಜಾವ್ನಾಸ್ಲಲೆಂ ಹಾಂವೆಂ ಕೆಲಾಂ. 3. ಏಕ್ ನಿತಳ್ ಕಾಳಿಜ್ ಮ್ಹಾಕಾ ರಚುನ್ ದಿ, ದೆವಾ; ಆನಿ ನವ್ಯಾನ್ ಏಕ್ ದೃಢ್ ಮನ್ ಮ್ಹಜ್ಯೆ ಥಂಯ್ ಆಸಾ ಕರ್. ತುಜ್ಯಾ ದೊಳ್ಯಾಂ ಮುಖಾ ವಯ್ಲೊ ಮ್ಹಾಕಾ ಪಯ್ಸ್ ಉಡಯ್ನಾಕಾ, ತುಜೊ ಪವಿತ್ರ್ ಅತ್ಮೊ ಮ್ಹಜ್ಯೆ ಥಾವ್ನ್ ಕಾಡ್ನ್ ವ್ಹರಿನಾಕಾ. 4. ತುಜ್ಯೆ ಸೊಡ್ವಣೆಚೊ ಸಂತೊಸ್ ಪತ್ರ್ಯಾನ್ ಹಾಂವೆಂ ಭೊಗಿಸೊ ಕರ್, ಏಕ್ ಉದಾರ್ ಮನ್ ದಿವ್ನ್ ಮ್ಹಾಕಾ ಥಿರ್ ಕರ್. ಸರ್ವೆಸ್ಪರಾ, ಉಘಡ್ ಮ್ಹಜೆ ಓಂಠ್, ಆನಿ ಮ್ಹಜೆಂ ತೊಂಡ್ ತುಜಿ ಕೀರ್ತ್ ನಾಂವಾಡುಂ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ – ದುಸ್ರೆಂ ವಾಚಪ್

ರೊಮಾ. 5:12-19 ಪಳೆಯಾ ತರ್: ಏಕ್ ಮನ್ಶಾ ವರ್ವಿಂ ಸಂಸಾರಾಂತ್ ಪಾತಕ್ ಭಿತರ್ ಸರ್ಲೆಂ ಆನಿ ತ್ಯಾ ಪಾತ್ಕಾ ಬರಾಬರ್ ಮೊರ್ನ್ಯೀ ಆಯ್ಲೆಂ. ಅಶೆಂ ಸರ್ವ್ ಮನ್ಶಾಂನಿ ಪಾತಕ್ ಆಧಾರ್ಲೆಂ ಜಾಲ್ಲ್ಯಾನ್, ಮೊರ್ನ್ ಸಗ್ಳ್ಯಾ ಮನ್ಶಾಕುಳಾಚೆರ್ ವಿಸ್ತಾರ್ಲೆಂ. ನಿಯಮ್ಶಾಸ್ತ್ರ್ ನಾತ್ಲ್ಲೇ ವರ್ವಿಂ ಕಾಯ್ದ್ಯಾ ವಿರೋಧ್ ಪಾತಕ್ ಜಾಲೆಂ ಮ್ಹಣ್ ಅಪ್ರಾಧ್ ಲೆಖುಂಕ್ ಜಾಯ್ನಾತ್ಲೆಂ. ಆದಾಂವ್ಚ್ಯಾ ಕಾಳಾ ಥಾವ್ನ್ ಮೊಯ್ಜೆಚ್ಯಾ ಕಾಳಾ ಪರ್ಯಾನ್ ಮೊರ್ನಾನ್ ಆಪ್ಲಿ ರಾಜ್ವಟ್ಕಿ ಚಲಯ್ಲಿ. ಆದಾಂವ್ಬರಿ ದೆವಾಚೆಂ ಸ್ವಷ್ಟ್ ಫರ್ಮಾಣ್ ಮೋಡ್ನ್ ಪಾತಕ್ ಆಧಾರಿ ನಾತ್ಲಲ್ಯಾಂಚೆರ್ ಸಯ್ತ್ ಮೊರ್ನಾನ್ D¥ÉÆè ಅಧಿಕಾರ್ ಚಲಯ್ಲೊ. ಪುಣ್ ಹೊ ಆದಾಂವ್ ಉಪ್ರಾಂತ್ ಯೆಂವ್ಚೊ ಆಸ್ಲಲ್ಯಾಚೊ ಏಕ್ ರುಪ್ಕಾರ್ ಮ್ಹಣ್ಯೆತ್. ಪುಣ್ ದೆವಾಚ್ಯಾ ಧರ್ಮಾರ್ಥ್ ದೆಣ್ಯಾ ಆನಿ ಆದಾಂವ್ಚ್ಯಾ ಪಾತ್ಕಾ ಮಧೆಂ ಕಸಲಿಚ್ ಸರ್ ನಾ. ಏಕ್ ಮನ್ಶಾಚ್ಯಾ ಪಾತ್ಕಾ ವರ್ವಿಂ ಸಮೆಸ್ತ್ ಮೆಲೆ ವ್ಹಯ್, ಹಾಚ್ಯಾ ಪರಿಣಾಮಾ ಪ್ರಾಸ್, ದೆವಾಚಿಂ ಕುರ್ಪೆದೆಣಿಂ ಆನಿ ತ್ಯಾ ಬರಾಬರ್ ಏಕ್ ಮನ್ಶಾಚೇ, ಮ್ಹಣ್ಜೆ ಜೆಜು ಕ್ರಿಸ್ತಾಚೇ ಕುರ್ಪೆ ಉದೆಶಿಂ ಮನ್ಶಾಕ್ ಮೆಳ್ಳಲಿಂ ದೆಣಿಂ ಅನಿಕ್ಯೀ ಚಡ್ ವರ್ತಿಂ ಮ್ಹಣ್ಯೆತ್. ತಶೆಂಚ್ ದೆವಾಚೆಂ ಧರ್ಮಾರ್ಥ್ ದೆಣೆಂ ತ್ಯಾ ಏಕ್ ಮನ್ಶಾಚ್ಯಾ ಪಾತ್ಕಾಚ್ಯಾ ಪರಿಣಾಮಾಕ್ ಸರಿ ಕರುಂಕ್ ಜಾಯ್ನಾ. ಏಕ್ ಪಾತ್ಕಾ ಉಪ್ರಾಂತ್ ಝಡ್ತೆಚೊ ಪರಿಣಾಮ್ ಜಾವ್ನ್ ‘ಅಪ್ರಾದಿ’ ಮ್ಹಳ್ಳೆಂ ಫೈಸಲ್ ಜಾಲೆಂ. ಪುಣ್ ಸಬಾರ್ ಪಾತ್ಕಾಂ ಉಪ್ರಾಂತ್ ಫುಂಕ್ಯಾಕ್ ದಿಲ್ಲೆಂ ಕುರ್ಪೆ ದೆಣೆಂ ‘ನಿರಾಪ್ರಾದಿ’ ಮ್ಹಳ್ಳೆಂ ಫೈಸಲ್ ಹಾಡುಂಕ್ ಪಾವ್ಲೆಂ. ಏಕ್ ಮನ್ಶಾವರ್ವಿಂ, ತಾಚ್ಯಾ ಪಾತ್ಕಾಕ್ ಲಾಗುನ್ ಮೊರ್ನಾನ್ ಆಪ್ಲಿ ರಾಜ್ವಾಟ್ಕಿ ಚಲಯ್ಲಿ ತೆಂ ಖರೆಂ ಜಾಲ್ಯಾರ್ಯೀ, ಏಕ್ ಮನ್ಶಾ ಜೆಜು ಕ್ರಿಸ್ತಾನ್ ಕೆಲ್ಲ್ಯಾಚೊ ಪರಿಣಾಮ್ ಆನಿಕ್ಯೀ ಕಿತ್ಲೊ ವರ್ತೊ! ದೆವಾ ಥಾವ್ನ್ ಧಾರಾಳ್ ಕುರ್ಪಾ ಆನಿ ನಿತಿವಂತ್ಪಣಾಚೆಂ ಧರ್ಮಾರ್ಥ್ ದೆಣೆಂ ಜೊಡ್ಲಲಿಂ ತ್ಯಾಚ್ ಕ್ರಿಸ್ತಾ ಮಾರಿಫತ್ ಜಿವಿತ್ ಜೊಡ್ತಲಿಂ ಆನಿ ರಾಜ್ವಟ್ಕಿ ಚಲಯ್ತಲಿಂ. ತರ್ ಜಶೆಂ ಏಕ್ ಮನ್ಶಾಚ್ಯಾ ಪಾತ್ಕಾ ವರ್ವಿಂ ಸಗ್ಳ್ಯಾ ಮನ್ಶಾಕುಳಾಕ್ ಖ್ಯಾಸ್ತಿಚೆಂ ಫರ್ಮಾಣ್ ಫಾವೊ ಜಾಲೆಂ, ತಶೆಂ ಆನ್ಯೇಕ್ ಮನ್ಶಾಚೆ ನಿತಿಚೆ ಕರ್ನೆ ವರ್ವಿಂ ಸಗ್ಳ್ಯಾ ಮನ್ಶಾಕುಳಾಕ್ ಸುಟ್ಕಾ ಆನಿ ಜಿವಿತ್ ಲಾಭ್ತಾ. ಜಶೆಂ ಏಕ್ ಮನ್ಶಾಚ್ಯಾ ಅವಿಧೇಯ್ಪಣಾ ವರ್ವಿಂ ಸರ್ವ್ ಮನಿಸ್ ಪಾತ್ಕಿ ಜಾಂವ್ಕ್ ಪಾವ್ಲೆ, ತಶೆಂ ಏಕ್ ಮನ್ಶಾಚ್ಯಾ ವಿಧೇಯ್ಪಣಾ ವರ್ವಿಂ ಸರ್ವ್ ಮನಿಸ್ ನಿತಿವಂತ್ ಜಾಂವ್ಕ್ ಪಾವ್ತಲೆ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ - ಸುವಾರ್ತಾ

ಮಾತೆವ್ 4:1-11 ತಾಚೆ ಉಪ್ರಾಂತ್ ದೆಂವ್ಚಾರಾನ್ ತಾಳ್ಚೆ ಖಾತಿರ್ ಪವಿತ್ರ್ ಅತ್ಮೊ ಜೆಜುಕ್ ಅರಣ್ಯಾಕ್ ವ್ಹರ್ನ್ ಗೆಲೊ. ಥಂಯ್ ಚಾಳೀಸ್ ದೀಸ್ ಆನಿ ಚಾಳೀಸ್ ರಾತಿಂ ಉಪಾಸ್ ಕೆಲ್ಯಾ ಉಪ್ರಾಂತ್ ತೊ ಭುಕೆಲೊ. ತೆದ್ವಾಂ ತಾಳ್ತಲೊ ತಾಚೆ ಸರ್ಶಿಂ ಯೇವ್ನ್ ಮ್ಹಣಾಲೊ: “ಜರ್ ತುಂ ದೆವಾಚೊ ಪೂತ್, ತರ್ ಹೆ ಫಾತರ್ ಉಂಡೆ ಜಾಂವ್ ಮ್ಹಣುನ್ ಫರ್ಮಾಯ್.” ಪುಣ್ ಜೆಜುನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ: “ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ಮನಿಸ್ ಉಂಡ್ಯಾನ್ ಮಾತ್ರ್ ನ್ಹಯ್, ಬಗರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತ್ಯಾ ಹರ್ಯೆಕ್ ಉತ್ರಾನ್ ಜಿಯೆತಾ’.” ಉಪ್ರಾಂತ್ ದೆಂವ್ಚಾರ್ ತಾಕಾ ಪವಿತ್ರ್ ಶಹರಾಕ್ ವ್ಹರ್ನ್ ಗೆಲೊ. ಥಂಯ್ ದೆವಾಳಾಚ್ಯಾ ಶಿಖರಾಚೆರ್ ತಾಕಾ ಉಬೊ ಕರ್ನ್ ಮ್ಹಣಾಲೊ: “ತುಂ ದೆವಾಚೊ ಪೂತ್ ಜಾಲ್ಯಾರ್ ಸಕ್ಲಾ ಉಡಿ ಮಾರ್; ಕಿತ್ಯಾಕ್ ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ದೇವ್ ಆಪ್ಲ್ಯಾ ದುತಾಂಕ್ ತುಜೇ ವಿಶ್ಯಾಂತ್ ತಾಕಿದ್ ದಿತಲೊ: ಆನಿ ತುಜೊ ಪಾಂಯ್ ಫಾತ್ರಾಕ್ ಆದಳ್ನಾಶೆಂ ಆಪ್ಲ್ಯಾ ಹಾತಾಂನಿ ತೆ ತುಕಾ ಸಾಂಬಾಳ್ನ್ ಧರ್ತಲೆ’.” ಜೆಜುನ್ ತಾಕಾ ಜಾಪ್ ದಿಲಿ: “ಹೆಂಯಿ ಬರೊವ್ನ್ ಆಸಾ: ‘ಸರ್ವೆಸ್ಪರಾ ತುಜ್ಯಾ ದೆವಾಚಿ ಪರೀಕ್ಷಾ ಕರಿನಾಕಾ’.” ಉಪ್ರಾಂತ್ ದೆಂವ್ಚಾರ್ ಜೆಜುಕ್ ಏಕ್ ಭೋವ್ ಉಬಾರ್ ಪರ್ವತಾರ್ ವ್ಹರ್ನ್ ಗೆಲೊ ಆನಿ ಸಂಸಾರಾಚಿಂ ಸರ್ವ್ ರಾಜ್ಯಾಂ ತಾಂಚ್ಯಾ ವೈಭವಾ ಸಮೇತ್ ದಾಖೊವ್ನ್ ಮ್ಹಣಾಲೊ: “ಮ್ಹಜ್ಯಾ ಪಾಂಯಾಂಕ್ ಪಡುನ್ ಮ್ಹಾಕಾ ನಮಸ್ಕಾರ್ ಕರ್ಶಿ ಜಾಲ್ಯಾರ್ ಹಾಂವ್ ಹೆಂ ಸಗ್ಳೆಂ ತುಕಾ ದಿತಲೊಂ.” ತೆದ್ವಾಂ ಜೆಜುನ್ ಮ್ಹಳೆಂ : “ಚಲ್ ಹಾಂಗಾಚೊ ಸೈತಾನಾ, ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ : ‘ಸರ್ವೆಸ್ಪರಾಕ್, ತುಜ್ಯಾ ದೆವಾಕ್ ಆರಾಧನ್ ಕರ್, ತಾಚಿ ಎಕ್ಲ್ಯಾಚಿ ಮಾತ್ರ್ ಸೆವಾ ಕರ್’.” ತಿತ್ಲ್ಯಾರ್ ದೆಂವ್ಚಾರ್ ತಾಕಾ ಸೊಡ್ನ್ ಗೆಲೊ. ಆನಿ ತೊ ವೆತಚ್ ದೇವ್ದೂತ್ ಯೇವ್ನ್ ತಾಚಿ ಸೆವಾ ಕರುಂಕ್ ಲಾಗ್ಲೆ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ - ಸುವಾರ್ತಾ

