Mangala Jyothi
Diocesan Biblical, Catechetical and Liturgical Center
Diocese of Mangalore
Mangala Jyothi
Diocesan Biblical, Catechetical and Liturgical Center
Diocese of Mangalore
Home
Departments
Prayers
News
Photo Gallery
Results
Magazines
Sunday Reading
Contact
Select a date
keyboard_arrow_down
Choose a year...
2025
keyboard_arrow_down
Choose a month...
October
September
21 October
ನವೆಂಬರ್ 23 – ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ - ಪಯ್ಲೆಂ ವಾಚಪ್
2 ಸಾಮು.5:1-3 ಇಸ್ರಾಯೆಲಾಚ್ಯೊ ಸಗ್ಳ್ಯೊ ಕುಳಿಯೊ ಹೆಬ್ರೊನಾಂತ್ ದಾವಿದಾಶಿಂ ಆಯ್ಲ್ಯೊ ಆನಿ ತಾಂಣಿಂ ಮ್ಹಳೆಂ: “ಆಮಿ ತುಜ್ಯಾಚ್ ಹಾಡಾಮಾಸಾಚೆ. ಸೊಂಪ್ಲಲ್ಯಾ ದಿಸಾಂನಿ ಸಾವ್ಲ್ ಆಮ್ಚೆರ್ ರಾಜ್ವಟ್ಕಿ ಚಲಯ್ತಾಲೊ ತೆದ್ನಾ, ತುವೆಂಚ್ ಇಸ್ರಾಯೆಲಿತಾಂಕ್ ಝುಜಾಕ್ ಆಪೊವ್ನ್ ವ್ಹೆಲೆಯ್ ಆನಿ ತಾಂಕಾಂ ಪಾಟಿಂ ಹಾಡ್ಲೆಯ್, ಆನಿ ಸರ್ವೆಸ್ಪರಾನ್ ತುಕಾ ಮ್ಹಳೆಂ: ‘ತುಂಚ್ ಮ್ಹಜೆ ಪರ್ಜೆ ಇಸ್ರಾಯೆಲಾಚೊ ಗೊವ್ಳಿ ಜಾತಲೊಯ್, ತುಂಚ್ ಇಸ್ರಾಯೆಲಾಚೊ ಫುಡಾರಿ ಜಾತಲೊಯ್.” ದೆಕುನ್ ಇಸ್ರಾಯೆಲಾಚೆ ಸರ್ವ್ ಮಾಲ್ಗಡೆ ಹೆಬ್ರೊನಾಂತ್ ದಾವಿದಾಶಿಂ ಆಯ್ಲೆ; ದಾವಿದ್ ರಾಯಾನ್ ಹೆಬ್ರೊನಾಂತ್ ಸರ್ವೆಸ್ಪರಾ ಹುಜಿರ್ ತಾಂಚೆ ಕಡೆ ಏಕ್ ಕರಾರ್ ಕೆಲೊ.
Show more
21 October
ನವೆಂಬರ್ 23 - ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ – ಕೀರ್ತನ್
ಕೀ.121 ಶ್ಲೋಕ್: "ಸರ್ವೆಸ್ಪರಾಚ್ಯೆ ಘರಿಂ ವಚುಂಯಾ" ಮ್ಹಣ್ತನಾ ಹಾಂವ್ ಸಂತೊಸ್ಲೊಂ 1. "ಯಾ ಆಮಿ, ಸರ್ವೆಸ್ಪರಾಚ್ಯೆ ಘರಿಂ!" ಅಶೆಂ ಮ್ಹಣುನ್ ಲೋಕ್ ಮ್ಹಣ್ತನಾ ಕೆದೊ ವರ್ತೊ ಸಂತೊಸ್ ಮ್ಹಾಕಾ ಭೊಗ್ಲೊ! ಆಮಿ ತುಜ್ಯೆಶಿಂ ಪಾವ್ಲ್ಯಾಂವ್ ಜೆರುಸಾಲೆಮಾ! ತುಜ್ಯಾ ದಾರ್ವಾಟ್ಯಾಂಚೆರ್ ಆಸಾತ್ ಆಮ್ಚಿಂ ಪಾಂವ್ಲಾಂ. ತುಜ್ಯಾ ದಾರಾಂ ಭಿತರ್ ಉಬೆ ಆಸಾತ್ ಆಮ್ಚೆ ಪಾಂಯ್! 2. ಮಜ್ಭೂತ್ ಆನಿ ಅಖಂಡ್ ಬಾಂಧಾವಳೆನ್ ಉಬಾರ್ನ್ ಬಾಂಧ್ಲಾಂ ಆಮ್ಚೆಂ ಜೆರುಸಾಲೆಮ್! ಥಂಯ್ಸರ್ ಚಡುನ್ ಯೆತಾತ್ ಕುಳಿಯೊ, ವ್ಹಯ್, ಸರ್ವೆಸ್ಪರಾಚ್ಯೊ ಕುಳಿಯೊ ತ್ಯೊ! 3. ಥಂಯ್ ಸರ್ವೆಸ್ಪರಾಚೆಂ ನಾಂವ್ ವಾಖಾಣುಂಕ್ ಇಸ್ರಾಯೆಲಾಚೊ ಕಾಯ್ದೊ ತೊ ಥಂಯ್ಸರ್ ಉಬಾರ್ಲಾಂ ದಾವಿದ್ ರಾಯಾಚೆಂ ಮುನ್ಸುಬೆಚೆಂ ಸಿಂಹಾಸನ್.