ಮಾತೆವ್ 4:1-11 ತಾಚೆ ಉಪ್ರಾಂತ್ ದೆಂವ್ಚಾರಾನ್ ತಾಳ್ಚೆ ಖಾತಿರ್ ಪವಿತ್ರ್ ಅತ್ಮೊ ಜೆಜುಕ್ ಅರಣ್ಯಾಕ್ ವ್ಹರ್ನ್ ಗೆಲೊ. ಥಂಯ್ ಚಾಳೀಸ್ ದೀಸ್ ಆನಿ ಚಾಳೀಸ್ ರಾತಿಂ ಉಪಾಸ್ ಕೆಲ್ಯಾ ಉಪ್ರಾಂತ್ ತೊ ಭುಕೆಲೊ. ತೆದ್ವಾಂ ತಾಳ್ತಲೊ ತಾಚೆ ಸರ್ಶಿಂ ಯೇವ್ನ್ ಮ್ಹಣಾಲೊ: “ಜರ್ ತುಂ ದೆವಾಚೊ ಪೂತ್, ತರ್ ಹೆ ಫಾತರ್ ಉಂಡೆ ಜಾಂವ್ ಮ್ಹಣುನ್ ಫರ್ಮಾಯ್.” ಪುಣ್ ಜೆಜುನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ: “ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ಮನಿಸ್ ಉಂಡ್ಯಾನ್ ಮಾತ್ರ್ ನ್ಹಯ್, ಬಗರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತ್ಯಾ ಹರ್ಯೆಕ್ ಉತ್ರಾನ್ ಜಿಯೆತಾ’.” ಉಪ್ರಾಂತ್ ದೆಂವ್ಚಾರ್ ತಾಕಾ ಪವಿತ್ರ್ ಶಹರಾಕ್ ವ್ಹರ್ನ್ ಗೆಲೊ. ಥಂಯ್ ದೆವಾಳಾಚ್ಯಾ ಶಿಖರಾಚೆರ್ ತಾಕಾ ಉಬೊ ಕರ್ನ್ ಮ್ಹಣಾಲೊ: “ತುಂ ದೆವಾಚೊ ಪೂತ್ ಜಾಲ್ಯಾರ್ ಸಕ್ಲಾ ಉಡಿ ಮಾರ್; ಕಿತ್ಯಾಕ್ ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ದೇವ್ ಆಪ್ಲ್ಯಾ ದುತಾಂಕ್ ತುಜೇ ವಿಶ್ಯಾಂತ್ ತಾಕಿದ್ ದಿತಲೊ: ಆನಿ ತುಜೊ ಪಾಂಯ್ ಫಾತ್ರಾಕ್ ಆದಳ್ನಾಶೆಂ ಆಪ್ಲ್ಯಾ ಹಾತಾಂನಿ ತೆ ತುಕಾ ಸಾಂಬಾಳ್ನ್ ಧರ್ತಲೆ’.” ಜೆಜುನ್ ತಾಕಾ ಜಾಪ್ ದಿಲಿ: “ಹೆಂಯಿ ಬರೊವ್ನ್ ಆಸಾ: ‘ಸರ್ವೆಸ್ಪರಾ ತುಜ್ಯಾ ದೆವಾಚಿ ಪರೀಕ್ಷಾ ಕರಿನಾಕಾ’.” ಉಪ್ರಾಂತ್ ದೆಂವ್ಚಾರ್ ಜೆಜುಕ್ ಏಕ್ ಭೋವ್ ಉಬಾರ್ ಪರ್ವತಾರ್ ವ್ಹರ್ನ್ ಗೆಲೊ ಆನಿ ಸಂಸಾರಾಚಿಂ ಸರ್ವ್ ರಾಜ್ಯಾಂ ತಾಂಚ್ಯಾ ವೈಭವಾ ಸಮೇತ್ ದಾಖೊವ್ನ್ ಮ್ಹಣಾಲೊ: “ಮ್ಹಜ್ಯಾ ಪಾಂಯಾಂಕ್ ಪಡುನ್ ಮ್ಹಾಕಾ ನಮಸ್ಕಾರ್ ಕರ್ಶಿ ಜಾಲ್ಯಾರ್ ಹಾಂವ್ ಹೆಂ ಸಗ್ಳೆಂ ತುಕಾ ದಿತಲೊಂ.” ತೆದ್ವಾಂ ಜೆಜುನ್ ಮ್ಹಳೆಂ : “ಚಲ್ ಹಾಂಗಾಚೊ ಸೈತಾನಾ, ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ : ‘ಸರ್ವೆಸ್ಪರಾಕ್, ತುಜ್ಯಾ ದೆವಾಕ್ ಆರಾಧನ್ ಕರ್, ತಾಚಿ ಎಕ್ಲ್ಯಾಚಿ ಮಾತ್ರ್ ಸೆವಾ ಕರ್’.” ತಿತ್ಲ್ಯಾರ್ ದೆಂವ್ಚಾರ್ ತಾಕಾ ಸೊಡ್ನ್ ಗೆಲೊ. ಆನಿ ತೊ ವೆತಚ್ ದೇವ್ದೂತ್ ಯೇವ್ನ್ ತಾಚಿ ಸೆವಾ ಕರುಂಕ್ ಲಾಗ್ಲೆ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ - ಪಯ್ಲೆಂ ವಾಚಪ್

ಸಿರಾಕ್ 15:16-20 ಖೊಟೆಪಣಾಚಿ ವಾಟ್ ಧರುಂಕ್ ಕೊಣಾಕ್ಚ್ ತಾಣಿಂ ಫರ್ಮಾಂವ್ಕ್ ನಾ. ಸಿರಾಖಾಚ್ಯಾ ಪುಸ್ತಕಾಂತ್ಲೆಂ ವಾಚಪ್ ತುಜೆ ಮುಕಾರ್ ತಾಣೆಂ ಉಜೊ ಆನಿ ಉದಕ್ ದವರ್ಲ್ಯಾಂತ್, ಖಂಯ್ಚೆಂ ತುಂ ವಿಂಚ್ತಾಯ್, ತಾಕಾ ಹಾತ್ ಘಾಲ್. ಮನ್ಶಾ ಮುಕಾರ್ ಜಿವಿತ್ ಆನಿ ಮರಣ್ ಆಸಾತ್, ಖಂಯ್ಚೆಂ ತೊ ವಿಂಚ್ತಾ, ತೆಂ ತಾಕಾ ಮೆಳ್ತಲೆಂ. ಸರ್ವೆಸ್ಪರಾಚಿ ಜಾಣ್ವಾಯ್ ಭೋವ್ ವ್ಹಡ್, ತೊ ಪದ್ವೆನ್ ಬಳ್ವಂತ್ ಆನಿ ಸಗ್ಳೆಂ ಪಳೆತಾ. ತಾಚಿ ಭಿರಾಂತ್ ಧರ್ತಲ್ಯಾಂಚೆರ್ ತಾಚೆ ದೊಳೆ ಆಸಾತ್, ಆನಿ ಮನ್ಶಾಚಿ ಹರೇಕ್ ಕರ್ಣಿ ತೊ ಜಾಣಾ. ಖೊಟೊ ಜಾಂವ್ಕ್ ತೊ ಕೊಣಾಕ್ಚ್ ಫರ್ಮಾಯ್ನಾ, ಪಾತಕ್ ಕರುಂಕ್ ತೊ ಕೊಣಾಕ್ಚ್ ಪರ್ವಣ್ಗಿ ದಿನಾ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ – ಕೀರ್ತನ್

ಅಂತರ್ ಗೀತ್: ಕೀರ್ತನ್ : 118 ಶ್ಲೋಕ್ : ಸರ್ವೆಸ್ಪರಾಚೆ ಉಪದೆಸ್ ಪಾಳ್ತಾತ್ ತಿಂ ಭಾಗಿ! 1. ಖತಾವಿಣ್ ಜಿಣಿಯೆನ್ ಸರ್ವೆಸ್ಪರಾಚೆಂ ಧರ್ಮ್ಶಾಸ್ತ್ರ್ ಪಾಳ್ತಾತ್ ತಿಂ ಭಾಗಿ, ತಾಚಿಂ ನಿಯಮಾಂ ವಿಶ್ವಾಸಾನ್ ಪಾಳುನ್ ಸಗ್ಳ್ಯಾ ಕಾಳ್ಜಾನ್ ತಾಕಾ ಸೊಧ್ತಾತ್ ತಿಂ ಭಾಗಿ! 2. ತುಜೆ ಕಾಯ್ದೆ ಆಮಿ ಚತ್ರಾಯೆನ್ ಪಾಳುಂಕ್ ಜಾಯ್ ಮ್ಹಣ್ ತುವೆಂ ತೆ ಪರ್ಗಟ್ ಕೆಲ್ಯಾಯ್, ತುಜ್ಯೆ ಖುಶೆಕ್ ಪಾಳೊ ದಿಂವ್ಕ್ ಮ್ಹಜೆ ಪಾಂಯ್, ಮ್ಹಜಿ ಚಾಲ್, ಸದಾಂಚ್ ಥಿರ್ ಆಸುಂ. 3. ತುಜ್ಯಾ ಚಾಕ್ರಾಕ್ ದಯಾ ದಾಖಯ್, ತೆದ್ವಾಂ ಜಿವಂತ್ ಆಸುನ್ ತುಜೆಂ ಉತರ್ ಹಾಂವ್ ಪಾಳ್ತಲೊಂ. ಮ್ಹಜೆ ದೊಳೆ ಉಘಡ್; ತೆದ್ವಾಂ ತುಜ್ಯಾ ಧರ್ಮ್ಶಾಸ್ತ್ರಾಚಿಂ ಅದ್ಭುತಾಂ ಹಾಂವ್ ನಿಹಾಳ್ತಲೊಂ. 4. ತುಜ್ಯಾ ನಿಯಮಾಂಚಿ ವಾಟ್ ಮ್ಹಾಕಾ ದಾಖಯ್, ಸರ್ವೆಸ್ಪರಾ, ಆಖೇರ್ ಪರ್ಯಾನ್ ಹಾಂವ್ ತ್ಯೆ ವಾಟೆನ್ ಚಲ್ತಲೊಂ. ತುಜೆ ಕಾಯ್ದೆ ಪಾಳುಂಕ್ ಮ್ಹಾಕಾ ಶಿಕಯ್, ಖರ್ಯಾ ಕಾಳ್ಜಾನ್ ಹಾಂವ್ ತೆ ಪಾಳ್ತಲೊಂ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ – ದುಸ್ರೆಂ ವಾಚಪ್

ಭಾವಾಂ-ಭಯ್ಣಿಂನೊ, ತರಿಪುಣ್ ಸಂಪೂರ್ಣ್ಕಾಯೆಕ್ ಪಾವ್ಲಲ್ಯಾಂ ಮಧೆಂ ಆಮಿ ಜಾಣ್ವಾಯೆಚಿಂ ಉತ್ರಾಂ ಉಲಯ್ತಾಂವ್; ಪುಣ್ ಹಿ ಜಾಣ್ವಾಯ್ ಸರೊನ್ ವೆಚ್ಯಾ ಹ್ಯಾ ಕಾಳಾಚಿ ನ್ಹಯ್, ವಾ ಪಾಡಾವ್ ಜಾವ್ನ್ ವೆಚ್ಯಾ ಹ್ಯಾ ಕಾಳಾಚ್ಯಾ ಅಧಿಕಾರ್ಯಾಂಚಿಯೀ ನ್ಹಯ್. ಆಮಿ ಉಲಯ್ತಾಂವ್ ತಿ ದೆವಾಚಿ ಜಾಣ್ವಾಯ್ ಎದೊಳ್ ಪರ್ಯಾನ್ ಲಿಪೊನ್ ಆಸ್ಲಲೊ ತಾಚೊ ಗುಟ್, ಸಂಸಾರಾಚ್ಯಾ ಆರಂಭಾ ಆದಿಂ ದೆವಾನ್ ಆಮ್ಚೇ ಮಹಿಮೇ ಖಾತಿರ್ ಯೆವ್ಜಿಲ್ಲೊ ತಸಲೊ. ಸಂಸಾರಾಚ್ಯಾ ಅಧಿಕಾರ್ಯಾಂ ಮಧ್ಲ್ಯಾ ಕೊಣಾಕ್ಚ್ ತೊ ಕಳಿತ್ ನಾತ್ಲ್ಲೊ; ತಾಂಕಾಂ ತೊ ಕಳಿತ್ ಆಸ್ಲ್ಲೊ ಜಾಲ್ಯಾರ್, ಮಹಿಮೆಚ್ಯಾ ದೆವಾಕ್ ತೆ ಕೆದಿಂಚ್ ಖುರ್ಸಾರ್ ಮಾರ್ತೆನಾತ್. ಪವಿತ್ರ್ ಪುಸ್ತಕಿಂಚ್ ಅಶೆಂ ಬರೊವ್ನ್ ಆಸಾ: “ದೊಳ್ಯಾಂನಿ ದೆಖುಂಕ್ ನಾ, ಕಾನಾಂನಿ ಆಯ್ಕುಂಕ್ ನಾ, ಮನ್ಶಾಂಚ್ಯಾ ಕಾಳ್ಜಾಂತ್ ರಿಗುಂಕ್ ನಾ, ಕಿತೆಂ ಸಕ್ಕಡ್ ದೆವಾನ್ ತಯಾರ್ ಕರ್ನ್ ದವರ್ಲಾಂ ಮ್ಹಣ್ ಆಪ್ಣಾಚೊ ಮೋಗ್ ಕರ್ತಲ್ಯಾಂಕ್.” ಪುಣ್ ಆಪ್ಲ್ಯಾ ಪವಿತ್ರ್ ಅತ್ಮ್ಯಾ ಉದೆಶಿಂ ದೆವಾನ್ ಆಮ್ಕಾಂ ಹ್ಯೊ ಸಂಗ್ತಿ ಉಗ್ಡಾಪೆ ಕೆಲ್ಯಾತ್. ಕಿತ್ಯಾಕ್ ಪವಿತ್ರ್ ಅತ್ಮೊ ಸರ್ವ್ ವಸ್ತುಂಚಿ, ದೆವಾಚ್ಯಾ ಗೂಂಡ್ ಸಂಗ್ತಿಂಚಿ ಲೆಗುನ್ ಸೊಧ್ನಾ ಕರ್ತಾ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ - ಸುವಾರ್ತಾ

ಮಾತೆವ್ 5:17-37 “ನಿಯಮ್ಶಾಸ್ತ್ರ್ ವಾ ಪ್ರವಾದ್ಯಾಂಚೆಂ ಉತರ್ ರದ್ಧ್ ಕರುಂಕ್ ಹಾಂವ್ ಆಯ್ಲಾಂ ಮ್ಹಣ್ ತುಮಿ ಚಿಂತಿನಾಕಾತ್; ರದ್ಧ್ ಕರುಂಕ್ ನ್ಹಯ್, ಬಗರ್ ತೆಂ ಸಂಪೂರ್ಣ್ ಕರುಂಕ್ ಮ್ಹಣ್ ಹಾಂವ್ ಆಯ್ಲಾಂ. ಸತ್ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಆಕಾಸ್ ಆನಿ ಭುಮಿ ಸರ ಪರ್ಯಾನ್ ಘಡ್ಚೆಂ ಆಸಾ ತೆಂ ಘಡ್ಲ್ಯಾ ಶಿವಾಯ್ ನಿಯಮ್ಶಾಸ್ತ್ರಾಂತ್ಲೆಂ ಎಕ್ಚ್ ಏಕ್ ಅಕ್ಷರ್ ವಾ ತಿಬೊ ಪುಸುನ್ ವೆಚೊನಾ. ದೆಕುನ್ ಜೊ ಕೊಣ್ ಹ್ಯಾ ನಿಯಮ್ಶಾಸ್ತ್ರಾಂತ್ಲೆಂ ಏಕ್ ಅತೀ ಲ್ಹಾನ್ ನಿಯಮ್ ಮೊಡ್ತಾ ವಾ ತಶೆಂ ಮೊಡುಂಕ್ ಹೆರಾಂಕ್ ಶಿಕಯ್ತಾ, ತಸಲ್ಯಾಕ್ ಸರ್ಗಿಂಚ್ಯಾ ರಾಜ್ಯಾಂತ್ ನಿಮಾಣೊ ಮ್ಹಣ್ ಲೆಖ್ತಲೆ. ಪುಣ್ ಜೊ ಕೊಣ್ ನಿಯಮಾಂ ಪಾಳ್ತಾ ಆನಿ ಹೆರಾಂಕ್ಯೀ ಪಾಳುಂಕ್ ಶಿಕಯ್ತಾ ತಾಕಾ ಸರ್ಗಿಂಚ್ಯಾ ರಾಜ್ಯಾಂತ್ ವರ್ತೊ ಮ್ಹಣ್ ಲೆಖ್ತಲೆ. ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ: “ಶಾಸ್ತ್ರ್ಯಾಂ ಆನಿ ಫಾರಿಜೆವಾಂಚೇ ಧರ್ಮ್ದಿಷ್ಟಿ ಪ್ರಾಸ್ ತುಮ್ಚಿ ಧರ್ಮ್ದೀಷ್ಟ್ ಚಡ್ ಬರಿ ಜಾಲ್ಲೇಖರಿತ್ ತುಮಿ ಸರ್ಗಿಂಚ್ಯಾ ರಾಜ್ಯಾಂತ್ ರಿಗ್ಚಿಂನಾತ್. “ಆಮ್ಚ್ಯಾ ಪುರ್ವಜಾಂಕ್ ಸಾಂಗ್ಲ್ಲೆಂ ತುಮಿ ಆಯ್ಕಲಾಂ: ‘ಜಿವೆಶಿಂ ಮಾರಿನಾಕಾ; ಜೊ ಕೊಣ್ ಜಿವೆಶಿಂ ಮಾರ್ತಾ ತಾಕಾ ನಿತಿಸಭೆಚೇ ಝಡ್ತೆಕ್ ಉಬೊ ಕರಿಜಯ್.’ ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಜೊ ಕೊಣ್ ಆಪ್ಲ್ಯಾ ಭಾವಾಚೆರ್ ರಾಗಾರ್ ರಾವ್ತಾ, ತಾಕಾ ನಿತಿಸಭೇ ಮುಖಾರ್ ಹಾಡಿಜಯ್; ಆನಿ ಜೊ ಕೊಣ್ ಆಪ್ಲ್ಯಾ ಭಾವಾಕ್ ‘ಅರೇ ಪೆದ್ದಾ’ ಮ್ಹಣ್ತಾ, ತಾಕಾ ಸಾನ್ಹೆದ್ರಿನ್ ಸಭೇ ಮುಖಾರ್ ಹಾಡಿಜಯ್. ಆನಿ ಜೊ ಕೊಣ್ ತಾಕಾ ‘ಅರೇ ಪಿಶಾ’ ಮ್ಹಣ್ತಾ, ತಾಣೆಂ ಯೆಮ್ಕೊಂಡಾಚ್ಯಾ ಉಜ್ಯಾಂತ್ ಲಾಸಜಯ್. “ದೆಕುನ್ ತುಂ ವೇದಿ ಮುಖಾರ್ ತುಜಿ ಕಾಣಿಕ್ ಭೆಟೊಂವ್ಕ್ ವೆತಾನಾ, ಜರ್ ತುಜ್ಯಾ ಭಾವಾಕ್ ತುಜೇ ವಿರೋಧ್ ಕಾಂಯ್ ಆಸಾ ಮ್ಹಣ್ ತುಕಾ ಉಗ್ಡಾಸ್ ಯೆತ್, ತರ್ ತಿ ತುಜಿ ಕಾಣಿಕ್ ಥಂಯ್ಚ್ ವೇದಿ ಮುಖಾರ್ ಸೊಡ್. ಪಯ್ಲೆಂ ವಚ್ ಆನಿ ತುಜ್ಯಾ ಭಾವಾಕಡೆ ರಾಜಿ ಜಾ; ಉಪ್ರಾಂತ್, ಪಾಟಿಂ ಯೇವ್ನ್ ತುಜಿ ಕಾಣಿಕ್ ಭೆಟಯ್. “ತುಂ ಆನಿ ತುಜೊ ವಾದಿ ಕೊಡ್ತಿಚೇ ವಾಟೇರ್ ಆಸ್ತಾನಾಚ್ ತಾಚೇಲಾಗಿಂ ರಾಜಿ ಜಾ, ನಾ ಜಾಲ್ಯಾರ್ ವಾದಿ ತುಕಾ ನಿತಿಕರ್ತಾ ಆಧೀನ್ ಕರಿತ್, ಆನಿ ನಿತಿಕರ್ತ್ ತುಕಾ ಪಾರ್ಯಾಂಚ್ಯಾ ಹಾತಾಂತ್ ದೀತ್ ಆನಿ ತುಕಾ ಬಂದೆಂತ್ ಘಾಲ್ತಿತ್. ಸತ್ಚ್ ಹಾಂವ್ ತುಕಾ ಸಾಂಗ್ತಾಂ: ಪೈಶಾಕ್ ಪೈಸೊ ಫಾರಿಕ್ ಕರಿಸರ್ ಥಂಯ್ಚೊ ತುಂ ಭಾಯ್ರ್ ಸರ್ಚೊನಾಯ್. “ ‘ಪ್ರದ್ವಾರ್ ಕರಿನಾಕಾ’ ಮ್ಹಣ್ ಪುರ್ವಜಾಂಕ್ ಸಾಂಗ್ಲ್ಲೆಂ ತುಮಿ ಆಯ್ಕಲಾಂ. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಜೊ ಕೊಣ್ ಖೊಟೇ ಆಶೆನ್ ಏಕ್ ಸ್ತ್ರಿಯೆಚೆರ್ ದೀಷ್ಟ್ ಲಾಯ್ತಾ, ತಾಣೆಂ ಆಪ್ಲ್ಯಾ ಕಾಳ್ಜಾಂತ್ ತಿಚೇಕಡೆ ಪ್ರದ್ವಾರ್ ಕರ್ನ್ಯೀ ಜಾಲಾ. “ತುಜೊ ಉಜ್ವೊ ದೊಳೊ ತುಕಾ ಪಾತ್ಕಾಕ್ ವೊಡ್ತಾ ಜಾಲ್ಯಾರ್ ತೊ ಕೊಂಕುನ್ ಕಾಡ್ ಆನಿ ಪಯ್ಸ್ ಉಡಯ್; ತುಜಿ ಸಗ್ಳಿ ಕೂಡ್ ಯಮ್ಕೊಂಡಾಂತ್ ಘಾಲ್ನ್ ಕಾಣ್ಘೆಂವ್ಚೇ ಪ್ರಾಸ್ ತುಜೊ ಏಕ್ ವಿಸ್ವೊ ತುವೆಂ ಹೊಗ್ಡಾವ್ನ್ ಕಾಣ್ಘೆಲ್ಲೊ ಅಧಿಕ್ ಬರೆಂ. ತುಜೊ ಉಜ್ವೊ ಹಾತ್ ತುಕಾ ಪಾತ್ಕಾಕ್ ವೊಡ್ತಾ ಜಾಲ್ಯಾರ್ ತೊ ಕಾತರ್ನ್ ಕಾಡ್ ಆನಿ ಪಯ್ಸ್ ಉಡಯ್. ತುಜಿ ಸಗ್ಳಿ ಕೂಡ್ ಯಮ್ಕೊಂಡಾಕ್ ವೆಚೇ ಪ್ರಾಸ್ ತುಜೇ ಕುಡಿಚೊ ಏಕ್ ವಿಸ್ವೊ ತುವೆಂ ಹೊಗ್ಡಾವ್ನ್ ಕಾಣ್ಘೆಲ್ಲೊ ಅಧಿಕ್ ಬರೆಂ. “ಹ್ಯಾ ಶಿವಾಯ್ ಅಶೆಂಯೀ ಸಾಂಗ್ಲ್ಲೆಂ ಆಸಾ: ‘ಕೊಣ್ ತರ್ಯೀ ಆಪ್ಲೇ ಬಾಯ್ಲೆಕ್ ಸೊಡ್ತಾ, ತಾಣೆಂ ತಿಕಾ ವೆಗ್ಳಾಚಾರ್ಪತ್ರ್ ಬರೊವ್ನ್ ದೀಜಯ್. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ವ್ಯಭಿಚಾರಾ ಶಿವಾಯ್ ದುಸ್ರ್ಯಾ ಖಂಯ್ಚಾಯೀ ಕಾರಣಾನ್ ಆಪ್ಲೇ ಬಾಯ್ಲೆಕ್ ಸೊಡ್ತಾ ತೊ ಹರ್ಯೆಕ್ಲೊ ತಿ ಪ್ರದ್ವಾರಿಣ್ ಜಾಂವ್ಕ್ ಕಾರಣ್ ಜಾತಾ; ಆನಿ ಜೊ ಕೊಣ್ ಅಶೆಂ ಸೊಡ್ಲಲೇ ಲಾಗಿಂ ಲಗ್ನ್ ಜಾತಾ, ತೊಯೀ ಪ್ರದ್ವಾರ್ ಆಧಾರ್ತಾ. “ಪುರ್ವಜಾಂಕ್ ಸಾಂಗ್ಲ್ಲೆಂ ತುಮಿ ಆಯ್ಕಲಾಂ: ‘ಸಪುತ್ ಘಾಲ್ನ್ ದಿಲ್ಲೆಂ ಉತರ್ ಮೊಡಿನಾಕಾ;’ ಆನಿ ‘ಸರ್ವೆಸ್ಪರಾ ಮುಖಾರ್ ಆಣ್ ಘಾಲ್ನ್ ಭಾಸಾಯ್ಲ್ಲೆಂ ಪಾರಿಕ್ ಕರ್’. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಸಪುತ್ ಘಾಲ್ಚೊಚ್ ನ್ಹಯ್ - ಆಕಾಸಾಚ್ಯಾ ನಾಂವಾನ್ ಸಪುತ್ ಘಾಲಿನಾಕಾತ್; ಕಿತ್ಯಾಕ್ ದೆವಾಚೆಂ ಶಿಯಾಸಣ್ ತೆಂ. ಭುಮಿಚ್ಯಾನ್ ಸಪುತ್ ಘಾಲಿನಾಕಾತ್; ಕಿತ್ಯಾಕ್ ದೆವಾಚ್ಯಾ ಪಾಂಯಾಂಚಿ ಮಣಯ್ ತಿ; ಜೆರುಜಲೆಮಾಚ್ಯಾ ನಾಂವಾನ್ ಸಪುತ್ ಘಾಲಿನಾಕಾತ್; ಕಿತ್ಯಾಕ್ ವ್ಹಡ್ ರಾಯಾಚೆಂ ಶಹರ್ ತೆಂ. ಆನಿ ತುಜ್ಯಾ ಮಾತ್ಯಾಚ್ಯಾ ನಾಂವಾನ್ಯೀ ಸಪುತ್ ಘಾಲಿನಾಕಾ; ಕಿತ್ಯಾಕ್ ಎಕ್ಚ್ ಏಕ್ ಕೇಸ್ ಧವೊ ವಾ ಕಾಳೊ ಕರುಂಕ್ ತುಂ ಸಕನಾಯ್. ತುಮ್ಚೆಂ ಉಲೊವ್ಣೆಂ ಜಾಯ್ಜಯ್ ‘ವ್ಹಯ್’ ವಾ ‘ನ್ಹಯ್’; ಹಾಚೇ ಪ್ರಾಸ್ ಚಡಿತ್ ಕಿತೆಂಯೀ ಆಸ್ಲ್ಯಾರ್ ತೆಂ ದೆಂವ್ಚಾರಾ ಥಾವ್ನ್ ಯೆತಾ.

29 January

ಫೆಬ್ರೆರ್ 8 - ಸಾಧ್ಯಾ ಕಾಳಾಚೊ ಪಾಂಚ್ವೊ ಆಯ್ತಾರ್ – ಕೀರ್ತನ್

ಕೀರ್ತನ್ : 111 ಶ್ಲೋಕ್ : ನಿತಿವಂತಾಕ್ ಕಾಳೊಕಾಂತ್ ಉಜ್ವಾಡ್ ಮೆಳ್ತಾ. ವ ಸರ್ವೆಸ್ಪರಾಕ್ ಜೈ, ಜೈ! 1. ನಿತಿವಂತಾಕ್ ಕಾಳೊಕಾಂತ್ ಉಜ್ವಾಡ್ ಮೆಳ್ತಾ, ದೇವ್ ತಾಕಾ ಮೊವಾಳ್, ದಯಾಳ್ ಆನಿ ವಿಶ್ವಾಸಿ ಜಾವ್ನಾಸಾ ಬರೊ ಮನಿಸ್ ದಯಾ ದಾಖೊವ್ನ್ ಉಸ್ಣೆಂ ದಿತಾ, ತೊ ಆಪ್ಲೊ ಧಂದೊ ಪ್ರಮಾಣಿಕ್ಪಣಿಂ ಚಲಯ್ತಾ. 2. ನಿತಿವಂತ್ ಮನಿಸ್ ಕೆದಿಂಚ್ ಹಾಲ್ಚೊ ನಾ, ತಾಚೊ ಉಗ್ಡಾಸ್ ಉರ್ತಾ ಸದಾಂಕಾಲ್. ವಾಯ್ಟ್ ಖಬರ್ ಯೆತಾನಾ ತಾಕಾ ಭ್ಯೆಂ-ಭಿರಾಂತ್ ದಿಸನಾ ಕಿತ್ಯಾಕ್ ಥಿರ್ ಕಾಳ್ಜಾನ್ ಸರ್ವೆಸ್ಪರಾಚೆರ್ ತಾಣೆಂ ವಿಶ್ವಾಸ್ ದವರ್ಲಾ. 3. ದೃಢ್ ಕಾಳ್ಜಾಚ್ಯಾಕ್ ಭಿರಾಂತ್ಚ್ ನಾ; ಉದಾರ್ ಹಾತಾನ್ ದುಬ್ಳ್ಯಾ-ಧಾಕ್ಟ್ಯಾಂಕ್ ತೊ ದಿತಾ, ತಾಚೆಂ ಬರೆಪಣ್ ಸದಾಂಕಾಲ್ ಉರ್ತಾ, ಚಡ್ ಆನಿ ಚಡ್ ಮಾನ್ ತಾಕಾ ಮೆಳ್ತಾ.

29 January

ಫೆಬ್ರೆರ್ 8 - ಸಾಧ್ಯಾ ಕಾಳಾಚೊ ಪಾಂಚ್ವೊ ಆಯ್ತಾರ್ –ದುಸ್ರೆಂ ವಾಚಪ್

1 ಕೊರಿಂಥ್ 2:1-5 ಭಾವಾಂಭಯ್ಣಿಂನೋ, ಹಾಂವ್ ತುಮ್ಚೇ ಮಧೆಂ ಆಯ್ಲ್ಲೊಂ ತೆದ್ನಾ ವಾಚ್ಯಾ ಸಕ್ತೆಚ್ಯಾ ಆನಿ ಜಾಣ್ವಾಯೆಚ್ಯಾ ದರ್ಬಾರಾನ್ ಕ್ರಿಸ್ತಾಚೊ ಗುಟ್ ತುಮ್ಕಾಂ ಪರ್ಗಟ್ ಕರುಂಕ್ ಆಯ್ಲ್ಲೊ ನ್ಹಯ್. ಹಾಂವ್ ತುಮ್ಚೇ ಸವೆಂ ಆಸ್ಲಲ್ಯಾ ವೆಳಾರ್, ಜೆಜು ಕ್ರಿಸ್ತಾ ಶಿವಾಯ್ - ಖುರ್ಸಾಯ್ಲಲ್ಯಾ ಜೆಜು ಕ್ರಿಸ್ತಾ ಶಿವಾಯ್ - ದುಸ್ರೆಂ ಕಸಲೆಂಚ್ ಮನಾಂತ್ ಚಿಂತ್ಚೆಂ ನ್ಹಯ್ ಮ್ಹಣ್ ಹಾಂವೆಂ ನಿಶ್ಚಿತ್ ಕೆಲ್ಲೆಂ. ಅಶೆಂ ಅಸಕ್ತ್ಪಣಿಂ ಭಿಯೆವ್ನ್ ಆನಿ ಕಾಂಪೊನ್ ಮ್ಹಳ್ಳೇಬರಿ ಹಾಂವ್ ತುಮ್ಚೇ ಮಧೆಂ ಆಸ್ಲ್ಲೊಂ. ಮ್ಹಜ್ಯಾಚ್ ಉತ್ರಾಂನಿ ಹಾಂವೆಂ ಪರ್ಗಟ್ ಕೆಲ್ಲೊ ಸಂದೇಶ್ ಮನಾಂ ವ್ಹಯ್ ಕರ್ತಲ್ಯಾ ಮನ್ಶಾಂಚ್ಯಾ ಜಾಣ್ವಾಯೆಚ್ಯಾ ಉತ್ರಾಂಚೊ ನ್ಹಯ್; ಬಗರ್ ಪವಿತ್ರ್ ಅತ್ಮ್ಯಾಚಿ ಸಕತ್ ದಾಖೊವ್ನ್ ದಿಂವ್ಚೊ. ಕಿತ್ಯಾಕ್ ತುಮ್ಚ್ಯಾ ಭಾವಾರ್ಥಾಚಿ ಬುನ್ಯಾದ್ ಮನ್ಶಾಂಚೇ ಜಾಣ್ವಾಯೆಚೆರ್ ನ್ಹಯ್, ಬಗರ್ ದೆವಾಚೇ ಸಕ್ತೆಚೆರ್ ಪಡಜಯ್ ಮ್ಹಣ್ ಹಾಂವೆಂ ಲೆಖ್ಲೆಂ.

29 January

ಫೆಬ್ರೆರ್ 8 - ಸಾಧ್ಯಾ ಕಾಳಾಚೊ ಪಾಂಚ್ವೊ ಆಯ್ತಾರ್ - ಸುವಾರ್ತಾ

ಮಾತೆವ್ 5:13-16 “ತುಮಿ ಪೃಥ್ವಿಚೆಂ ವಿೂಟ್. ವಿೂಟ್ಚ್ ಜರ್ ಆಳ್ನಿ ಜಾಲೆಂ, ತರ್ ಕಿತ್ಯಾನ್ ತಾಕಾ ಖಾರ್ಸಾಣ್ ದಿವ್ಚಿ? ಭಾಯ್ರ್ ಉಡೊಂವ್ಕ್ ಆನಿ ಪಾಂಯಾಂಥಳಾ ಮಸ್ತುಂಕ್ ಶಿವಾಯ್ ಹೆರ್ ಕಿತ್ಯಾಕ್ಯೀ ತೆಂ ಉಪ್ಕಾರ್ನಾ. ತುಮಿ ಸಂಸಾರಾಚೊ ಉಜ್ವಾಡ್. ದೊಂಗ್ರಾಚೇ ತಾಳ್ವೆರ್ ಬಾಂಧ್ಲಾಂ ತೆಂ ಶಹರ್ ಲಿಪೊನ್ ಉರಾನಾ. ಕೊಣ್ಯೀ ಮನಿಸ್ ದಿವೊ ಪೆಟೊವ್ನ್ ಕಳ್ಶೇ ಪಂದಾ ದವರಿನಾ. ಬಗರ್ ಘರಾಂತ್ ಆಸ್ಲಲ್ಯಾ ಸಮೆಸ್ತಾಂಕ್ ಉಜ್ವಾಡ್ ಜಾಯ್ಸೊ ದಿವ್ಟೊಣೆರ್ ದವರ್ತಾ. ತಸೊಚ್ ತುಮ್ಚೊ ಉಜ್ವಾಡ್ ಮನ್ಶಾಂ ಮುಖಾರ್ ಪರ್ಜಳುಂ. ತೆ ತುಮ್ಚ್ಯೊ ಬರ್ಯೊ ಕನ್ರ್ಯೊ ಪಳೆಂವ್ ಆನಿ ತುಮ್ಚ್ಯಾ ಸರ್ಗಿಂಚ್ಯಾ ಬಾಪಾಕ್ ಮಹಿಮಾ ದಿಂವ್.