Show more
21 October
ನವೆಂಬರ್ 23 - ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ – ದುಸ್ರೆಂ ವಾಚಪ್
ಕೊಲೊಸ್ಸೆ; 1:12-20 ಉಜ್ವಾಡಾಚ್ಯಾ ರಾಜ್ಯಾಂತ್ ಆಪ್ಲ್ಯಾ ಭಕ್ತಾಂಕ್ ತಯಾರ್ ಕೆಲ್ಲ್ಯಾ ದಾಯ್ಜಾಂತ್ ಭಾಗಿದಾರ್ ಜಾಂವ್ಚೆಂ ದೆಣೆಂ ತುಮ್ಕಾಂ ಫಾವೊ ಕೆಲ್ಲ್ಯಾ ಬಾಪಾಕ್ ತುಮಿ ಅರ್ಗಾಂ ದಿತಲ್ಯಾತ್. ತಾಣೆಂ ಆಮ್ಕಾಂ ಕಾಳೊಕಾಚೆ ಪದ್ವೆಂತ್ಲಿಂ ಕಾಡ್ನ್ ಆಪ್ಲ್ಯಾ ಮೊಗಾಚ್ಯಾ ಪುತಾಚ್ಯಾ ರಾಜ್ಯಾಂತ್ ಹಾಡ್ನ್ ಪಾಯ್ಲ್ಯಾಂತ್. ತ್ಯಾಚ್ ತಾಚ್ಯಾ ಪುತಾ ಮಾರಿಫತ್ ಲಾಭ್ತಾ ಆಮ್ಕಾಂ ಸೊಡ್ವಣ್, ಮ್ಹಣ್ಜೆ ಪಾತ್ಕಾಂಚೆಂ ಭೊಗ್ಸಣೆಂ. ತೊಚ್ ಪ್ರತಿರೂಪ್ ಅದೃಶ್ಯ್ ದೆವಾಚೆಂ, ಪ್ರಥಮ್ ಜನಿತ್ ಸರ್ವ್ ರಚ್ನಾಂ ಮಧೆಂ; ತಾಚೇ ಥಂಯ್ ಸರ್ಗಿಂಚಿಂ ಆನಿ ಪೃಥ್ವೆಚಿಂ, ದಿಸ್ತಾತ್ ತಿಂ ಆನಿ ದಿಸನಾತ್‍ಲ್ಲಿಂ ಸರ್ವ್ ರಚ್ನಾಂ - ಸಿಯಾಸಣಾಂ, ಸ್ವಾಮಿತ್ವಾಂ, ಅಧಿಕಾರಿ ಆನಿ ಪ್ರಭುತ್ವಾಂ - ದೆವಾನ್ ರಚ್ಲಿಂ. ಸರ್ವ್ ರಚ್ನಾಂ ಜಾವ್ಚೇ ಪಯ್ಲೆಂ ತೊ ಆಸ್‍ಲ್ಲೊ. ಸರ್ವ್ ವಸ್ತು ತಾಚೇ ಮಾರಿಪತ್ ಅಸ್ತಿತ್ವಾಂತ್ ಆಸಾತ್. ತೊಚ್ ಮಸ್ತಕ್ ಕುಡಿಚೆಂ, ಮ್ಹಣ್ಜೆ ಪವಿತ್ರ್ ಸಭೆಚೆಂ, ಆರಂಭ್ ವಾ ಪಯ್ಲೆಂ ಫೊಳ್ ಜಿವಂತ್ ಜಾಲ್ಲ್ಯಾಂಚೆಂ. ದೆವಾಚಿಚ್ ಖುಶಿ ಅಶಿ ಜಾಲಿ: ತಾಚೆ ಥಂಯ್ ಆಪ್ಣಾಚಿ ಸಗ್ಳಿ ಸಂಪೂರ್ಣತಾ ಬಿಡಾರ್ ಕರುನ್ ಆಸ್ಚಿ ಆನಿ ತಾಚ್ಯಾ ಖುರ್ಸಾಚ್ಯಾ ರಗ್ತಾ ಮಾರಿಫತ್ ಸಮಾಧಾನ್ ಸ್ಥಾಪಿತ್ ಕರ್ನ್, ಭುಮಿಚ್ಯಾ ಆನಿ ಅಂತ್ರಾಳಾಚ್ಯಾ ಸರ್ವ್ ರಚ್ನಾಂಕ್ ಆಪ್ಣಾ ಥಂಯ್ ರಾಜಿ ಕರುನ್ ಘೆವ್ಚಿ ಮ್ಹಣ್.
Show more
21 October
ನವೆಂಬರ್ 23 - ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ - ಸುವಾರ್ತಾ
ಲೂಕ್ 23:35-43 ಶೆಕಿಂ, ಜೆಜುಕ್ ಖುರ್ಸಾರ್ ಮಾರ್ತಾಸ್ತಾನಾ ಲೋಕ್ ಲಾಗ್ಸಾರ್ ರಾವುನ್ ಪಳೆತ್ ಆಸ್ಲೊ. ತಾಂಚೆ ಮುಖಂಡ್ ತಾಕಾ ಕೆಂಡುನ್ ಮ್ಹಣ್ತಾಲೆ: “ಹೆರಾಂಕ್ ತಾಣೆಂ ಬಚಾವ್ ಕೆಲೆ; ಹೊ ದೆವಾಚೊ ಕ್ರೀಸ್ತ್, ವಿಂಚ್ಲಲೊ, ವ್ಹಯ್ ಜಾಲ್ಯಾರ್, ತೊ ಆಪ್ಣಾಕ್‍ಚ್ ಬಚಾವ್ ಕರುಂ!” ಶಿಪಾಯ್‍ಯೀ ತಾಚಿಂ ಖೆಳ್ಕುಳಾಂ ಕರ್ತಾಲೆ. ತೆ ತಾಚೇ ಸರ್ಶಿಂ ವಚುನ್, ತಾಕಾ ಆಂಬೊಟ್ ವಾಯ್ನ್ ದೀವ್ನ್ ಮ್ಹಣ್ತಾಲೆ: “ತುಂ ಜುದೆವಾಂಚೊ ರಾಯ್ ಜಾಲ್ಯಾರ್ ತುಕಾಚ್ ಬಚಾವ್ ಕರ್.” ತಾಚ್ಯಾ ಮಾತ್ಯಾ ವಯ್ರ್ “ಹೊ ಜುದೆವಾಂಚೊ ರಾಯ್” ಹಿಂ ಉತ್ರಾಂ ಬರೊವ್ನ್ ಘಾಲ್ಲಿಂ. ಉಮ್ಕಾಳಾಯ್‍ಲ್ಲ್ಯಾ ಅಪ್ರಾಧ್ಯಾಂ ಮಧ್ಲೊ ಎಕ್ಲೊ ತಾಚಿ ನಿಂದಾ ಕರ್ನ್ ಮ್ಹಣಾಲೊ: “ತುಂ ಕ್ರೀಸ್ತ್ ವ್ಹಯ್ ಜಾಲ್ಯಾರ್ ತುಕಾಚ್ ಆನಿ ಆಮ್ಕಾಂಯೀ ಬಚಾವ್ ಕರ್.” ತವಳ್ ದುಸ್ರೊ ಜಾಪ್ ದೀವ್ನ್ ತಾಕಾ ಭೆಷ್ಟಾಂವ್ಕ್ ಲಾಗ್ಲೊ: “ತುಕಾಯೀ ತಿಚ್ ಶಿಕ್ಷಾ ಫಾವೊ ಜಾಲ್ಯಾ ಆಸ್ತಾನಾ ತುಂ ದೆವಾಕ್ ಕಾಂಯ್ ಭಿಯೆನಾಯ್‍ವೆ? ಆಮ್ಕಾಂ ಜಾಲ್ಯಾರ್ ನಿತಿ ಪ್ರಕಾರ್, ಮ್ಹಣ್ಜೆ ಆಮ್ಚ್ಯಾ ಕನ್ರ್ಯಾಂಕ್ ಫಾವೊ ಜಾಲ್ಲೆಂ ತೆಂ ಮೆಳ್ಳಾಂ; ಪುಣ್ ಹಾಣೆಂ ಕಸಲಿಚ್ ಚೂಕ್ ಆಧಾರ್ಲಿನಾ.” ಉಪ್ರಾಂತ್ ತೊ ಜೆಜುಲಾಗಿಂ ಮ್ಹಣಾಲೊ: “ಜೆಜೂ, ತುಂ ರಾಜ್‍ಪದ್ವಿ ಘೆವ್ನ್ ಯೆತಾಸ್ತಾನಾ ಮ್ಹಜೊ ಉಗ್ಡಾಸ್ ದವರ್.” ಜೆಜುನ್ ತಾಕಾ ಸಾಂಗ್ಲೆಂ: “ಹಾಂವ್ ತುಕಾ ಸಾಂಗ್ತಾಂ, ಆಜ್‍ಚ್ ತುಂ ಮ್ಹಜೇ ಸಾಂಗಾತಾ ವೈಕುಂಠಾಂತ್ ಆಸ್ತಲೊಯ್.”
Show more
21 October
ನವೆಂಬರ್ 16 - ಸಾದ್ಯಾ ಕಾಳಾಚ್ಯಾ 33ವ್ಯಾ ಹಫ್ತ್ಯಾಚೊ ಆಯ್ತಾರ್ - ಪಯ್ಲೆಂ ವಾಚಪ್
ಮಾಲಾ.3:19-20 ಪಳೆಯಾ, ಜಳ್ತ್ಯಾ ಆಗ್ಟ್ಯಾ ಪರಿಂ ತೊ ದೀಸ್ ಯೆತಾ. ಸಗ್ಳಿಂ ಗರ್ವಿಷ್ಟ್ ಆನಿ ನಷ್ಟಿ ಮನ್ಶಾಂ ಸೊವ್ರ್ಯಾ ಸಾರ್ಕಿಂ ಜಾತಲಿಂ, ಆನಿ ಯೆಂವ್ಚೊ ಆಸಾ ತೊ ದೀಸ್ ತಾಂಚೆಂ ಮೂಳ್ ಆನಿ ತಾಳ್ ದವ್ರಿನಾಸ್ತಾಂ ತಾಂಕಾಂ ಉಜ್ಯಾನ್ ಲಾಸ್ತಲೊ, ಮ್ಹಣ್ತಾ ದಳ್ಬಾರಾಂಚೊ ಸರ್ವೆಸ್ಪರ್. ಪೂಣ್ ತುಮ್ಕಾಂ, ಮ್ಹಜ್ಯಾ ನಾಂವಾಚಿ ಭಿರಾಂತ್ ಧರ್ತಲ್ಯಾಂಕ್ ನಿತಿಚೊ ಸುರ್ಯೊ ಉದೆತಲೊ ಆನಿ ತಾಚ್ಯಾ ಕಿರ್ಣಾಂನಿ ಭಲಾಯ್ಕಿ ಆಸ್ತಲಿ.
Show more
21 October
ನವೆಂಬರ್ 16 - ಸಾದ್ಯಾ ಕಾಳಾಚ್ಯಾ 33ವ್ಯಾ ಹಫ್ತ್ಯಾಚೊ ಆಯ್ತಾರ್ – ಕೀರ್ತನ್
ಕೀ.97 ಶ್ಲೋಕ್: ನ್ಯಾಯ್-ನಿತಿನ್ ಪ್ರಿಥುಮೆಚಿ ಝಡ್ತಿ ಕರುಂಕ್ ಸೊಮಿ ಯೆತಲೊ 1. ಕಿನ್ನರಿ ಹಾತಿಂ ಘೆವ್ನ್ ಗಿತಾಂ ಗಾಯಾ, ವಿಣೆಂ ವ್ಹಾಜೊವ್ನ್ ಮಧುರ್ ಸಂಗೀತ್ ಕರಾ; ತುತೂರಿ-ಕೊಂಬ್ ಫುಂಕುನ್ ಸರ್ವೆಸ್ಪರ್ ರಾಯಾಕ್ ಜಯ್ತ್ ಮಾಗಾ. 2. ದರ್ಯೊ ಆನಿ ತಾಂತುಂ ಆಸಾ ತೆಂ ಸರ್ವ್, ಭುಮಿ ಆನಿ ತಿಚೆರ್ ಆಸಾ ತೊ ಲೋಕ್ ಆನಂದ್ ಪಾವುಂ. ನ್ಹಂಯೊ ಉಲ್ಲಾಸಾನ್ ತಾಳಿಯೊ ಪೆಟುಂ, ಪರ್ವತ್ ಸಂತೊಸಾನ್ ಉಡೊನ್ ನಾಚುಂ. 3. ಸಗ್ಳಿ, ಸೃಷ್ಟಿ ಯೆಂವ್ಚೊ ಆಸಾ ತ್ಯಾ ಸರ್ವೆಸ್ಪರಾ ಮುಖಾರ್ ಉಲ್ಲಾಸುಂ; ತೊ ಸಂಸಾರಾಚಿ ಮುನ್ಸುಬಿ ಕರುಂಕ್ ಯೆತಲೊ, ನ್ಯಾಯ್-ನಿತಿನ್ ಪ್ರಿಥುಮೆಚಿ ತೊ ಝಡ್ತಿ ಕರ್ತಲೊ, ಸತ್-ನಿತಿನ್ ಲೊಕಾಕ್ ತೊ ನಿರ್ಣಯ್ ಕರುನ್ ದಿತಲೊ.