29 January

ಫೆಬ್ರೆರ್ 1 - ಸಾಧ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ - ಪಯ್ಲೆಂ ವಾಚಪ್

ಝೆಫ. 2:3; 3:12-13 ಝೆಫನೀಯಾ ಪ್ರವಾದ್ಯಾಚ್ಯಾ ಪುಸ್ತಕಾಂತ್ಲೆಂ ವಾಚಪ್ ದೆಶಾಂತ್ಲ್ಯಾ ಸಗ್ಳ್ಯಾ ಲ್ಹಾನ್ವಿಕ್ ಮನ್ಶಾಂನೊ, ದೆವಾಚ್ಯೊ ಆಜ್ಞಾ ಪಾಳ್ತಲ್ಯಾಂನೊ, ಸರ್ವೆಸ್ಪರಾಕ್ ಸೊದಾ. ಪ್ರಾಮಾಣಿಕ್ಪಣ್ ಸೊದಾ, ಲ್ಹಾನ್ವಿಕಾಯ್ ಸೊದಾ: ಸರ್ವೆಸ್ಪರಾಚ್ಯಾ ಕ್ರೊಧಾಚ್ಯಾ ದಿಸಾ, ಎಕಾದ್ಯಾ ವೆಳಾರ್ ತುಮ್ಕಾಂ ಆಸ್ರೊ ಮೆಳತ್. ಕಿತ್ಯಾಕ್ ಹಾಂವ್ ತುಜೆ ಮದೆಂ, ಏಕ್ ಲ್ಹಾನ್ವಿಕ್ ಆನಿ ಖಾಲ್ತಿ ಪರ್ಜಾ ದವರ್ತಲೊಂ, ಆನಿ ಇಸ್ರಾಯೆಲಾಂತ್ ಉರ್ಲ್ಯಾಂತ್ ತಿಂ ಸರ್ವೆಸ್ಪರಾಚ್ಯಾ ನಾಂವಾ ಥಂಯ್ ಆಸ್ರೊ ಘೆತಲಿಂ. ವಾಯ್ಟ್ ತಿಂ ಕರ್ಚಿಂ ನಾಂವ್, ಪೊಟಿ ಮಾರ್ಚಿಂ ನಾಂತ್, ಕಪಟಿ ಜೀಬ್ ತಾಂಚ್ಯಾ ತೊಂಡಾಂತ್ ಆಸ್ಚಿ ನಾ. ಕೊಣಾಯ್ಚಿ ಭಿರಾಂತ್ ನಾಸ್ತಾಂ, ತಿಂ ಚರವಾಕ್ ವೆತಲಿಂ ಆನಿ ವಿಶೆವ್ ಘೆತಲಿಂ.

29 January

ಫೆಬ್ರೆರ್ 1 - ಸಾಧ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ – ಕೀರ್ತನ್

ಕೀರ್ತನ್ 145 ಅಂತರ್ ಗೀತ್ ಶ್ಲೋಕ್ : ಆಪುಣ್ ದುರ್ಬಳಿಂ ಮ್ಹಣ್ ಜಾಣಾ ಆಸಾತ್ ತಿಂ ಭಾಗಿ! ಸರ್ಗಿಂಚೆಂ ರಾಜ್ಯ್ ತಾಂಚೆಂ ವ ಸರ್ವೆಸ್ಪರಾಕ್ ಜೈ, ಜೈ! 1. ಸರ್ವೆಸ್ಪರ್ ಸದಾಂಚ್ ವಿಶ್ವಾಸ್ ಪುರ್ತೊ, ಅನ್ನ್ಯಾಯ್ ಜಾಲ್ಲ್ಯಾಂಕ್ ನ್ಯಾಯ್-ನೀತ್ ಜೊಡ್ನ್ ದಿತಾ ತೊ; ಭುಕೆಲ್ಲ್ಯಾಂಕ್ ತೊ ಗ್ರಾಸ್ ದಿತಾ, ಕೈದ್ಯಾಂಚ್ಯೊ ಸಾಂಕ್ಳ್ಯೊ ತೊ ತುಟೊವ್ನ್ ಉಡಯ್ತಾ 2. ಸರ್ವೆಸ್ಪರ್ ಕುಡ್ರ್ಯಾಂಚೆ ದೊಳೆ ಉಘಡ್ತಾ, ಬಾಗ್ವಲ್ಲ್ಯಾಂಕ್ ನೀಟ್ ಉಬಿಂ ಕರ್ತಾ; ಸರ್ವೆಸ್ಪರ್ ಪರ್ಗಾಂವ್ಯಾಂಕ್ ರಾಖ್ತಾ, ಅನಾಥಾಂಕ್ ಆನಿ ವಿಧ್ವಿಂಕ್ ತೊಚ್ ಸಾಂಬಾಳ್ತಾ. 3. ಸರ್ವೆಸ್ಪರ್ ನಿತಿವಂತಾಂಚಿ ಅಪುರ್ಬಾಯ್ ಕರ್ತಾ, ಪುಣ್ ಖೊಟ್ಯಾಂಚ್ಯೊ ಆಲೋಚನೋ, ನಿರ್ಫಳ್ ಕರ್ತಾ; ಸರ್ವೆಸ್ಪರ್ ಸದಾಂಕಾಲ್ ರಾಜ್ವಟ್ ಚಲಯ್ತಲೊ ಏ ಸಿಯೋನಾ, ತುಜೊ ದೇವ್ ಸಂತತೆಚ್ಯೆ ಸಂತತೆಕ್ ತುಜೊ ರಾಯ್ ಜಾತಲೊ.

29 January

ಫೆಬ್ರೆರ್ 1 - ಸಾಧ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ – ದುಸ್ರೆಂ ವಾಚಪ್

1 ಕೊರಿಂ. 1:26-31 26ಭಾವಾಂನೋ, ತುಮ್ಕಾಂ ದೆವಾಚೆಂ ಆಪೊವ್ಣೆಂ ಲಾಭ್ಲಾಂ ಖರೆಂ. ತರ್ಯೀ ತುಮ್ಚಿ ಸ್ಥಿತಿಗತ್ ಚಿಂತುನ್ ಪಳೆಯಾ! ಸಂಸಾರ್ ಲೆಖ್ತಾ ತೇ ಪರ್ಮಾಣೆಂ ತುಮ್ಚೇ ಮಧೆಂ ಬುದ್ವಂತ್ ಜಾಯ್ತೆ ನಾತ್; ಸಾಮರ್ಥಿವಂತ್ ವಾ ಕುಳಿವಂತ್ಯೀ ಜಾಯ್ತೆ ನಾತ್. 27ತರಿಪುಣ್ ಜಾಣಾರ್ಯಾಂಕ್ ಲಜೆಕ್ ಘಾಲ್ಚ್ಯಾಕ್ ಸಂಸಾರ್ ಪಿಶೆಂ ಮ್ಹಣ್ ಲೆಖ್ತಾ ತೆಂ ದೆವಾನ್ ವಿಂಚುನ್ ಕಾಡ್ಲೆಂ; ತಶೆಂಚ್ ಬಳ್ವಂತಾಂಕ್ ಲಜೆಕ್ ಘಾಲ್ಚ್ಯಾಕ್ ಸಂಸಾರ್ ಅಸಕ್ತ್ ಮ್ಹಣ್ ಲೆಖ್ತಾ ತೆಂ ದೆವಾನ್ ವಿಂಚುನ್ ಕಾಡ್ಲೆಂ. 28ತಶೆಂಚ್ ಸಂಸಾರ್ ಕಿತೆಂ ಉತ್ತಮ್ ಮ್ಹಣ್ ಲೆಖ್ತಾ ತೆಂ ನಾಸ್ ಕರ್ಚೇ ಖಾತಿರ್ ಸಂಸಾರ್ ಕಿತೆಂ ಹೀನ್ ಮ್ಹಣ್ ಲೆಖ್ತಾ ವಾ ಧಿಕ್ಕಾರ್ ಕರ್ತಾ ವಾ ಕಾಂಯ್ಚ್ ನ್ಹಯ್ ಮ್ಹಣ್ ಲೆಖ್ತಾ ತೆಂ ದೆವಾನ್ ವಿಂಚ್ಲೆಂ. 29ಹಾಚೇ ವರ್ವಿಂ ಕೊಣ್ಯೀ ಮನ್ಶಾನ್ ದೆವಾ ಹುಜಿರ್ ಆಪ್ಲಿ ವ್ಹಡ್ವಿಕ್ ಚಿಂತುಂಕ್ ಅಸಾಧ್ಯ್. 30ಕಾರಣ್, ದೆವಾ ವರ್ವಿಂಚ್ ತೆಂ ತುಮಿ ಜೆಜು ಕ್ರಿಸ್ತಾಚ್ಯಾ ಎಕ್ವಟಾಂತ್ ಆಸಾತ್; ತಾಣೆಂಚ್ ತೆಂ ಜೆಜು ಕ್ರಿಸ್ತಾಕ್ ಆಮ್ಚಿ ಜಾಣ್ವಾಯ್ ಕೆಲೊ. ತಾಣೆಂಚ್ ತಾಕಾ ಆಮ್ಚೆಂ ನಿತಿವಂತ್ಪಣ್, ಆಮ್ಚೆಂ ಪವಿತ್ರ್ಪಣ್ ಆನಿ ಆಮ್ಚೆಂ ತಾರಣ್ ಕೆಲೊ. 31ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: “ವ್ಹಡ್ವಿಕ್ ಉಲೊಂವ್ಕ್ ಸೊಧ್ತಾ ತೊ ಸೊಮಿಯಾಚಿ ವ್ಹಡ್ವಿಕ್ ಉಲೊಂವ್.”

3 January

ಜನೆರ್ 25 - ಸಾಧ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ - ಪಯ್ಲೆಂ ವಾಚಪ್

ಇಸಾ.8:23-9:3 ಪುರ್ವಿಂ ತಾಣೆಂ ಜೆಬುಲುನಾಚ್ಯಾ ಪ್ರಾಂತಾಕ್ ಆನಿ ನಫ್ತಾಲಿಚ್ಯಾ ಪ್ರಾಂತಾಕ್ ಅಕ್ಮಾನ್ ಭೊಗುಂಕ್ ದಿಲೊ, ಪುಣ್ ಭವಿಷ್ಯಾಂತ್ ತೊ ದರ್ಯಾಚಿ ವಾಟ್, ಜೊರ್ದಾನಾ ಪಲ್ತಡಿಚೊ ಪ್ರಾಂತ್ ಆನಿ ರಾಷ್ಟ್ರಾಂಚೊ ಪ್ರದೇಶ್ ಮಹಿಮೆವಂತ್ ಕರ್ತಲೊ. ಕಾಳೊಕಾಂತ್ ಚಲ್ತಲ್ಯಾ ಲೊಕಾಕ್ ಏಕ್ ವ್ಹಡ್ ಉಜ್ವಾಡ್ ದಿಷ್ಟಿ ಪಡ್ಲೊ; ಮರಣಾಚೆ ಸಾವ್ಳೆಚ್ಯಾ ದೆಶಾಂತ್ ರಾವ್ತಲ್ಯಾಂಚೆರ್ ಏಕ್ ಉಜ್ವಾಡ್ ಫಾಂಕ್ಲೊ. ತುವೆಂ ತಾಂಚೊ ಆನಂದ್ ವಾಡಯ್ಲೊಯ್, ತಾಂಚೊ ಸಂತೊಸ್ ಚಡಯ್ಲೊಯ್. ಲುಂವ್ಣೆಚ್ಯಾ ಸಮಯಾರ್ ಸಂತೊಸ್ತಾತ್ ಆನಿ ಝುಜಾಚಿ ಲೂಟ್ ವಾಂಟುನ್ ಘೆತಾನಾ ಉಲ್ಲಾಸ್ತಾತ್ ತಶೆಂ ತಿಂ ತುಜೆ ಮುಕಾರ್ ಅನಂದ್ಭರಿತ್ ಜಾತಾತ್. ಕಿತ್ಯಾಕ್ ಮಿದಿಯಾನಾಚ್ಯಾ ದಿಸಾ ತುವೆಂ ಕೆಲ್ಲೆಂಯ್ ತಶೆಂ, ತಾಂಚೆಂ ಭಾರಾಚೆಂ ಜುಂ, ತಾಂಚ್ಯಾ ಖಾಂದಾ ವಯ್ಲೆಂ ಲಾಂಕುಡ್, ತಾಂಚೆರ್ ಜುಲುಮ್ ಕರ್ತಲ್ಯಾಂಚೊ ದಾಂಡೊ ತುವೆಂ ಮೊಡುನ್ ಉಡಯ್ಲಿಂಯ್.

3 January

ಜನೆರ್ 25 - ಸಾಧ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ – ಕೀರ್ತನ್

ಕೀ.26 ಅಂತರ್ ಗೀತ್ ಶ್ಲೋಕ್ : ಸರ್ವೆಸ್ಪರ್ ಮ್ಹಜೊ ಉಜ್ವಾಡ್, ತೊಚ್ ಮ್ಹಜೊ ತಾರೊಕ್ 1. ಸರ್ವೆಸ್ಪರ್ ಮ್ಹಜೊ ಉಜ್ವಾಡ್, ತೊಚ್ ಮ್ಹಜೊ ತಾರೊಕ್; ಹೆರ್ ಕೊಣಾಕ್ ಹಾಂವೆಂ ಭಿಯೆಜಯ್? ಸರ್ವೆಸ್ಪರ್ಚ್ ಮ್ಹಜ್ಯಾ ಜಿವಿತಾಚೊ ಖಾಂಬೊ; ಹೆರ್ ಕೊಣಾಕ್ ಹಾಂವೆಂ ಕಾಂಪಜಯ್? 2. ಏಕ್ ಉಪ್ಕಾರ್ ಸರ್ವೆಸ್ಪರಾಲಾಗಿಂ ಹಾಂವೆಂ ಮಾಗ್ಲಾ, ಆತಾಂಯ್ ತಿಚ್ ಮ್ಹಜಿ ಆಶಾ: ಸಗ್ಳ್ಯಾ ಮ್ಹಜ್ಯಾ ಜಿವಿತಾಂತ್ ಸರ್ವೆಸ್ಪರಾಚ್ಯೆ ಘರಿಂ ಹಾಂವೆಂ ಬಿಡಾರ್ ಕರುಂಕ್. ಸರ್ವೆಸ್ಪರಾಚೆಂ ಸುವಾಧಿಕ್ಪಣ್ ಚಾಕುನ್ ತಾಚ್ಯಾ ಮಂದಿರಾಂತ್ ತಾಚಿ ಖುಶಿ ಹಾಂವೆಂ ಸಮ್ಜುನ್ ಘೆಂವ್ಕ್! 3. ಇತ್ಲೆಂ ಹಾಂವ್ ಖರೆಂಚ್ ಭರ್ವಸುನ್ ಆಸಾಂ: ಹ್ಯಾ ಜಿವಿತಾಂತ್ಚ್ ಸರ್ವೆಸ್ಪರಾಚಿ ದಯಾಮಯಾ ಹಾಂವ್ ಭೊಗುಂಕ್ ಪಾವ್ತಲೊಂ. ಸರ್ವೆಸ್ಪರಾಚಿ ತರ್ ವಾಟ್ ಪಳೆವ್ನ್ ರಾವ್ ಧಯ್ರ್ ಘೆ ಆನಿ ದೃಢ್ ರಾವ್! ವ್ಹಯ್, ಸರ್ವೆಸ್ಪರಾಕ್ ಅತ್ರೆಗುನ್ ರಾವ್.

3 January

ಜನೆರ್ 25 - ಸಾಧ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ – ದುಸ್ರೆಂ ವಾಚಪ್

1 ಕೊರಿಂಥ್ 1:10-13,17 ಆತಾಂ ಭಾವಾಂನೋ, ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚೇ ನಾಂವಿಂ ಹಾಂವ್ ತುಮ್ಚೇಲಾಗಿಂ ಪರಾತುನ್ ಮಾಗ್ತಾಂ: ತುಮ್ಚೇ ಮಧೆಂ ಏಕ್ ಸಾರ್ಕಿಂ ಭಾವನಾಂ ಆಸಜಯ್; ತುಮ್ಚೇ ಮಧೆ ತಂಡ್ ಆಸನಯೆ. ತುಮಿ ಏಕ್ ಮನಾಚೆ ಆನಿ ಏಕ್ಚ್ ಅಭಿಪ್ರಾಯೆಚೆ ಜಾವ್ನ್ ತುಮ್ಚೇ ಮಧೆಂ ಪರಿಪೂರ್ಣ್ ಎಕ್ವಟ್ ಆಸುಂಕ್ ಫಾವೊ. ಕಿತ್ಯಾಕ್ ಮ್ಹಳ್ಯಾರ್, ಮ್ಹಜ್ಯಾ ಭಾವಾಂನೋ, ತುಮ್ಚೇ ಮಧೆ ನ್ಯಾಯ್ಝಗ್ಡಿಂ ಉಠ್ಲ್ಯಾಂತ್ ಮ್ಹಣ್ ಖ್ಲೋಯೆಚ್ಯಾ ಘರ್ಚ್ಯಾಂ ಮಾರಿಫತ್ ಮ್ಹಾಕಾ ಕಳೊನ್ ಆಯ್ಲಾಂ. ತೆಂ ಸಮ ಸಾಂಗ್ಚೆಂ ಜಾಲ್ಯಾರ್ ಅಶೆಂ: ತುಮ್ಚೇ ಮಧೆಂ ಎಕ್ಲೊ ‘ಆಪುಣ್ ಪಾವ್ಲಾಚೊ’. ಅನ್ಯೆಕ್ಲೊ ‘ಆಪುಣ್ ಆಪೊಲ್ಲೊಚೊ’, ತಿಸ್ರೊ ಎಕ್ಲೊ ‘ಆಪುಣ್ ಕೇಪಾಸಾಚೊ’ ಆನಿ ಚೊವ್ತೊ ‘ಆಪುಣ್ ಕ್ರಿಸ್ತಾಚೊ’ ಮ್ಹಣ್ತಾ. ಕ್ರಿಸ್ತಾಚೆ ಕಿತೆಂ ವಾಂಟೆ ಜಾಲ್ಯಾತ್? ವಾ ಕಾಂಯ್ ಪಾವ್ಲಾಕ್ ತುಮ್ಚೇ ಪಾಸತ್ ಖುರ್ಸಾರ್ ಖಿಳಾಯ್ಲ್ಲೊ? ವಾ ಪಾವ್ಲಾಚ್ಯಾ ನಾಂವಾನ್ ತುಮ್ಕಾಂ ಪವಿತ್ರ್ ಸ್ನಾನ್ ದಿಲ್ಲೆಂ? ಪವಿತ್ರ್ಸ್ನಾನ್ ದಿಂವ್ಕ್ ಮ್ಹಣ್ ಕಾಂಯ್ ಕ್ರಿಸ್ತಾನ್ ಮ್ಹಾಕಾ ಧಾಡ್ಲಲೊ ನ್ಹಯ್; ಮ್ಹಾಕಾ ಧಾಡ್ಲಲೊ ಸುವಾರ್ತಾ ಪರ್ಗಟ್ ಕರುಂಕ್. ತೆಂಯೀ ಕ್ರಿಸ್ತಾಚ್ಯಾ ಖುರ್ಸಾಚೆಂ ಬಳ್ ನಪಂಯ್ಚ್ ಜಾಯ್ನಾಶೆಂ ಮನ್ಶಾಂಚ್ಯಾ ಜಾಣ್ವಾಯೆಚ್ಯಾ ಉತ್ರಾಂವಿಣೆಂ ತಿ ಪರ್ಗಟ್ ಕರುಂಕ್ ಮ್ಹಾಕಾ ಧಾಡ್ಲಾ.

3 January

ಜನೆರ್ 25 - ಸಾಧ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ - ಸುವಾರ್ತಾ

ಮಾತೆವ್ 4:12-23 ಜುವಾಂವ್ಕ್ ಧರ್ನ್ ಬಂದೆಂತ್ ಘಾಲಾ ಮ್ಹಳ್ಳಿ ಖಬರ್ ಆಯ್ಕಲ್ಲ್ಯಾ ಉಪ್ರಾಂತ್ ಜೆಜು ಗಾಲಿಲೆಯಾಕ್ ಗೆಲೊ. ತೊ ನಜರೆತಾಂತ್ ರಾವ್ಲೊನಾ. ಬಗರ್ ಜಾಬುಲೂನ್ ಆನಿ ನಾಫ್ತಲಿಚೇ ಗಡಿ ಭಿತರ್ ಗಾಲಿಲೆಯಾ ಸರೋವರಾಚೆ ವೆಳೇರ್ ಆಸ್ಲಲ್ಯಾ ಕಫಾರ್ನಂವ್ ಶಹರಾಂತ್ ವಚುನ್ ರಾವ್ಲೊ. ಅಶೆಂ ಜ್ಯಾರಿ ಜಾಲೆಂ ಇಸಾಯಿಯಾ ಪ್ರವಾದ್ಯಾನ್ ಮ್ಹಳ್ಳೆಂ ತೆಂ: “ಜಾಬುಲೂನಾಚೊ ಆನಿ ನಾಫ್ತಲಿಚೊ ಗಾಂವ್, ದರ್ಯಾಕ್ ವೆಚೇ ವಾಟೇ ಸಾಮ್ಖಾಚೆ ಆನಿ ಯೊರ್ದಾನ್ ಪಲ್ತಡಿಚೆ ಗಾಂವ್, ಅನ್ಭಾವಾಥ್ರ್ಯಾಚೆಂ ಗಾಲಿಲೆಯಾ! ಕಾಳೊಕಾಂತ್ ಜಿಯೆಲ್ಲ್ಯಾ ಲೊಕಾನ್ ದೆಖ್ಲೊ ಏಕ್ ವ್ಹಡ್ ಉಜ್ವಾಡ್; ಮರಣಾಚಿ ಸಾವ್ಳಿ ಪಡ್ಲ್ಲ್ಯಾ ಗಾಂವಾಂತ್ ಜಿಯೆಲ್ಲ್ಯಾಂಚೆರ್ ಉದೆಲೊ ಏಕ್ ಪ್ರಕಾಸ್.” ತವಳ್ ಥಾವ್ನ್ ಜೆಜು ಅಶೆಂ ಪ್ರಸಂಗ್ ಕರುಂಕ್ ಲಾಗ್ಲೊ: “ಪಾತ್ಕಿ ಜಿಣಿ ಬದಲಾ; ಕಿತ್ಯಾಕ್ ಸರ್ಗಿಂಚೆಂ ರಾಜ್ಯ್ ಲಾಗಿಂ ಪಾವ್ಲಾಂ.” ಏಕ್ ದೀಸ್ ಜೆಜು ಗಾಲಿಲೆಯಾ ಸರೋವರಾಚೇ ವೆಳೆನ್ ಪಾಶಾರ್ ಜಾತಾನಾ ದೋಗ್ ಭಾವಾಂಕ್ - ಪೆದ್ರು ಮ್ಹಣ್ತಾತ್ ತ್ಯಾ ಸಿಮಾಂವ್ಕ್ ಆನಿ ತಾಚ್ಯಾ ಭಾವಾ ಆಂದ್ರೆಕ್ - ತಾಣೆಂ ದೆಖ್ಲೆ. ಸರೋವರಾಂತ್ ತೆ ಜಾಳ್ ಉಡಯ್ತಾಲೆ; ಕಿತ್ಯಾಕ್ ತೆ ಪಾಗಿ ಜಾವ್ನಾಸ್ಲೆ. ಆನಿ ತಾಣೆಂ ತಾಂಕಾಂ ಮ್ಹಳೆಂ : “ಯೆಯಾ ಮ್ಹಜ್ಯಾ ಪಾಟ್ಲ್ಯಾನ್ ಆನಿ ಹಾಂವ್ ತುಮ್ಕಾಂ ಮನ್ಶಾಂಚೆ ಪಾಗಿ ಕರ್ತಲೊಂ.” ತಕ್ಷಣ್ಚ್ ಆಪ್ಲಿಂ ಜಾಳಾಂ ಸೊಡ್ನ್ ತೆ ತಾಚ್ಯಾ ಪಾಟ್ಲ್ಯಾನ್ ಗೆಲೆ. ಥಂಯ್ ಥಾವ್ನ್ ಮುಖಾರ್ ವೆತಾನಾ ತಾಕಾ ದಿಸ್ಲೆ ಆನಿಕ್ ದುಸ್ರೆ ದೋಗ್ ಭಾಭಾವ್ - ಜಾಕೊಬ್ ಆನಿ ಜುವಾಂವ್, ಜೆಬೆದೆವಾಚೆ ಪೂತ್. ಆಪ್ಲ್ಯಾ ಬಾಪಾಯ್ ಜೆಬೆದೆವಾ ಸಾಂಗಾತಾ ಎಕ್ ಮಚ್ವ್ಯಾರ್ ತೆ ಆಪ್ಲಿಂ ಜಾಳಾಂ ಸಮ ಕರ್ತಾಲೆ. ತಾಂಕಾಂ ತಾಣೆಂ ಆಪಯ್ಲೆ. ತಕ್ಷಣ್ಚ್ ಮಚ್ವೊ ಆನಿ ಆಪ್ಲ್ಯಾ ಬಾಪಾಯ್ಕ್ ಸಾಂಡುನ್ ತೆ ತಾಚ್ಯಾ ಪಾಟ್ಲ್ಯಾನ್ ಗೆಲೆ. ಉಪ್ರಾಂತ್ ಜೆಜು ತಾಂಚ್ಯಾ ಸಿನಾಗೊಗಾಂನಿ ಶಿಕಯ್ತ್, ರಾಜ್ಯಾಚಿ ಬರಿ ಖಬರ್ ಗಾಜಯ್ತ್ ಆನಿ ಲೊಕಾ ಮಧ್ಲಿ ಸರ್ವ್ ಥರಾಂಚಿ ಪಿಡಾಶಿಡಾ ಗೂಣ್ ಕರಿತ್ ಆಖ್ಯಾ ಗಾಲಿಲೆಯಾಂತ್ಲ್ಯಾನ್ ಭೊಂವ್ಲೊ.

3 January

ಜನೆರ್ 18 - ಸಾಧ್ಯಾ ಕಾಳಾಚೊ ದುಸ್ರೊ ಆಯ್ತಾರ್ - ಪಯ್ಲೆಂ ವಾಚಪ್

ಇಸಾ.49:3,5-6 ಸರ್ವೆಸ್ಪರಾನ್ ಮ್ಹಾಕಾ ಮ್ಹಳೆಂ: “ಇಸ್ರಾಯೆಲಾ, ತುಂ ಮ್ಹಜೊ ಸೆವಕ್, ತುಜೆ ಉದೆಶಿಂ ಹಾಂವ್ ಮ್ಹಜಿ ಮಹಿಮಾ ದಾಕಯ್ತಲೊಂ.” ಪೂಣ್ ಆತಾಂ ಸರ್ವೆಸ್ಪರ್ ಉಲಯ್ಲಾ; ಜಾಕೊಬಾಕ್ ತಾಚೆಶಿಂ ಪರ್ತುನ್ ಹಾಡುಂಕ್, ಇಸ್ರಾಯೆಲ್ ಪರ್ಜೆಕ್ ತಾಚೆ ಪಾಸತ್ ಎಕ್ಟಾಂಯ್ ಕರುಂಕ್ ತಾಣೆಂಚ್ ಮ್ಹಾಕಾ ಮ್ಹಜೆ ಆವಯ್ಚ್ಯಾ ಕುಸ್ವ್ಯಾಂತ್ ಆಕಾರ್ಲ್ಲೊ. ಸರ್ವೆಸ್ಪರಾಚ್ಯಾ ದೊಳ್ಯಾಂ ಮುಕಾರ್ ಮ್ಹಾಕಾ ಮಾನ್ ಮೆಳ್ಳೊ ಆನಿ ಮ್ಹಜೊ ದೇವ್ಚ್ ಆತಾಂ ಮ್ಹಜೆಂ ಬಳ್. ತಾಣೆಂ ಮ್ಹಳೆಂ: “ಫಕತ್ ಜಾಕೊಬಾಚ್ಯಾ ಕುಳಿಯಾಂಕ್ ಪರ್ತುನ್ ಉದ್ಧಾರ್ ಕರುಂಕ್ ಆನಿ ಇಸ್ರಾಯೆಲಾಚ್ಯಾ ಉರ್ಲಲ್ಯಾ ಲೊಕಾಕ್ ಪಾಟಿಂ ಹಾಡುಂಕ್ ತುವೆಂ ಮ್ಹಜೊ ಸೆವಕ್ ಜಾಲ್ಯಾರ್ ಪಾವನಾ; ಮ್ಹಜಿ ಸೊಡ್ವಣ್ ಪೃಥ್ವೆಚ್ಯಾ ಶಿಮಾಂ ಪರ್ಯಾಂತ್ ಪಾಂವ್ಚೆ ಖಾತಿರ್ ಹಾಂವ್ ತುಕಾ ರಾಷ್ಟ್ರಾಂಚೊ ಉಜ್ವಾಡ್ ಕರ್ತಲೊಂ.”

3 January

ಜನೆರ್ 18 - ಸಾಧ್ಯಾ ಕಾಳಾಚೊ ದುಸ್ರೊ ಆಯ್ತಾರ್ – ಕೀರ್ತನ್

ಕೀ.39 ಅಂತರ್ ಗೀತ್ ಶ್ಲೋಕ್ : ಅಬ್ಳೆ, ತುಜಿ ಖುಶಿ ಕರುಂಕ್ ಹಾಂವ್ ಯೆತಾಂ, ಸರ್ವೆಸ್ಪರಾ. 1. ಆಶೆವ್ನ್, ಆಶೆವ್ನ್ ಸರ್ವೆಸ್ಪರಾಚಿ ವಾಟ್ ಹಾಂವ್ ಪಳೆತಾಲೊಂ, ತಾಣೆಂ ಮ್ಹಜೆರ್ ಬಾಗ್ವೊನ್ ದೀಷ್ಟ್ ಘಾಲಿ, ಮ್ಹಜ್ಯಾ ಉಲ್ಯಾಕ್ ಕಾನ್ ದಿಲೆ. ಏಕ್ ನವೆಂ ಗೀತ್ ತಾಣೆಂ ಮ್ಹಜ್ಯಾ ತೊಂಡಾಂತ್ ಘಾಲಾಂ, ಆಮ್ಚ್ಯಾ ದೆವಾಚೆಂ ಕೀರ್ತನ್ ತೆಂ. 2. ಯಜ್ಞ್ ಆನಿ ಭೆಟೊವ್ಣ್ಯೊ ತುಕಾ ನಾಕಾ ಜಾಲಿ, ಪುಣ್ ತುಜ್ಯಾ ಉತ್ರಾಕ್ ಮ್ಹಜೆ ಕಾನ್ ಉಗ್ತೆ ಕೆಲೆಯ್. ಹೋಮ್ ಆನಿ ದೋಶ್ ಪರಿಹಾರ್ ಬಲಿಯೋ ತುವೆಂ ಮಾಗುಂಕ್ ನಾಂಯ್, ತೆದ್ನಾ “ಅಬ್ಳೆ, ಹಾಂವ್ ಯೆತಾಂ!” ಮ್ಹಳೆಂ ಹಾಂವೆಂ. 3. ಶಾಸ್ತ್ರಾಚ್ಯಾ ಗ್ರಂಥ್ -ಕೊವ್ಳ್ಯಾಂತ್ ಮ್ಹಜ್ಯೆ ವಿಶಿಂ ಸಾಂಗ್ಲಲೆಂ ಆಸಾ: “ದೆವಾ ಮ್ಹಜ್ಯಾ, ತುಜಿ ಖುಶಿ ಕರುಂಕ್ ಮ್ಹಾಕಾ ಸಂತೊಸ್; ತುಜೆಂ ಧರ್ಮ್ಶಾಸ್ತ್ರ್ ಮ್ಹಜ್ಯಾ ಅಂತಸ್ಕರ್ನಾಂತ್ ರೊಂಬುನ್ ಆಸಾ.” 4. ತುಜ್ಯೆ ಸೊಡ್ವಣೆಚಿ ಬರಿ ಖಬರ್ ವ್ಹಡ್ಲ್ಯೆ ಸಭೆಂತ್ ಹಾಂವೆಂ ಪರ್ಗಟ್ ಕೆಲ್ಯಾ. ಮ್ಹಜೆಂ ತೊಂಡ್ ಹಾಂವ್ ಧಾಂಪುನ್ ದವರ್ಚೊ ನಾಂ- ಹೆಂ ತುಂ ಬರೊ ಜಾಣಾಯ್, ಸರ್ವೆಸ್ಪರಾ.

3 January

ಜನೆರ್ 18 - ಸಾಧ್ಯಾ ಕಾಳಾಚೊ ದುಸ್ರೊ ಆಯ್ತಾರ್ – ದುಸ್ರೆಂ ವಾಚಪ್

1 ಕೊರಿಂಥ್ 1:1-3 ದೆವಾಚೆ ಖುಶೆ ಪರ್ಮಾಣೆಂ ಜೆಜು ಕ್ರಿಸ್ತಾಚೊ ಧರ್ಮ್ದೂತ್ ಜಾಂವ್ಕ್ ಆಪಯ್ಲಾ ತ್ಯಾ ಪಾವ್ಲಾನ್ ಆನಿ ಆಮ್ಚ್ಯಾ ಭಾವಾ ಸೊಸ್ತೆನಿಸಾನ್ ಕೊರಿಂಥಾಂತ್ ಆಸ್ಲಲೇ ದೆವಾಚೇ ಪವಿತ್ರ್ ಸಭೆಕ್, ಮ್ಹಣ್ಜೆ ಜೆಜು ಸವೆಂ ಪವಿತ್ರ್ ಜಾಲ್ಲ್ಯಾಂಕ್ ಆನಿ ಸರ್ವ್ ಸುವಾತಾಂನಿ ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚೆಂ - ತಾಂಚ್ಯಾ ಆನಿ ಆಮ್ಚ್ಯಾ ಧನಿಯಾಚೆಂ - ನಾಂವ್ ಉಲೊ ಮಾರ್ತಲ್ಯಾಂ ಸಕ್ಟಾಂ ಸಾಂಗಾತಾ ಆಪ್ಣಾಚೊ ಲೋಕ್ ಜಾಂವ್ಕ್ ಆಪಯ್ಲ್ಯಾಂತ್ ತಾಂಕಾಂ ಬರೊವ್ಚೆಂ. ದೆವಾ ಆಮ್ಚ್ಯಾ ಬಾಪಾಚಿ ಆನಿ ಸೊಮಿಯಾ ಜೆಜು ಕ್ರಿಸ್ತಾಚಿ ಕುರ್ಪಾ ಆನಿ ಶಾಂತಿ ತುಮ್ಕಾಂ ಲಾಭೊಂ.