Show more
21 October
ನವೆಂಬರ್ 16 - ಸಾದ್ಯಾ ಕಾಳಾಚ್ಯಾ 33ವ್ಯಾ ಹಫ್ತ್ಯಾಚೊ ಆಯ್ತಾರ್ - ಸುವಾರ್ತಾ
ಲೂಕ್ 21:5-19 ತ್ಯಾ ದಿಸಾಂನಿ ಥೊಡೆ ಜಣ್ ದೆವಾಳಾ ವಿಶ್ಯಾಂತ್ ಉಲೊವ್ನ್, ತೆಂ ಸೊಭಿತ್ ಫಾತ್ರಾಂನಿ ಆನಿ ದಾನ್ ಆಯ್‍ಲ್ಲ್ಯಾ ವಸ್ತುಂನಿ ಸುಂರ್ಗಾರಾಯ್ಲಾಂ ಮ್ಹಣ್ತಾಲೆ. ತವಳ್ ಜೆಜುನ್ ತಾಂಕಾಂ ಸಾಂಗ್ಲೆಂ: “ತುಮಿ ದೆಖ್ತಾತ್ ತ್ಯಾ ಬಾಂಧ್ಪಾಚೊ ಫಾತರ್ ಸಯ್ತ್ ಉರಸೊ ನಾ ತಸಲೆ ದೀಸ್ ಯೆತಲೆ; ಸಕ್ಕಡ್‍ಯಿ ಕೊಸ್ಳಾವ್ನ್ ಘಾಲ್ತಲೆ.” ತವಳ್ ತಾಂಣಿಂ ತಾಚೆ ಲಾಗಿಂ ವಿಚಾರ್ಲೆಂ: “ಮೆಸ್ತ್ರಿ, ಹ್ಯೊ ಸಂಗ್ತಿ ಕೆದಳಾ ಘಡ್ತಲ್ಯೊ? ತ್ಯೊ ಘಡ್ಚೊ ವೇಳ್ ಲಾಗಿಂ ಪಾವ್ಲಾ ಮ್ಹಣ್ ಗುರ್ತ್ ಕಸಲೊ?” ತವಳ್ ಜೆಜು ತಾಂಕಾಂ ಸಾಂಗಿಲಾಗ್ಲೊ: “ಕೊಣೆಂಯಿ ತುಮ್ಕಾಂ ಫಸಯ್ನಾಶೆಂ ಚತ್ರಾಯ್ ಕರಾ. ಸಬಾರ್ ಜಣ್ ಮ್ಹಜೇ ನಾಂವಿಂ ಯೆತಲೆ ಆನಿ ‘ಹಾಂವ್‍ಚ್ ತೊ’ ಆನಿ ‘ನಮಿಯಾರ್‍ಲ್ಲೊ ವೇಳ್ ಲಾಗಿಂ ಪಾವ್ಲಾ’ ಅಶೆಂ ಮ್ಹಣ್ತಲೆ. ಪುಣ್ ತುಮಿ ತಾಂಚ್ಯಾ ಪಾಟ್ಲ್ಯಾನ್ ವಚನಾಕಾತ್. ಝುಜಾಂ ಆನಿ ಕಾಟ್ಕಾಯಾಂ ವಿಶ್ಯಾಂತ್ ಖಬರ್ ಆಯ್ಕುನ್ ಆಕಾಂತುನ್ ಪಡನಾಕಾತ್. ಹ್ಯೊ ಸಂಗ್ತಿ ಘಡಜಯ್‍ಚ್. ಪುಣ್ ಅಂತ್ ತಕ್ಷಣ್ ಯೆವ್ಚೊನಾ.” ಉಪ್ರಾಂತ್ ತೊ ಮ್ಹಣಾಲೊ: “ರಾಷ್ಟ್ರ್ ರಾಷ್ಟ್ರಾಚೆರ್ ಆನಿ ರಾಜ್ಯ್ ರಾಜ್ಯಾಚೆರ್ ಝುಜಾಕ್ ದೆಂವ್ತಲೆಂ. ಥಂಯ್ ಹಾಂಗಾ ಭಿರಾಂಕುಳ್ ಭುಂಯ್ಕಾಂಪ್ಣಿ ಜಾತಲ್ಯೊ. ದುಕಳ್ ಆನಿ ಮಾರಿಚಿ ಪಿಡಾ ಪಡ್ತಲಿ ಆನಿ ಆಕಾಸರ್ ಭಿರಾಂಕುಳ್ ದೃಶ್ಯಾಂ ಆನಿ ವಿಚಿತ್ರ್ ಖುಣಾ ದಿಷ್ಟಿ ಪಡ್ತಲ್ಯೊ. ಪುಣ್ ಹ್ಯೊ ಸರ್ವ್ ಸಂಗ್ತಿ ಘಡ್ಚೇ ಪಯ್ಲೆಂ ತುಮ್ಕಾಂ ಧರ್ತಲೆ ಆನಿ ದಗ್ಧಿತಲೆ; ತುಮ್ಚಿ ಝಡ್ತಿ ಕರ್ಚೇ ಖಾತಿರ್ ತುಮ್ಕಾಂ ಸಿನಾಗೊಗಾಚ್ಯಾ ಅಧಿಕಾರ್ಯಾಂ ಹುಜಿರ್ ಹಾಡ್ತಲೆ ಆನಿ ಬಂಧಿಖಾನಾಂನಿ ಘಾಲ್ತಲೆ; ತುಮಿ ಮ್ಹಜೆ ಪಾಟ್ಲಾವ್ದಾರ್ ದೆಕುನ್, ತುಮ್ಕಾಂ ರಾಯಾಂ ಆನಿ ಅಧಿಪತಿಂ ಹುಜಿರ್ ವೊಡ್ನ್ ವ್ಹರ್ತಲೆ. ಸುವಾರ್ತೆಕ್ ಸಾಕ್ಸ್ ದಿಂವ್ಕ್ ತುಮ್ಕಾಂ ಹೊ ಏಕ್ ಸಂದರ್ಭ್ ಜಾತಲೊ. ತವಳ್ ಕಿತೆಂ ಜಾಪ್ ದಿವ್ಚಿ ಹ್ಯಾ ವಿಶ್ಯಾಂತ್ ಆತಾಂಚ್ ಆಲೋಚನ್ ಕರ್ಚೆನಾಂವ್ ಮ್ಹಣ್ ತುಮ್ಚೇ ಮತಿಂತ್ ನಿರ್ಧಾರ್ ಕರಾ. ಹಾಂವ್‍ಚ್ ತುಮ್ಕಾಂ ಅಸಲಿ ವಾಚಾಸಕ್ತ್ ಆನಿ ಜಾಣ್ವಾಯ್ ದಿತಲೊಂ ಕೀ, ಸರ್ವ್ ತುಮ್ಚೆ ವಿರೋಧಿ, ತುಮ್ಕಾಂ ಆಡಾಂವ್ಕ್ ವಾ ತುಮ್ಚೇರ್ ಉಪ್ರಾಟೆಂ ಸಾಂಗುಂಕ್ ಸಕ್ಚೆನಾತ್. ತುಮ್ಚಿಂಚ್ ಆವಯ್‍ಬಾಪುಯ್, ಭಾವ್‍ಭಯ್ಣಿ ಆನಿ ಸಯ್ರಿಂಧಾಯ್ರಿಂ ತುಮ್ಕಾಂ ಪರಾಧೀನ್ ಕರ್ತಲಿಂ ಆನಿ ತುಮ್ಚೆ ಮಧ್ಲ್ಯಾ ಥೊಡ್ಯಾಂಕ್ ಜಿವೆಶಿಂ ಮಾರಯ್ತಲಿಂ. ತುಮಿ ಮ್ಹಜೆ ಪಾಟ್ಲಾವ್ದಾರ್ ದೆಕುನ್ ಹರ್ಯೆಕ್ಲೊ ತುಮ್ಕಾಂ ದ್ವೇಶಿತಲೊ; ತರಿಪುಣ್ ತುಮ್ಚ್ಯಾ ಮಾತ್ಯಾಚೊ ಏಕ್‍ಚ್ ಏಕ್ ಕೇಸ್ ಲೆಗುನ್ ನಾಸ್ ಜಾವ್ಚೊನಾ. ತುಮ್ಚೇ ದೀಗ್ ಸೊಸ್ಣಿಕಾಯೆ ವರ್ವಿಂ ತುಮ್ಚೆ ಜೀವ್ ತುಮಿ ರಾಕ್ತಲ್ಯಾತ್.”
Show more
21 October
ನವೆಂಬರ್ 09 - ದೇವ್-ಮಂದಿರಾಚ್ಯಾ ಸಮರ್ಪಣಾಚೊ ವಾರ್ಷಿಕ್ ಸಂಭ್ರಮ್ - ಆಯ್ತಾರ್ – ಕೀರ್ತನ್
ಕೀ.46 ಶ್ಲೋಕ್: ಏಕ್ ನ್ಹಂಯ್ ಆಸಾ, ತಿಚ್ಯೆ ವ್ಹಾಳ್ ದೆವಾಚ್ಯಾ ಶಹರಾಕ್ ಸಂತೊಸ್ ಹಾಡ್ತಾತ್, ತೆಂಚ್ ತೆಂ ಶಹರ್ ಅತ್ಯುನ್ನತ್ ದೆವಾಚ್ಯಾ ನಿವಾಸಾಚೆಂ 1. ದೇವ್‍ಚ್ ಆಮ್ಚೊ ಆಸ್ರೊ ಆನಿ ಆಮ್ಚೆಂ ಬಳ್, ಕಷ್ಟಾಂ-ಆಕಾಂತಾಂಚ್ಯಾ ವೆಳಾ ತೊಚ್ ಆಮ್ಚೊ ಖರೊ ಆಧಾರ್ ಭುಮಿ ಜಾಲ್ಯಾರ್ ಹಾಲೊನ್ ಪಡುಂ, ಪರ್ವತ್ ದೊಂಗರ್ ದರ್ಯಾಂತ್ ಕೊಸ್ಳೊನ್ ಪಡುಂ, ಪುಣ್ ಆಮಿ ಭಿಯೆಂವ್ಚಿಂ ನಾಂವ್. 2. ಏಕ್ ನ್ಹಂಯ್ ಆಸಾ, ತಿಚ್ಯೆ ವ್ಹಾಳ್ ದೆವಾಚ್ಯಾ ಶಹರಾಕ್ ಸಂತೊಸ್ ಹಾಡ್ತಾತ್, ತೆಂಚ್ ತೆಂ ಶಹರ್ ಅತ್ಯುನ್ನತ್ ದೆವಾಚ್ಯಾ ನಿವಾಸಾಚೆಂ. ದೆವಾನ್ ಜರ್ ತ್ಯಾ ಶಹರಾಂತ್ ಬಿಡಾರ್ ಕೆಲಾಂ, ತರ್ ತೆಂ ಹಾಲತ್ ಕಶೆಂ? ದೀಸ್ ಉದೆತನಾಚ್ ದೇವ್ ಯೆತಾ ತಾಚ್ಯೆ ಕುಮ್ಕೆಕ್. 3. ದಳ್ಭಾರಾಂಚೊ ಸರ್ವೆಸ್ಪರ್ ಆಮ್ಚ್ಯೆ ಸವೆಂ ಆಸಾ, ಜಾಕೊಬಾಚೊ ದೇವ್ ಆಮ್ಚೊ ಆಸ್ರೊ ಜಾವ್ನಾಸಾ. ಯೆಯಾ, ಪಳೆಯಾ, ಸರ್ವೆಸ್ಪರಾಚಿಂ ಕಾಮಾಂ ಪ್ರಿಥುಮೆಚೆರ್ ದೆಖಾ ತಾಣೆಂ ಕೆಲ್ಲಿಂ ಅಜಾಪಾಂ!