3 January

ಜನೆರ್ 18 - ಸಾಧ್ಯಾ ಕಾಳಾಚೊ ದುಸ್ರೊ ಆಯ್ತಾರ್ - ಸುವಾರ್ತಾ

ಜುವಾಂವ್ 1:29-34 ದುಸ್ರ್ಯಾ ದಿಸಾ ಆಪ್ಣಾ ಸರ್ಶಿಂ ಯೆತಲ್ಯಾ ಜೆಜುಕ್ ಪಳೆವ್ನ್ ಜುವಾಂವ್ನ್ ಮ್ಹಳೆಂ: “ಪಳೆಯಾ ದೆವಾಚಿ ಶೆಳಿ, ಸಂಸಾರಾಚೆಂ ಪಾಪ್ ಕಾಡ್ತಾ ತಿ! ‘ಮ್ಹಜೇ ಉಪ್ರಾಂತ್ ಯೆತಾ ಎಕ್ಲೊ. ತೊ ಮ್ಹಜೇ ಆದಿಂ ಆಸ್ಲಲೊ ಜಾಲ್ಲ್ಯಾನ್, ತೊ ಮ್ಹಜೇ ಪ್ರಾಸ್ ಪಯ್ಲೆಂ ಸ್ಥಾನ್ ಘೆತಾ’ ಮ್ಹಣ್ ಹಾಂವೆಂ ಮ್ಹಳ್ಳೆಂ ತೆಂ ಹಾಚೇಚ್ ವಿಶ್ಯಾಂತ್. ತೊ ಕೊಣ್ ಮ್ಹಣ್ ಹಾಂವ್ಚ್ ನೆಣಾಸ್ಲೊಂ. ಪುಣ್ ತಾಕಾ ಇಸ್ರಾಯೆಲಾಕ್ ಉಗ್ಡಾಪೊ ಕರ್ಚೇ ಖಾತಿರ್ ಉದ್ಕಾನ್ ಸ್ನಾನ್ ದಿಂವ್ಕ್ ಹಾಂವ್ ಆಯ್ಲಾಂ.” ಆನಿ ಉಪ್ರಾಂತ್ಯೀ ಸಾಕ್ಸ್ ದೀವ್ನ್ ತೊ ಮ್ಹಣಾಲೊ: “ಪವಿತ್ರ್ ಆತ್ಮೊ ಪಾವ್ರ್ಯಾಚ್ಯಾ ರುಪಾರ್ ಸರ್ಗಿಂ ಥಾವ್ನ್ ದೆಂವ್ಲಲೊ ಆನಿ ತಾಚೇ ವಯ್ರ್ ರಾವ್ಲಲೊ ಹಾಂವೆಂ ದೆಖ್ಲೊ. ತೊ ಕೊಣ್ ಮ್ಹಣ್ ಹಾಂವ್ ನೆಣಾಸ್ಲೊಂ. ಪುಣ್ ‘ಜಾಚೆರ್ ಪವಿತ್ರ್ ಆತ್ಮೊ ದೆಂವ್ಲಲೊ ಆನಿ ರಾವ್ಲಲೊ ತುಂ ದೆಖ್ತಲೊಯ್, ತೊಚ್ ಪವಿತ್ರ್ ಆತ್ಮ್ಯಾನ್ ಸ್ನಾನ್ ದಿತಾ ತೊ;’ ಮ್ಹಣ್ ಮ್ಹಾಕಾ ಉದ್ಕಾನ್ ಸ್ನಾನ್ ದಿಂವ್ಕ್ ಧಾಡ್ಲಲ್ಯಾನ್ ಮ್ಹಾಕಾ ಸಾಂಗ್ಲೆಂ. ಹಾಂವೆಂ ತೆಂ ದೆಖ್ಲೆಂ; ಆನಿ ಹೊಚ್ ದೆವಾಚೊ ಪೂತ್ ಮ್ಹಣ್ ಹಾಂವ್ ಸಾಕ್ಸ್ ದಿತಾಂ.

3 January

ಜನೆರ್ 11, 2026 - ಸೊಮ್ಯಾ ಜೆಜುಚ್ಯಾ ಸ್ನಾನಾಚಿ ಪರಬ್ - ಪಯ್ಲೆಂ ವಾಚಪ್

ಇಸಾ.42:1-4,6-7 ಪಳೆಯಾ, ಹೊ ಮ್ಹಜೊ ಸೆವಕ್! ಹಾಂವ್ ತಾಕಾ ಸಾಂಬಾಳುನ್ ಧರ್ತಾಂ; ಹೊ ಮ್ಹಜೊ ವಿಂಚುನ್ ಕಾಡ್ಲಲೊ, ತಾಚೆ ಥಂಯ್ ಮ್ಹಜೊ ಅತ್ಮೊ ಸಂತೊಸ್ತಾ. ತಾಚೆರ್ ಹಾಂವೆಂ ಮ್ಹಜೊ ಅತ್ಮೊ ಘಾಲಾ; ರಾಷ್ಟ್ರಾಂಕ್ ತೊ ನೀತ್ ಹಾಡ್ತಲೊ. ತೊ ಬೋಬ್ ಮಾರ್ಚೊ ನಾ ವಾ ಆಪ್ಲೊ ತಾಳೊ ಉಬಾರ್ಚೊ ನಾ, ರಸ್ತ್ಯಾರ್ ತೊ ಆಪ್ಲೊ ತಾಳೊ ಆಯ್ಕುಂಕ್ ದಿಂವ್ಚೊ ನಾ; ಚೆಂಚ್ಲಲೊ ಚಿವೊ ತೊ ಮೊಡ್ಚೊ ನಾ, ಮಿಣ್ಮಿಣ್ತಿ ವಾತ್ ತೊ ಪಾಲ್ವೊಂವ್ಚೊ ನಾ; ಖರೆಂಚ್ ತೊ ನೀತ್ ಹಾಡ್ತಲೊ. ಪೃಥ್ವೆರ್ ನೀತ್ ಸ್ಥಾಪಿತ್ ಕರಿಸರ್ ತೊ ಥಕ್ಚೊ ನಾ ವಾ ದಮ್ಚೊ ನಾ; ದ್ವೀಪ್ ತಾಚೆ ಶಿಕವ್ಣೆಚಿ ವಾಟ್ ಪಳೆತ್ ಆಸಾತ್. ಹಾಂವೆಂ, ಸರ್ವೆಸ್ಪರಾನ್ ತುಕಾ ನಿತಿ ಪಾಸತ್ ಆಪಯ್ಲಾ, ಹಾಂವೆಂ ತುಜೊ ಹಾತ್ ಧರ್ಲಾ ಆನಿ ತುಕಾ ಆಕಾರ್ಲಾ: ಹಾಂವೆಂ ತುಕಾ ಪರ್ಜೆಚೊ ಕರಾರ್ ಆನಿ ರಾಷ್ಟ್ರಾಂಚೊ ಉಜ್ವಾಡ್ ಕೆಲಾ; ಕುಡ್ರ್ಯಾಂಚೆ ದೊಳೆ ಉಗ್ಡುಂಕ್, ಕಯ್ದ್ಯಾಂಕ್ ಬಂದ್ಖಣಿಂತ್ಲಿ ಸುಟ್ಕಾ ದಿಂವ್ಕ್, ಅಂಧ್ಕಾರಾಂತ್ ಬಸ್ಲಲ್ಯಾಂಕ್ ಕಾಳ್ಕೆ ಖಣಿಂತ್ಲಿಂ ಭಾಯ್ರ್ ಹಾಡುಂಕ್ ಹಾಂವೆಂ ತುಕಾ ನೆಮುನ್ ದವರ್ಲಾ.

3 January

ಜನೆರ್ 11, 2026 - ಸೊಮ್ಯಾ ಜೆಜುಚ್ಯಾ ಸ್ನಾನಾಚಿ ಪರಬ್ – ಕೀರ್ತನ್

ಕೀ.28 ಅಂತರ್ ಗೀತ್ ಶ್ಲೋಕ್ : ಸರ್ವೆಸ್ಪರ್ ಆಪ್ಲ್ಯೆ ಪರ್ಜೆಕ್ ಶಾಂತೆಚೊ ಆಶೀರ್ವಾದ್ ದಿತಾ. 1. ದೆವಾಚ್ಯಾ ಭುಗ್ರ್ಯಾಂನೋ, ಸರ್ವೆಸ್ಪರಾಕ್ ನಾಂವಾಡಾ, ಮಹಿಮಾ ಆನಿ ಪದ್ವಿ ತಾಚಿ ಎಕ್ಲ್ಯಾಚಿಚ್ ಮ್ಹಣ್ ಹರ್ಸಿಯಾ. ತಾಚ್ಯಾ ನಾಂವಾಕ್ ಫಾವೊ ತಿ ಮಹಿಮಾ ದಿಯಾ, ತಾಚ್ಯೆ ಪವಿತ್ರ್ ಸದ್ರ್ಯೆ ಮುಖಾರ್ ಪ್ರಣಿಪಾತ್ ಕರಾ. 2. ಸರ್ವೆಸ್ಪರಾಚೊ ತಾಳೊ ಉದ್ಕಾ ವಯ್ಲ್ಯಾನ್ ಗಾಜ್ತಾ, ಉದ್ಕಾ ರಾಶಿಚೆರ್ ಸರ್ವೆಸ್ಪರ್ ಉಬೊ ಜಾಲಾ. ಸರ್ವೆಸ್ಪರಾಚೊ ತಾಳೊ ನಿಜಾಕ್ಯಿ ಘಣ್ಘಣಿತ್, ವ್ಹಯ್, ಗಂಭೀರಾಯೆನ್ ಗಾಜ್ತಾ ತಾಚೊ ತಾಳೊ! 3. ಮಹಿಮೆಚೊ ದೇವ್ ಘಣ್ಘಣ್ತಾ, ತಾಚ್ಯಾ ಮಂದಿರಾಂತ್ ಸಕ್ಟಾಂಚೊ ಹೊ ಏಕ್ಚ್ ನಾದ್ ಗಾಜ್ತಾ: “ಮಹಿಮಾ!” ಸರ್ವೆಸ್ಪರಾನ್ ದರ್ಯಾ - ಸಾಗೊರಾ ವಯ್ರ್ ಆಪ್ಲೆಂ ಸಿಂಹಾಸನ್ ಮಾಂಡ್ಲಾಂ. ಸಾಸ್ಣಾಕ್ ರಾಜಾ ಕಸೊ ಸರ್ವೆಸ್ಪರ್ ಸಿಂಹಾಸನಾರ್ ಬಸ್ಲಾ.

3 January

ಜನೆರ್ 11, 2026 - ಸೊಮ್ಯಾ ಜೆಜುಚ್ಯಾ ಸ್ನಾನಾಚಿ ಪರಬ್ – ದುಸ್ರೆಂ ವಾಚಪ್

ಧ.ಕೃ.10:34-38 ತವಳ್ ಪೆದ್ರುನ್ ಉಲೊಂವ್ಕ್ ಸುರು ಕೆಲೆಂ: “ದೇವ್ ಪಕ್ಷಪಾತಿ ನ್ಹಯ್ ಮ್ಹಣ್ ಆತಾಂ ಮ್ಹಾಕಾ ಸ್ಪಷ್ಟ್ ಜಾಲೆಂ. ಜೊ ಕೊಣ್ ದೆವಾಕ್ ಭಿಯೆವ್ನ್ ಚಲ್ತಾ ಆನಿ ಸಾರ್ಕೆಂ ತೆಂ ಕರ್ತಾ, ತೊ ಖಂಯ್ಚ್ಯಾ ವಂಶಾಚೊ ಜಾಲ್ಯಾರ್ಯೀ ದೆವಾಕ್ ಮಾನ್ವತಾ. ಸಗ್ಳ್ಯಾ ಮನ್ಶಾಕುಳಾಚೊ ಸೊಮಿ ಮ್ಹಣ್ತಲ್ಯಾ ಜೆಜು ಕ್ರಿಸ್ತಾ ಮಾರಿಫಾತ್ ಶಾಂತಿ ಲಾಭ್ತಾ ಮ್ಹಳ್ಳಿ ಸುವಾರ್ತಾ ದೆವಾನ್ ಕಶೆಂ ಇಸ್ರಾಯೆಲಾಚ್ಯಾ ಭುಗ್ರ್ಯಾಂಕ್ ಪರ್ಗಟ್ ಕೆಲಿ ತೆಂ ತುಮಿ ಜಾಣಾತ್. ಜುವಾಂವ್ನ್ ಸ್ನಾನ್ ಪರ್ಗಟ್ಲೆಂ ತ್ಯಾ ಉಪ್ರಾಂತ್ ಗಾಲಿಲೆಯಾಂತ್ ಸುರು ಜಾವ್ನ್, ಅಖ್ಯಾ ಜುದೇಯಾಂತ್ ಕಿತೆಂ ಘಡ್ಲೆಂ ತೆಂ ತುಮ್ಕಾಂಚ್ ಕಳಿತ್ ಆಸಾ. ದೆವಾನ್ ಕಶೆಂ ನಜರೆತ್ಚ್ಯಾ ಜೆಜುಕ್ ಪವಿತ್ರ್ ಆತ್ಮ್ಯಾನ್ ಆನಿ ಪದ್ವೆನ್ ಮಾಖ್ಲೊ ಹ್ಯಾ ವಿಶ್ಯಾಂತ್ಯೀ ತುಮಿ ಆಯ್ಕಲಾಂ. ತೊ ಸಗ್ಳ್ಯಾನ್ಯೀ ಬರೆಂ ಕರಿತ್ ಆನಿ ದೆಂವ್ಚಾರಾಂಚೇ ಪದ್ವೆಖಾಲ್ ಆಸ್ಲಲ್ಯಾಂಕ್ ಬರಿಂ ಕರಿತ್ ಗೆಲೊ, ಕಿತ್ಯಾಕ್ ದೇವ್ ತಾಚೇ ಸಾಂಗಾತಾ ಆಸ್ಲೊ.

3 January

ಜನೆರ್ 11, 2026 - ಸೊಮ್ಯಾ ಜೆಜುಚ್ಯಾ ಸ್ನಾನಾಚಿ ಪರಬ್ - ಸುವಾರ್ತಾ

ಮಾತೆವ್ 3:13-17 ತವಳ್ ಜೆಜು ಜುವಾಂವ್ ಲಾಗ್ಚೆಂ ಸ್ನಾನ್ ಘೆವ್ಚೇ ಖಾತಿರ್ ಗಾಲಿಲೆಯಾ ಥಾವ್ನ್ ಯೊರ್ದಾನ್ ನ್ಹಂಯ್ ತಡಿಕ್ ಆಯ್ಲೊ. ಪುಣ್ ಜುವಾಂವ್ನ್ ತಾಕಾ ಆಡಾಂವ್ಕ್ ಪಳೆಲೆಂ. “ಹಾಂವೆಂ ತುಜೇಲಾಗ್ಚೆಂ ಸ್ನಾನ್ ಘೆಜಯ್ ಆಸ್ತಾಂ, ತುಂ ಮ್ಹಜೇ ಲಾಗಿಂ ಯೆತಾಯ್?” ಮ್ಹಳೆಂ ತಾಣೆಂ. ಪುಣ್ ಜೆಜುನ್ ತಾಕಾ ಜಾಪ್ ದಿಲಿ: “ಆತಾಂ ಸದ್ದ್ಯಾಕ್ ಹೆಂ ತಶೆಂಚ್ ಆಸುಂ; ಕಿತ್ಯಾಕ್ ಹೇ ವರ್ವಿಂ ದೇವ್ ಖುಶಿ ವ್ಹರ್ತಾ ತೆಂ ಸಕ್ಕಡ್ ಆಮಿ ಜ್ಯಾರಿ ಕರುಂಕ್ ಫಾವೊ.” ತಿತ್ಲ್ಯಾರ್ ಜುವಾಂವ್ ಕಬೂಲ್ ಜಾಲೊ. ಜೆಜು ಸ್ನಾನ್ ಘೆವ್ನ್ ಉದ್ಕಾಂತ್ಲೊ ವಯ್ರ್ ಯೆತಚ್, ಆಕಾಸ್ ಉಗ್ತೊ ಜಾಲೊ ಆನಿ ದೆವಾಚೊ ಪವಿತ್ರ್ ಅತ್ಮೊ ಏಕ್ ಪಾವ್ರ್ಯಾಬರಿ ಯೆವ್ನ್ ಆಪ್ಣಾಚೆರ್ ರಾವ್ಲಲೊ ತಾಣೆಂ ದೆಖ್ಲೊ ಆನಿ ತೆದ್ವಾಂ ಆಕಾಸಾ ಥಾವ್ನ್ ಏಕ್ ತಾಳೊಯೀ ಹೇ ಪರಿಂ ಆಯ್ಕಾಲೊ: “ಹೊ ಮ್ಹಜೊ ಪೂತ್, ಮ್ಹಾಕಾ ಚಡ್ ಮೊಗಾಚೊ; ತೊ ಮ್ಹಾಕಾ ಮಾನ್ವಲಾ.”