Show more
21 October
ನವೆಂಬರ್ 09 - ದೇವ್-ಮಂದಿರಾಚ್ಯಾ ಸಮರ್ಪಣಾಚೊ ವಾರ್ಷಿಕ್ ಸಂಭ್ರಮ್ - ಆಯ್ತಾರ್ – ದುಸ್ರೆಂ
1 ಕೊರಿಂಥ್ 3:9-11, 16-17 ತುಮಿ ತಾಚೆಂ ಶೆತ್, ತಾಚೆಂಚ್ ಬಾಂಧಪ್. ದೆವಾನ್ ಮ್ಹಾಕಾ ದಿಲ್ಲೇ ಕುರ್ಪೆಕ್ ಸರಿ ಜಾವ್ನ್, ಏಕ್ ಮಾಹೆತ್‍ವಂತ್ ಆನಿ ಕಾರ್ಭಾರಿ ಬಾಂಧ್ಪ್ಯಾಬರಿ ಹಾಂವೆಂ ಬುನ್ಯಾದ್ ಘಾಲ್ಯಾ ಆನಿ ಆತಾಂ ತಾಚೇ ವಯ್ರ್ ದುಸ್ರೊ ಎಕ್ಲೊ ಬಾಂಧಪ್ ಚಡಯ್ತಾ. ಪುಣ್ ಆಪುಣ್ ಕಶೆಂ ಬಾಂಧ್ತಾ ತೇ ವಿಶ್ಯಾಂತ್ ಹರ್ಯೆಕ್ಲೊ ಚತ್ರಾಯ್ ಘೆಂವ್. ಕಿತ್ಯಾಕ್ ಎದೊಳ್‍ಚ್ ಘಾಲ್ಲೇ ತೇ ಬುನ್ಯಾದೇ ಶಿವಾಯ್, ದುಸ್ರಿ ಬುನ್ಯಾದ್ ಕೊಣಾಚ್ಯಾನ್‍ಯೀ ಘಾಲುಂಕ್ ನಜೊ. ತುಮಿ ದೆವಾಚೆಂ ಮಂದಿರ್ ಆನಿ ದೆವಾಚೊ ಅತ್ಮೊ ತುಮ್ಚೇ ಥಂಯ್ ಬಿಡಾರ್ ಕರ್ನ್ ಆಸಾ ಮ್ಹಣ್ ತುಮಿ ನೆಣಾತ್? ಜರ್ ಎಕ್ಲೊ ದೆವಾಚೆಂ ಮಂದಿರ್ ನಾಸ್ ಕರ್ತಾ, ತರ್ ದೇವ್ ತಾಕಾ ನಾಸ್ ಕರ್ತಲೊ; ಕಿತ್ಯಾಕ್ ದೆವಾಚೆಂ ಮಂದಿರ್ ಪವಿತ್ರ್; ಆನಿ ತೆಂಚ್ ಮಂದಿರ್ ತುಮಿ.
Show more
21 October
ನವೆಂಬರ್ 09 - ದೇವ್-ಮಂದಿರಾಚ್ಯಾ ಸಮರ್ಪಣಾಚೊ ವಾರ್ಷಿಕ್ ಸಂಭ್ರಮ್ - ಆಯ್ತಾರ್ - ಸುವಾರ್ತಾ
ಜು. 2: 13-22 ಜುದೆವಾಂಚಿ ಪಾಸ್ಖ್ ಪರಬ್ ಲಾಗಿಂ ಪಾವ್ಲ್ಲಿ ಜಾಲ್ಲ್ಯಾನ್, ಜೆಜು ಜೆರುಜಲೆಮಾಕ್ ಗೆಲೊ. ದೆವಾಳಾಂತ್ ಗೊರ್ವಾಂ, ಬಕ್ರೆ ಆನಿ ಪಾರ್ವೆ ವಿಕ್ತಲೆ ಆನಿ ದುಡು ವಾಟಾಯ್ತಲೆ ವ್ಯಾಪಾರ್ ಕರುಂಕ್ ಆಪಾಪ್ಲ್ಯಾ ಮಾಂಡಾರ್ ಬಸೊನ್ ಆಸ್ಲೆ. ಹೆಂ ಪಳೆವ್ನ್, ತಾಣೆಂ ಸುಂಬಾಚೆಂ ಏಕ್ ಚಾಬೂಕ್‍ಶೆಂ ವಿಣ್ಲೆಂ ಆನಿ ತಾಂಕಾಂ ಸಕ್ಟಾಂಕ್, ಬಕ್ರ್ಯಾಂ ಆನಿ ಗೊರ್ವಾಂ ಸಮೇತ್, ಭಾಯ್ರ್ ಧಾಂವ್ಡಾಯ್ಲೆ. ವಾಟಾವ್‍ಗಾರಾಂಚೆ ಮಾಂಡ್ ತಾಣೆಂ ವೊಮ್ತೆ ಘಾಲೆ ಆನಿ ತಾಂಚಿಂ ನಾಣಿಂ ಶಿಂಪ್ಡಾಯ್ಲಿಂ. ಪಾರ್ವೆ ವಿಕ್ತಲ್ಯಾಂಕ್ ತೊ ಮ್ಹಣಾಲೊ: “ಕಾಡಾ ತೆ ಹಾಂಗಾ ಥಾವ್ನ್; ಮ್ಹಜ್ಯಾ ಬಾಪಾಚೆಂ ಘರ್ ವ್ಯಾಪಾರಾಚಿ ಸಾಂತ್ ಕರಿನಾಕಾತ್.” ತವಳ್ ‘ತುಜ್ಯಾ ಘರಾಚೇ ಉರ್ಬೆನ್ ಹಾಂವ್ ಲಾಸ್ತಾಂ’ಹ್ಯಾ ಪವಿತ್ರ್ ಪುಸ್ತಕಾಚ್ಯಾ ಉತ್ರಾಂಚೊ ತಾಚ್ಯಾ ಶಿಸಾಂಕ್ ಉಗ್ಡಾಸ್ ಆಯ್ಲೊ. ಜುದೆವ್ ತವಳ್ ತಾಕಾ ಜಾಪ್ ದೀವ್ನ್ ಮ್ಹಣಾಲೆ: “ಆಶೆಂ ಕರುಂಕ್ ತುಕಾ ಅಧಿಕಾರ್ ಆಸಾ ಮ್ಹಣ್ ಕಿತೆಂ ಆಚರ್ಯೆಂ ತುಜ್ಯಾನ್ ಆಮ್ಕಾಂ ದಾಖೊಂವ್ಕ್ ಜಾತಾ?” ಜೆಜುನ್ ತಾಂಕಾಂ ಜಾಪ್ ದಿಲಿ: “ಹೆಂ ದೆವಾಳ್ ತುಮಿ ಮೋಡ್ನ್ ಘಾಲಾ ಆನಿ ತೀನ್ ದಿಸಾಂನಿ ಹಾಂವ್ ತೆಂ ಪತ್ರ್ಯಾನ್ ಉಬಾರ್ತಲೊ.” ಜುದೆವಾಂನಿ ಮ್ಹಳೆಂ: “ಕಿತೆಂ? ಹೆಂ ದೆವಾಳ್ ಬಾಂಧೊಂವ್ಕ್ ಸವೆಚಾಳೀಸ್ ವರ್ಸಾಂ ಲಾಗ್ಲಿಂ ಆನಿ ತುಂ ತೆಂ ತೀನ್ ದಿಸಾಂನಿ ಉಬಾರ್ತಲೊಯ್?” ಪುಣ್ ಜೆಜು ಉಲಯ್‍ಲ್ಲೊ ಆಪ್ಲೇ ಕುಡಿಚ್ಯಾ ದೆವಾಳಾ ವಿಶ್ಯಾಂತ್. ತಾಣೆಂ ಅಶೆಂ ಸಾಂಗ್‍ಲ್ಲೆಂ ಮ್ಹ್ಹಣ್, ತಾಂಕಾ ಮೆಲ್ಲ್ಯಂತ್ಲೊ ಜಿವಂತ್ ಉಠಯ್ಲ್ಯಾ ಉಪ್ರಾಂತ್ ತಾಚ್ಯಾ ಶಿಸಾಂಕ್ ಉಗ್ಡಾಸ್ ಆಯ್ಲೊ. ತವಳ್ ಪವಿತ್ರ್ ಪುಸ್ತಕಾಚಿಂ ಉತ್ರಾಂ ಆನಿ ಜೆಜುಚಿ ಸಾಂಗ್ಣಿ ತಾಂಣಿಂ ಸತ್ಮಾನ್ಲಿ.
Show more
21 October
ನವೆಂಬರ್ 02 - ಆಯ್ತಾರ್ – ಮೆಲ್ಲ್ಯಾಂ ಖಾತಿರ್ ಮಿಸಾಚಿಂ ವಾಚ್ಪಾಂ - ಪಯ್ಲೆಂ ವಾಚಪ್
ಜೋಬ್ 19: 1, 23-27 ತೆದ್ನಾ ಜೋಬಾನ್ ಜಾಪ್ ದಿವ್ನ್ ಮ್ಹಳೆಂ: ಮ್ಹಜಿಂ ಉತ್ರಾಂ ಬರೊವ್ನ್ ಘಾಲ್ಲಿಂ ಜಾಲ್ಯಾರ್ ಆನಿ ತಿಂ ಎಕಾ ಪುಸ್ತಕಾಂತ್ ಲಿಖ್‍ಲ್ಲಿಂ ಜಾಲ್ಯಾರ್, ಲೊಂಕ್ಡಾಚ್ಯಾ ಇರ್ಣ್ಯಾನ್ ಆನಿ ಸಿಶ್ಯಾನ್ ಖಡ್ಪಾಚೆರ್ ತಿಂ ಕಾಂತೊವ್ನ್ ಸಾಸ್ಣಾಕ್ ಉರಶಿಂ ಕೆಲ್ಲಿಂ ಜಾಲ್ಯಾರ್ ಕಿತ್ಲೆಂ ಬರೆಂ ಆಸ್ತೆಂ! ಪೂಣ್ ಮ್ಹಜೊ ಸೊಡ್ವೊಣ್ದಾರ್ ಜಿವಂತ್ ಆಸಾ ಮ್ಹಣ್ ಹಾಂವ್ ಜಾಣಾಂ, ಆನಿ ತೊ ಶೆವಟಿಂ ಪೃಥ್ವೆರ್ ಉಬೊ ರಾವ್ತಲೊ; ಆನಿ ಹೆ ಮ್ಹಜೆ ಕಾತಿಚೊ ನಾಸ್ ಜಾಲ್ಯಾ ಉಪ್ರಾಂತ್, ಮ್ಹಜೆ ಕುಡಿನ್ ಹಾಂವ್ ದೆವಾಕ್ ದೆಕ್ತಲೊಂ. ಜಾಕಾ ಹಾಂವ್ ದೆಕ್ತಲೊಂ, ತೊ ಮ್ಹಜೊ ಪಕ್ಷ್ ಘೆತಲೊ; ಮ್ಹಜೆ ದೊಳೆ ತಾಕಾಚ್ ಪಳೆತಲೆ, ಪಕ್ರ್ಯಾಕ್ ನ್ಹಯ್. ಮ್ಹಜೆ ಭಿತರ್ ಮ್ಹಜೆಂ ಕಾಳಿಜ್ ಅತ್ರೆಕಾನ್ ವಿರೊನ್ ಗೆಲಾಂ.