3 January

ಜನೆರ್ 4, 2026 - ಜೆಜುಚ್ಯಾ ಆಪ್-ಪರ್ಗಟ್ಣೆಚಿ ದಬಾಜಿಕ್ ಪರಬ್ - ಪಯ್ಲೆಂ ವಾಚಪ್

ಇಸಾ. 60:1-6 ಊಟ್, ಪರ್ಜಳಿತ್ ಜಾ, ತುಜೊ ಉಜ್ವಾಡ್ ಆಯ್ಲಾ, ಸರ್ವೆಸ್ಪರಾಚಿ ಮಹಿಮಾ ತುಜೆರ್ ಪರ್ಜಳ್ತಾ. ಪಳೆ, ಪ್ರಥ್ವೆರ್ ಅಂಧ್ಕಾರ್ ವಿಸ್ತಾರ್ಲಾ, ಆನಿ ರಾಷ್ಟ್ರಾಂಚೆರ್ ಕಾಳೊಕ್. ತರೀ ತುಜೆರ್ ಸರ್ವೆಸ್ಪರ್ ವಯ್ರ್ ಸರ್ತಾ, ತಾಚಿ ಮಹಿಮಾ ತುಜೆರ್ ದಿಷ್ಟಿ ಪಡ್ತಾ. ರಾಷ್ಟ್ರಾಂ ತುಜ್ಯಾ ಉಜ್ವಾಡಾಶಿಂ ಯೆತಾತ್, ಆನಿ ರಾಯ್ ತುಜ್ಯಾ ಉದೆವಾಚ್ಯಾ ಪರ್ಜಳಾಶಿಂ. ತುಜೆ ದೊಳೆ ಉಬಾರ್ ಆನಿ ಭೊಂವ್ತಿಂ ದೀಷ್ಟ್ ಲಾಯ್: ಸಗ್ಳಿಂ ಎಕ್ಟಾಂಯ್ ಜಾವ್ನ್ ತುಜೆಶಿಂ ಯೆತಾತ್, ಪಯ್ಸ್ ಪಯ್ಸ್ ಥಾವ್ನ್ ಯೆತಾತ್ ತುಜೆ ಪೂತ್, ಆನಿ ತುಜ್ಯಾ ಧುವಾಂಕ್ ಹಾಂಡಿರ್ ಬಸೊವ್ನ್ ಹಾಡ್ತಾತ್. ಹೆಂ ಪಳೆವ್ನ್ ತುಂ ಪರ್ಜಳಿತ್ ಜಾತಲಿಯ್, ತುಜೆಂ ಕಾಳಿಜ್ ಉಡ್ತಲೆಂ ಆನಿ ರೂಂದ್ ಜಾತಲೆಂ, ಕಿತ್ಯಾಕ್ ದರ್ಯಾಚಿ ಸಂಪತ್ತಿ ತುಜೆಶಿಂ ವ್ಹಾಳ್ತಲಿ, ರಾಷ್ಟ್ರಾಂಚಿ ಗ್ರೇಸ್ಕಾಯ್ ತುಜೆಶಿಂ ಯೆತಲಿ. ಕರಿಂ ಹಿಂಡಾಂ ಹಿಂಡಾಂನಿ ಯೆವ್ನ್ ತುಜೊ ಗಾಂವ್ ಭರ್ತಲಿಂ, ಮಿದಿಯಾನಾಚಿಂ ಆನಿ ಎಫಾಚಿಂ ತರುಣ್ ಕರಿಂ. ಭಾಂಗಾರ್ ಆನಿ ಧುಂಪ್ ಹಾಡುನ್ ಶೆಬಾ ಥಾವ್ನ್ ಸಗ್ಳಿಂ ಯೆತಲಿಂ ಆನಿ ಸರ್ವೆಸ್ಪರಾಚಿ ಸ್ತುತಿ ಕರ್ತಲಿಂ.

3 January

ಜನೆರ್ 4, 2026 - ಜೆಜುಚ್ಯಾ ಆಪ್-ಪರ್ಗಟ್ಣೆಚಿ ದಬಾಜಿಕ್ ಪರಬ್ – ಕೀರ್ತನ್

ಕೀ.71 ಶ್ಲೋಕ್ : ತುಜ್ಯೆ ಮುಖಾರ್, ಸರ್ವೆಸ್ಪರಾ, ಸರ್ಪಡ್ತಾತ್ ಸರ್ವ್ ರಾಷ್ಟ್ರಾಂ. 1. ದೆವಾ, ನಿತಿವಂತ್ ಫೈಸಲಾಚೆಂ ದೆಣೆಂ ತುಜ್ಯಾ ರಾಯಾಕ್ ಪಾಠಯ್, ರಾಯ್-ಕುಂವರ್ ಜಾವ್ನಾಸ್ಲಲ್ಯಾ ತಾಕಾ ನ್ಯಾಯ್-ನೀತ್ ಕರ್ಚೊ ಅಧಿಕಾರ್ ದಿ. ಅಶೆಂ ತೊ ತುಜ್ಯೆ ಪರ್ಜೆಕ್ ನಿತಿನ್ ಸಾಂಬಾಳುಂ, ದುಬ್ಳ್ಯಾ-ಧಾಕ್ಟ್ಯಾಂಕ್ ನ್ಯಾಯ್-ನಿತಿಖಾಲ್ ಚಲೊವ್ನ್ ವ್ಹರುಂ. 2. ತಾಚ್ಯಾ ದಿಸಾಂನಿ ನ್ಯಾಯ್-ನೀತ್ ವೃದ್ಧಿ ಜಾಂವ್, ಚಂದ್ರಿಮ್ ಆಸಾಸರ್ ಶಾಂತಿ ಶೆಕಾನ್ ಶೆಕ್ ಬಾಳ್ವೊಂ. ತೊ ಎಕಾ ದರ್ಯಾ ಥಾವ್ನ್ ದುಸ್ರ್ಯಾ ದರ್ಯಾ ಪರ್ಯಾನ್ ಯುಪ್ರೆಟೆಸ್ ನ್ಹಂಯೇ ಥಾವ್ನ್ ಪ್ರಿಥುಮೆಚಿ ಅಂತ್ ಪರ್ಯಾನ್ ರಾಜ್ವಟ್ ಚಲೊಂವ್. 3. ತಾರ್ಸಿಸ್ ಗಾಂವಾಚೆ ಆನಿ ದರ್ಯಾ-ಕರಾವಳೆಚೆ ರಾಜಾ ಸುಂಕ್ ಹಾಡ್ನ್ ಯೆತಲೆ, ಶೆಬಾ ಆನಿ ಸೆಬಾ ಗಾಂವಾಂಚೆ ರಾಯ್ಯಿ ಕಾಣಿಕೋ ಘೆವ್ನ್ ಯೆತಲೆ. ವ್ಹಯ್, ಸರ್ವ್ ರಾಜಾ ತಾಚ್ಯೆ ಮುಖಾರ್ ಸರ್ಪಡ್ತಲೆ, ಸರ್ವ್ ಜನಾಂಗಾಂ ತಾಚಿ ಸೆವಾ ಕರ್ತಲಿಂ. 4. ಉಲೊ ಮಾರ್ತಲ್ಯಾ ದುಬ್ಳ್ಯಾ-ಧಾಕ್ಟ್ಯಾಂಕ್, ಆನಿ ಗತ್-ಆಧಾರ್ ನಾತ್ಲಲ್ಯಾಂ ಗರೀಬಾಂಕ್ ತೊ ಪಾವ್ತಲೊ. ಅಸ್ಕತ್ಯಾಂಚೆರ್ ಆನಿ ಗರ್ಜೆವಂತಾಂಚೆರ್ ದಯಾ ದವರ್ನ್ ತಾಂಚೊ ಜೀವ್ ತೊ ರಾಕ್ತಲೊ.

3 January

ಜನೆರ್ 4, 2026 - ಜೆಜುಚ್ಯಾ ಆಪ್-ಪರ್ಗಟ್ಣೆಚಿ ದಬಾಜಿಕ್ ಪರಬ್ – ದುಸ್ರೆಂ ವಾಚಪ್

ಎಫೆಜ್ 3:2-3,5-6 ತುಮ್ಚ್ಯಾ ಹಿತಾ ಪಾಸತ್ ದೆವಾನ್ ಎದಿ ವರ್ತಿ ಜವಾಬ್ದಾರಿ ಮ್ಹಾಕಾ ದಿಲ್ಯಾ ಮ್ಹಣ್ ತುಮಿ ಆಯ್ಕುನ್ ಆಸುಂಯೆತ್. ಹಾಂವೆಂ ಆತಾಂ ಸಂಕ್ಷಿಪ್ತ್ ಥರಾನ್ ಬರಯ್ಲಾಂ ತಶೆಂ ದೆವಾನ್ ಆಪ್ಲಿ ಗುಪಿತ್ ಮಾಂಡಾವಳ್ ಮ್ಹಾಕಾ ಕಳಿತ್ ಕೆಲ್ಯಾ. ಆದ್ಲ್ಯಾ ಕಾಳಾರ್ ಖಂಯ್ಚೇಚ್ ಸಂತತಿಕ್ ಕಳಿತ್ ಕರುಂಕ್ ನಾತ್ಲ್ಲೊ ಹೊ ಗುಟ್, ಹ್ಯಾ ಕಾಳಾರ್ ದೆವಾನ್ ಆಪ್ಲ್ಯಾ ಪ್ರೇರಕ್ ಅತ್ಮ್ಯಾ ಮಾರಿಫತ್ ಭಾಗೆವಂತ್ ಧರ್ಮ್ದುತಾಂಕ್ ಆನಿ ಪ್ರವಾದ್ಯಾಂಕ್ ಉಘಡ್ಲಾ. ಹೊಚ್ ತೊ ಗುಟ್: ಸುವಾರ್ತೇ ಮಾರಿಫತ್ ಜುದೆವಾಂ ಸವೆಂ ಹೆರ್ ಜಾತಿಂಚಿಂಯೀ ದೆವಾಚ್ಯಾ ದಾಯ್ಜಾಚಿಂ ಸಹವಾರಿಸ್ದಾರಾಂ; ತಿಂಯೀ ತೇಚ್ ಆನಿ ಎಕ್ಚ್ ಕುಡಿಚೆ ಸಾಂದೆ; ಕ್ರಿಸ್ತಾ ಜೆಜು ಥಂಯ್ ದೆವಾನ್ ದಿಲ್ಲ್ಯಾ ಭಾಸಾವ್ಣ್ಯಾಂನಿ ತಿಂಯೀ ವಾಂಟೆಲಿ.

3 January

ಜನೆರ್ 4, 2026 - ಜೆಜುಚ್ಯಾ ಆಪ್-ಪರ್ಗಟ್ಣೆಚಿ ದಬಾಜಿಕ್ ಪರಬ್ - ಸುವಾರ್ತಾ

ಮಾತೆವ್ 2:1-12. ಜೆಜು ಜುದೇಯಾ ಪ್ರಾಂತಾಚ್ಯಾ ಬೆತ್ಲೆಹೆಮ್ ಶಹರಾಂತ್ ಜಲ್ಮಲೊ. ತವಳ್ ಹೆರೊದ್ ರಾಜ್ವಟ್ ಚಲಯ್ತಾಲೊ. ಜೆಜು ಜಲ್ಮಲ್ಯಾ ಉಪ್ರಾಂತ್ ಉದೆಂತಿ ಥಾವ್ನ್ ಥೊಡೆ ಜ್ಯೋತಿಶೀ ಜೆರುಜಲೆಮಾಕ್ ಯೇವ್ನ್ ವಿಚಾರುಂಕ್ ಲಾಗ್ಲೆ: “ಜುದೆವಾಂಚೊ ರಾಯ್ ಜಾವ್ಚ್ಯಾಕ್ ಜಲ್ಮಲಾ ತೊ ಭುರ್ಗೊ ಖಂಯ್ ಆಸಾ? ಉದೆಲ್ಲೆಂ ತೆಂ ತಾಚೆಂ ನೆಕೆತ್ರ್ ಆಮಿ ದೆಖ್ಲೆಂ ಆನಿ ಆಮಿ ತಾಕಾ ನಮಸ್ಕಾರ್ ಕರುಂಕ್ ಮ್ಹಣ್ ಆಯ್ಲ್ಯಾಂವ್.” ಹೆಂ ಆಯ್ಕುನ್ ಹೆರೊದ್ ರಾಯ್ ಸಗ್ಳೊ ಘಾಬರ್ಲೊ ಆನಿ ತೇಚ್ ಪರಿಂ ಸಗ್ಳೆಂ ಜೆರುಜಲೆಮ್. ತವಳ್ ಹೆರೊದಿನ್ ಪ್ರಮುಖ್ ಯಾಜಕಾಂಕ್ ಆನಿ ಲೊಕಾಚ್ಯಾ ಶಾಸ್ತ್ರ್ಯಾಂಕ್ ಸಾಂಗಾತಾ ಆಪಯ್ಲೆ ಆನಿ ಕ್ರೀಸ್ತ್ ಖಂಯ್ ಜಲ್ಮುಂಚೊ ಆಸ್ಲೊ ತೇ ವಿಶಿಂ ತಾಂಚೇಲಾಗಿಂ ವಿಚಾರ್ ಕೆಲೊ. ತಾಂಣಿಂ ಸಾಂಗ್ಲೆಂ “ಜುದೇಯಾಚ್ಯಾ ಬೆತ್ಲೆಹೆಮ್ ಶಹರಾಂತ್, ಕಿತ್ಯಾಕ್ ಪ್ರವಾದ್ಯಾನ್ ಅಶೆಂ ಬರಯ್ಲ್ಲೆಂ ಆಸಾ: ‘ಆನಿ ತುಂ, ಜುದಾ ಪ್ರಾಂತಾಚ್ಯಾ ಬೆತ್ಲೆಹೆಮಾ, ಜುದಾಚ್ಯಾ ಮುಖೆಲ್ಯಾಂ ಮಧೆಂ ತುಂ ಬಿಲ್ಕುಲ್ ಅತೀ ಲ್ಹಾನ್ ನ್ಹಯ್; ಕಾರಣ್ ತುಜೇ ಥಾವ್ನ್ ಉಬ್ಜತಲೊ ಏಕ್ ಫುಡಾರಿ, ಇಸ್ರಾಯೆಲಾಕ್, ಮ್ಹಜೇ ಪರ್ಜೆಕ್, ಚಲಯ್ತಲೊ ಗೊವ್ಳಿ.” ತವಳ್ ಹೆರೊದಿನ್ ತ್ಯಾ ಜ್ಯೋತಿಶ್ಯಾಂಕ್ ಕುಶಿನ್ ಆಪಯ್ಲೆ ಆನಿ ತೆಂ ನೆಕೆತ್ರ್ ತಾಂಕಾಂ ದಿಷ್ಟಿ ಪಡ್ಲ್ಲಿ ವೇಳ್ಘಡಿ ತಾಂಚೇ ಥಾವ್ನ್ ಸಮ್ಜುನ್ ಘೆತ್ಲಿ. ಉಪ್ರಾಂತ್ ತಾಣೆಂ ತಾಂಕಾಂ ಬೆತ್ಲೆಹೆಮಾಕ್ ಧಾಡ್ಲೆ ಮ್ಹಣುನ್ : “ವಚಾ ಆನಿ ಬಾಳ್ಕಾಚಿ ಚತ್ರಾಯೆನ್ ಸೊಧ್ನಾ ಕರಾ, ತೊ ತುಮ್ಕಾಂ ಮೆಳ್ತಚ್ ಹಾಂಗಾ ಯೇವ್ನ್ ಮ್ಹಾಕಾ ಖಬರ್ ದಿಯಾ; ಹಾಂವೆಂಯೀ ವಚುನ್ ತಾಕಾ ನಮಸ್ಕಾರ್ ಕರಿಜಯ್.” ರಾಯಾಚೆಂ ಉತರ್ ಆಯ್ಕುನ್ ತೆ ಭಾಯ್ರ್ ಸರ್ನ್ ಗೆಲೆ. ತೆದ್ವಾಂ, ಉದೆತಾನಾ ತಾಂಣಿಂ ಪಳೆಲ್ಲೆಂ ನೆಕೆತ್ರ್ ಪತ್ರ್ಯಾನ್ ತಾಂಚೇ ಮುಖ್ಲ್ಯಾನ್ ವೆತಾಲೆಂ ತೆಂ ಆನಿ ಶೆಕಿಂ ಬಾಳಕ್ ಆಸ್ಲೊ ತ್ಯಾ ಜಾಗ್ಯಾ ವಯ್ರ್ ವಚುನ್ ರಾವ್ಲೆಂ ತೆಂ ತಾಂಕಾಂ ದಿಸ್ಲೆಂ. ನೆಕೆತ್ರ್ ಪಳೆವ್ನ್ ತೆ ಭೋವ್ ಚಡ್ ಸಂತೊಸ್ ಪಾವ್ಲೆ. ಥಂಯ್ ಘರಾಂತ್ ಭಿತರ್ ಸರುನ್ ತಾಂಣಿಂ ಬಾಳ್ಕಾಕ್ ತಾಚೇ ಆವಯ್ ಮರಿಯೇ ಸಾಂಗಾತಾ ದೆಖ್ಲೊ ಆನಿ ಸರ್ಪಡೊನ್ ತಾಕಾ ನಮಸ್ಕಾರ್ ಕೆಲೊ. ಉಪ್ರಾಂತ್ ಆಪ್ಲಿಂ ದಿವ್ರ್ಯಾಂಚಿಂ ಚಿಲಾಂ ಉಗ್ತಿಂ ಕರ್ನ್ ತಾಂಣಿಂ ತಾಕಾ ಅರ್ಪಿಲ್ಯೊ ಕಾಣಿಕೋ : ಭಾಂಗಾರ್, ಧುಂಪ್ ಆನಿ ರಗ್ತಾಬೋಳ್. ಪುಣ್ ಹೆರೊದಿ ಸರ್ಶಿಂ ತಾಂಣಿಂ ಪಾಟಿಂ ವಚನಯೆ ಮ್ಹಣ್ ದೆವಾನ್ ತಾಂಕಾಂ ಸೊಪ್ಣಾಂತ್ ತಾಕಿದ್ ದಿಲ್ಲ್ಯಾನ್, ದುಸ್ರಿಚ್ ವಾಟ್ ಧರ್ನ್ ಆಪ್ಲ್ಯಾ ಗಾಂವಾಕ್ ತೆ ಪಾಟಿಂ ಗೆಲೆ.

24 November

ದಸೆಂಬರ್ 29 - ಭಾಗೆವಂತ್ ಕುಟ್ಮಾಚಿ ಪರಬ್ - ಪಯ್ಲೆಂ ವಾಚಪ್

ಸಿರಾ.3:3-7,14-17 ಭುಗ್ರ್ಯಾಂನಿ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿಂವ್ಕ್ ಜಾಯ್ ಮ್ಹಣ್ ಸರ್ವೆಸ್ಪರಾನ್ ಆದೇಶ್ ದಿಲಾ, ಆನಿ ಪುತಾಂನಿ ಆಪ್ಲೆ ಆವಯ್ಚಿಂ ಹಕ್ಕಾಂ ಮಾನುನ್ ಘೆಂವ್ಕ್ ಜಾಯ್ ಮ್ಹಣ್ ಥಾರಾಯ್ಲಾಂ. ಜೊ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿತಾ, ತೊ ಆಪ್ಲ್ಯಾ ಪಾತ್ಕಾಂಚೆಂ ಫಾರಿಕ್ಪಣ್ ದಿತಾ; ಜೊ ಆಪ್ಲೆ ಆವಯ್ಕ್ ಮಾನ್ ದಿತಾ, ತೊ ದಿರ್ವೆಂ ಜಮಯ್ತಲ್ಯಾ ಮನ್ಶಾ ಪರಿಂ. ಜೊ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿತಾ, ತಾಕಾ ತಾಚ್ಯಾ ಖಾಶಾ ಭುಗ್ರ್ಯಾಂ ಉದೆಶಿಂ ಸಂತೊಸ್ ಮೆಳ್ತಲೊ, ಆನಿ ತೊ ಪ್ರಾರ್ಥನ್ ಕರ್ತಲೊ ತೆದ್ನಾ ದೇವ್ ತೆಂ ಆಯ್ಕತಲೊ. ಜೊ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿತಾ, ತಾಕಾ ಲಾಂಬ್ ಆವ್ಕ್ ಮೆಳ್ತಲೆಂ, ಜೊ ಸರ್ವೆಸ್ಪರಾಕ್ ವಿದೇಯ್ ಜಾವ್ನ್ ಚಲ್ತಾ, ತೊ ಆಪ್ಲೆ ಆವಯ್ಕ್ ಸಂತೊಸ್ಭರಿತ್ ಕರ್ತಾ, ಮ್ಹಜ್ಯಾ ಪುತಾ, ತುಜ್ಯಾ ಬಾಪಾಯ್ಚೆ ಉತಾರ್ ಪ್ರಾಯೆರ್ ತಾಚೊ ಸಾಂಬಾಳ್ ಕರ್, ತೊ ವಾಂಚ ಪರ್ಯಾಂತ್ ತಾಕಾ ದೂಖ್ ದಿನಾಕಾ. ತಾಚೆಂ ಗಿನ್ಯಾನ್ ಅಸ್ಕತ್ ಜಾಯ್ತ್ ಜಾಲ್ಯಾರ್ಯಿ, ತುಂ ತಾಕಾ ಸೊಸ್ಣಿಕಾಯೆನ್ ಸಮ್ಜುನ್ ಘೆ; ತುಕಾ ಭಲಾಯ್ಕಿ ಆನಿ ಘಟಾಯ್ ಆಸಾ ಮ್ಹಣ್ ತಾಚಿ ಬೆಪರ್ವಾ ಕರಿನಾಕಾ, ಕಿತ್ಯಾಕ್ ಬಾಪಾಯ್ಕ್ ದಾಕಯ್ಲ್ಲೊ ಮಯ್ಪಾಸ್ ಕೆದಿಂಚ್ ವಿಸ್ರೊನ್ ವೆಚೊ ನಾ, ಬಗರ್ ತುಜ್ಯಾ ಪಾತ್ಕಾಂಚೆಂ ಫಾರಿಕ್ಪಣ್ ದಿಂವ್ಕ್ ತೊ ಉಪ್ಕಾರಾಕ್ ಪಡ್ತಲೊ.

24 November

ದಸೆಂಬರ್ 29 - ಭಾಗೆವಂತ್ ಕುಟ್ಮಾಚಿ ಪರಬ್ – ಕೀರ್ತನ್

ಕೀ.127 ಶ್ಲೋಕ್: ಸೊಮಿಯಾಕ್ ಭಿಯೆತಾತ್ ಆನಿ ತಾಚ್ಯೆ ವಾಟೆನ್ ಚಲ್ತಾತ್ ತಿಂ ಸುಭಾಗಿ! 1. ಸೊಮಿಯಾಕ್ ಭಿಯೆತಾತ್ ಆನಿ ತಾಚ್ಯೆ ವಾಟೆನ್ ಚಲ್ತಾತ್ ತಿಂ ಸುಭಾಗಿ! ತುಜ್ಯಾ ಹಾತಾಂಚ್ಯಾ ಕಷ್ಟಾಂಚೆಂ ತುಕಾ ಖಾಂವ್ಕ್ ಮೆಳ್ತಲೆಂ, ತುಂ ಸುಖೆಸ್ತ್ ಆನಿ ತುಜೆಂ ಸಗ್ಳೆಂ ನಂದನ್ ಜಾತಲೆಂ. 2. ತುಜ್ಯಾ ಘರಾಚ್ಯಾ ಭಿತರ್ಲ್ಯಾ ಕುಡಾಂತ್ ತುಜಿ ಪತಿಣ್ ಫಳದಾಯೆಕ್ ದಾಕ್ವಾಲಿಬರಿ ಆಸ್ತಲಿ, ತುಜಿಂ ಭುರ್ಗಿಂ ತುಜ್ಯಾ ಮೆಜಾ ಭೊಂವ್ತಿಂ ಜೈತುನಾಚ್ಯಾ ಕೊಂಬ್ರ್ಯಾಂ ಸಾರ್ಕಿಂ ವಸ್ತಲಿಂ. 3. ಸರ್ವೆಸ್ಪರಾಚಿ ಭೈಂ-ಭಿರಾಂತ್ ಆಸ್ಲಲ್ಯಾಕ್ ಆಸಲೆಂ ಭಾಗ್ ಫಾವೊ ಜಾತಲೆಂ. ಸಿಯೊನಾಂತ್ಲೊ ಸರ್ವೆಸ್ಪರ್ ತುಜೆರ್ ಆಶೀರ್ವಾದ್ ಘಾಲುಂ! ಸಗ್ಳ್ಯಾ ತುಜ್ಯಾ ಜಿವಿತಾಂತ್ ಜೆರುಜಲೆಮಾಚೆಂ ಸುಭಾಮ್ಪಣ್ ಪಳೆಂವ್ಕ್ ತುಕಾ ಫಾವೊ ಜಾಂವ್!

24 November

ದಸೆಂಬರ್ 29 - ಭಾಗೆವಂತ್ ಕುಟ್ಮಾಚಿ ಪರಬ್ – ದುಸ್ರೆಂ ವಾಚಪ್

ಕೊಲೊಸ್ಸೆ. 3:12-21 ದೆವಾನ್ ವಿಂಚುನ್ ಕಾಡ್ಲಲಿಂ ತುಮಿ, ಪವಿತ್ರ್ ಆನಿ ತಾಕಾ ಮೊಗಾಚಿಂ. ದೆಕುನ್ ಕಣ್ವಾಳಾಯೆಚೆಂ, ದಯಾಳಾಯೆಚೆಂ, ದೀನ್ಪಣಾಚೆಂ, ಮೊವಾಳಾಯೆಚೆಂ ಆನಿ ಸೊಸ್ಣಿಕಾಯೆಚೆಂ ಕಾಳಿಜ್ ತುಮ್ಕಾಂ ಆಸುಂಕ್ಜಾಯ್. ಎಕಾಮೆಕಾಕ್ ಸೊಸುನ್ ವ್ಹರಾ, ಆನಿ ಎಕಾಮೆಕಾಕ್ ದುರ್ಸೊಂಕ್ ಕಾರಣ್ ಆಸಾ ತರ್ಯೀ ಎಕಾಮೆಕಾಕ್ ಭೊಗ್ಸಿಯಾ; ತುಮಿ ದಿತಾತ್ ತೆಂ ಭೊಗ್ಸಣೆಂ ಸೊಮಿಯಾನ್ ತುಮ್ಕಾಂ ದಿಲಾಂ ತ್ಯಾ ಭೊಗ್ಸಣ್ಯಾ ಬರಿ ಜಾಂವ್. ಪುಣ್ ಹ್ಯಾ ಸರ್ವ್ ಶೆಗುಣಾಂ ಪ್ರಾಸ್ ಚಡ್ ತುಮ್ಚೇ ಥಂಯ್ ಆಸುಂಕ್ಜಾಯ್ ಮೋಗ್. ಮೋಗ್ ಹೆ ಶೆಗುಣ್ ಸಂಪೂರ್ಣ್ ಕರ್ತಾ ಆನಿ ತೆ ಎಕ್ವಟಾಯ್ತಾ. ಕ್ರಿಸ್ತಾಚೆಂ ಸಮಾಧಾನ್ ತುಮ್ಚ್ಯಾ ಕಾಳ್ಜಾಂನಿ ರಾಜ್ ಕರುಂ. ಏಕ್ ಕುಡಿಚೆ ಸಾಂದೆ ತುಮಿ ಜಾಲ್ಲ್ಯಾನ್, ತ್ಯಾ ಸಮಾಧಾನಾಕ್ ತುಮ್ಕಾಂ ಆಪೊವ್ಣೆಂ ಮೆಳ್ಳಾಂ. ಹ್ಯಾ ಶಿವಾಯ್, ಉಪ್ಕಾರಿ ಮನಾಚಿಂ ತುಮಿ ಜಾಯಾ. ಕ್ರಿಸ್ತಾಚೆಂ ಉತರ್ ತುಮ್ಚ್ಯಾ ಕಾಳ್ಜಾಂನಿ ಉದಂಡ್ ಭರೊನ್ ಆಸುಂ; ಖರೇ ಜಾಣ್ವಾಯೆನ್ ಎಕಾಮೆಕಾಕ್ ಶಿಕಯಾ ಆನಿ ಬೂದ್ಬಾಳ್ ಸಾಂಗಾ; ಕೀರ್ತನಾಂನಿ, ಗಿತಾಂನಿ ಆನಿ ಆತ್ಮೀಕ್ ಕಾವ್ಯಾಂನಿ ಗಾಯನ್ ಕರ್ನ್ ತುಮ್ಚ್ಯಾ ಕಾಳ್ಜಾಂತ್ ಥಾವ್ನ್ ದೆವಾಕ್ ಅರ್ಗಾಂ ದಿಯಾ. ಉತ್ರಾನ್ ಜಾಂವ್, ಕರ್ನೆನ್ ಜಾಂವ್, ಜೆಂ ಕಿತೆಂ ತುಮಿ ಕರ್ತಾತ್ ತೆಂ ಸಕ್ಕಡ್ ಸೊಮಿಯಾ ಜೆಜುಚೇ ನಾಂವಿಂ ಕರಾ; ತಾಚೇ ಮಾರಿಪತ್ ದೆವಾ ಬಾಪಾಕ್ ಅರ್ಗಾಂ ದಿಯಾ. ಪತಿಣಿಂನೋ, ತುಮ್ಚ್ಯಾ ಪತಿಂಕ್ ತುಮಿ ಖಾಲ್ ಜಾಯಾ. ಸೊಮಿಯಾ ಥಂಯ್ ತುಮ್ಕಾಂ ತೆಂ ಸಹಜ್ಲ್ಲೆಂ. ಪತಿಂನೋ, ತುಮ್ಚ್ಯಾ ಪತಿಣಿಂಚೊ ಮೋಗ್ ಕರಾ ಆನಿ ತಾಂಕಾಂ ಕಠಿಣಾಯೆನ್ ಚಲಯ್ನಾಕಾತ್. ಭುರ್ಗ್ಯಾಂನೊ, ಸರ್ವ್ ಸಂಗ್ತಿಂನಿ ತುಮ್ಚ್ಯಾ ವ್ಹಡಿಲಾಂಕ್ ಖಾಲ್ ಜಾಯಾ. ಹೆಂ ಸೊಮಿಯಾಕ್ ಖರೆಂಚ್ ಮಾನ್ತಾ. ಬಾಪಯಾಂನೋ, ತುಮ್ಚ್ಯಾ ಭುರ್ಗ್ಯಾಂಕ್ ಭೆಷ್ಟೆಂಚ್ ಚಿಡಾಯ್ನಾಕಾತ್ ಆನಿ ತಿಂ ಭಿಜುಡ್ ಜಾಂವ್ಕ್ ಕಾರಣ್ ಜಾಯ್ನಾಕಾತ್.

24 November

ದಸೆಂಬರ್ 28 - ಭಾಗೆವಂತ್ ಕುಟ್ಮಾಚಿ ಪರಬ್ - ಸುವಾರ್ತಾ

ಮಾತೆವ್ 2:13-15,19-23 ತೆ ಗೆಲ್ಯಾ ಉಪ್ರಾಂತ್ ಸರ್ವೆಸ್ಪರಾಚೊ ಏಕ್ ದೂತ್ ಜುಜೆಕ್ ಸೊಪ್ಣಾಂತ್ ದಿಷ್ಟಿ ಪಡುನ್ ಮ್ಹಣಾಲೊ: “ಊಠ್, ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆ, ಆನಿ ಎಜಿಪ್ತಾಕ್ ಪೋಳ್ನ್ ವಚ್. ಪತ್ರ್ಯಾನ್ ಹಾಂವ್ ತುಕಾ ಸಾಂಗ್ತಲೊಂ ತ್ಯಾ ಪರ್ಯಾನ್ ಥಂಯ್ಚ್ ರಾವ್. ಬಾಳ್ಕಾಚೊ ಜೀವ್ ಕಾಡ್ಚೇ ಖಾತಿರ್ ಹೆರೊದ್ ತಾಚಿ ಸೊಧ್ನಾ ಕರ್ಚ್ಯಾರ್ ಆಸಾ.” ಜುಜೆ ತಕ್ಷಣ್ ಉಠ್ಲೊ, ಆವಯ್ ಭುರ್ಗ್ಯಾಕ್ ಘೆವ್ನ್ ರಾತಾರಾತಿಂ ಎಜಿಪ್ತಾಕ್ ಭಾಯ್ರ್ ಸರ್ನ್ ಗೆಲೊ ಆನಿ ಹೆರೊದಿಚ್ಯಾ ಮರಣಾ ಪರ್ಯಾನ್ ಥಂಯ್ಚ್ ರಾವ್ಲೊ. ಅಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಸರ್ವೆಸ್ಪರಾನ್ ಮ್ಹಳ್ಳೆಂ ತೆಂ: “ಎಜಿಪ್ತಾ ಥಾವ್ನ್ ಮ್ಹಜ್ಯಾ ಪುತಾಕ್ ಹಾಂವೆಂ ಆಪೊವ್ನ್ ಹಾಡ್ಲೊ.” ಹೆರೊದ್ ಮೊರ್ತಚ್ ಸರ್ವೆಸ್ಪರಾಚೊ ದೂತ್ ಎಜಿಪ್ತಾಂತ್ ಜುಜೆಕ್ ಸೊಪ್ಣಾಂತ್ ದಿಷ್ಟಿ ಪಡುನ್ ಸಾಂಗಿಲಾಗ್ಲೊ: “ಊಠ್, ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆ ಆನಿ ಇಸ್ರಾಯೆಲಾಚ್ಯಾ ಗಾಂವಾಕ್ ಪಾಟಿಂ ವಚ್, ಕಿತ್ಯಾಕ್ ಭುರ್ಗ್ಯಾಚೊ ಜೀವ್ ಕಾಡುಂಕ್ ಸೊಧ್ತಾಲೆ ತೆ ಆತಾಂ ಮೊರ್ನ್ ಪಾವ್ಲ್ಯಾತ್”. ಜುಜೆ ಉಠ್ಲೊ ಆನಿ ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆವ್ನ್ ಇಸ್ರಾಯೆಲಾಚ್ಯಾ ಗಾಂವಾಕ್ ಪಾಟಿಂ ಆಯ್ಲೊ. ಪುಣ್ ಹೆರೊದಿ ಉಪ್ರಾಂತ್ ತಾಚೊ ಪೂತ್ ಆರ್ಖೆಲಾವ್ ಜುದೇಯಾಚೊ ರಾಯ್ ಜಾಲಾ ಮ್ಹಣ್ ಆಯ್ಕುನ್, ಥಂಯ್ ವಚುಂಕ್ ತೊ ಭಿಯೆಲೊ. ಆನಿ ಏಕ್ ಸೊಪ್ಣಾಂತ್ ತಾಕಾ ಕಳಿತ್ ಕೆಲ್ಲೇ ಪರ್ಮಾಣೆಂ ತೊ ಗಾಲಿಲೆಯಾ ಪ್ರಾಂತಾಕ್ ಗೆಲೊ ಆನಿ ಥಂಯ್ ನಜರೆತ್ ನಾಂವಾಚ್ಯಾ ಶಹರಾಂತ್ ವಚುನ್ ರಾವ್ಲೊ. ಅಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಮ್ಹಳ್ಳೆಂ ತೆಂ: “ತಾಕಾ ನಜರೆತ್ಗಾರ್ ಮ್ಹಣ್ ಆಪಯ್ತಲೆ.”