Show more
21 October
ನವೆಂಬರ್ 02 - ಆಯ್ತಾರ್ – ಮೆಲ್ಲ್ಯಾಂ ಖಾತಿರ್ ಮಿಸಾಚಿಂ ವಾಚ್ಪಾಂ - ಕೀರ್ತನ್
ಕೀರ್ತನ್ 25 ಶ್ಲೋಕ್: ತುಕಾ, ಸರ್ವೆಸ್ಪರಾ, ಮ್ಹಜೊ ಅತ್ಮೊ ಹಾಂವ್ ಉಬಾರ್ತಾಂ ವ ತುಜೆರ್ ವಿಶ್ವಾಸ್ ದವರ್ಲಲೊ ಕೊಣ್‍ಚ್ ಲಜೆಕ್ ಪಡ್ಚೊನಾ. 1. ಉಗ್ಡಾಸ್ ಕರ್, ಸರ್ವೆಸ್ಪರಾ, ಸುರ್ವೆರ್ ಥಾವ್ನ್ ತುವೆಂ ದಾಖಯ್ಲಲೆಂ ವಿಶ್ವಾಸೀಪಣ್, ಕೆದಿಂಚ್ ವಿಸರ್ನಾಕಾ ಪುರ್ವಿಲ್ಯಾ ಕಾಳಾಂಚೊ ತುಜೊ ಮೋಗ್. ಮ್ಹಜ್ಯಾ ತರ್ನಾಟ್ಪಣಾಚ್ಯಾ ಕಾಳಾರ್ ಕೆಲ್ಲ್ಯಾ ಚುಕಿಂ ಅಪ್ರಾಧಾಂಚೊ ಉಗ್ಡಾಸ್ ಧರಿನಾಕಾ, ತುಜ್ಯಾ ನಿರಂತರಿ ಮೊಗಾಕ್ ಆನಿ ಬರೆಪಣಾಕ್ ಸರಿ ಜಾವ್ನ್ ತುಂ ಮ್ಹಜೊ ಉಗ್ಡಾಸ್ ಕರ್. 2. ಮ್ಹಜ್ಯಾ ಕಾಳ್ಜಾಚೊ ಖಂತ್-ಹುಸ್ಕೊ ಹಳು ಕರ್, ಮ್ಹಜ್ಯಾ ತಳ್ಮಳ್ಯಾಂತ್ಲೊ ಮ್ಹಾಕಾ ನಿವಾರ್. ಮ್ಹಜ್ಯಾ ಆಟೆವಿಣ್ಯಾಂಚೆರ್ ದೀಷ್ಟ್ ಘಾಲ್, ಮ್ಹಜೆ ಕಷ್ಟ್ ಪಳೆ ಆನಿ ಸಗ್ಳಿಂ ಮ್ಹಜಿಂ ಪಾತ್ಕಾಂ ಭೊಗ್ಶಿ. 3. ಮ್ಹಜೊ ಜೀವ್ ರಾಖ್, ಮ್ಹಾಕಾ ಸಾಂಬಾಳ್ನ್ ಧರ್, ತುಜೊಚ್ ಆಸ್ರೊ ಹಾಂವೆಂ ಸೊಧ್ಲಾ, ದೆಕುನ್ ಮ್ಹಾಕಾ ಲಜೆಕ್ ಪಡುಂಕ್ ದೀನಾಕಾ. ಮ್ಹಜೆಂ ನಿರ್ದೋಶಿಪಣ್ ಆನಿ ಪ್ರಾಮಾಣೀಕ್ಪಣ್ ಮ್ಹಾಕಾ ಸಾಂಬಾಳುಂ, ಕಿತ್ಯಾಕ್ ಹಾಂವ್, ಸರ್ವೆಸ್ಪರಾ, ತುಜೆರ್‍ಚ್ ಪಾತ್ಯೆವ್ನ್ ಆಸಾಂ.
Show more
21 October
ನವೆಂಬರ್ 02 - ಆಯ್ತಾರ್ – ಮೆಲ್ಲ್ಯಾಂ ಖಾತಿರ್ ಮಿಸಾಚಿಂ ವಾಚ್ಪಾಂ - ದುಸ್ರೆಂ ವಾಚಪ್
ರೊಮಾ. 5: 5-11 ಆಪ್ಲೆಂ ದೆಣೆಂ ಮ್ಹಣ್ ಆಮ್ಕಾಂ ದಿಲ್ಲ್ಯಾ ಪವಿತ್ರ್ ಆತ್ಮ್ಯಾ ಮುಖಾಂತ್ರ್ ದೆವಾನ್ ಆಪ್ಲೊ ಮೋಗ್ ಆಮ್ಚ್ಯಾ ಕಾಳ್ಜಾಂನಿ ಧಾರಾಳ್ ವೊತ್ಲಾ. ಕಿತ್ಯಾಕ್ ಆಮ್ಕಾಂ ಆನಿಕ್‍ಯೀ ಕಿತೆಂಚ್ ಕರುಂಕ್ ಸಕತ್ ನಾತ್ಲಲ್ಯಾ ಕಾಳಾರ್, ಕ್ರಿಸ್ತಾನ್ ತಾಚೊ ನೆಮ್ಲಲೊ ವೇಳ್ ಪಾವ್ತಚ್, ಖೊಟ್ಯಾಂ ಖಾತಿರ್ ಆಪ್ಲೊ ಜೀವ್ ದಿಲೊ. ಏಕ್ ವತ್ರ್ಯಾ ಮನ್ಶಾ ಪಾಸತ್ ಮೊರೊಂಕ್ ಕೊಣ್‍ಯೀ ಎಕ್ಲೊ ಮುಖಾರ್ ಸರ್ಲ್ಯಾರ್‍ಯೀ ಸರ್ಲೊ. ಪುಣ್ ನಿತಿವಂತ್ ಮನ್ಶಾ ಪಾಸತ್ ಸಸಾರಾಯೆನ್ ಮೊರೊಂಕ್ ಕೊಣ್ ತೊ ತಯಾರ್? ಪುಣ್ ಆಮಿ ಪಾತ್ಕಿ ಆಸ್‍ಲ್ಲ್ಯಾಂವ್ ತೆದ್ನಾ ಕ್ರೀಸ್ತ್ ಆಮ್ಚೇ ಖಾತಿರ್ ಮೆಲೊ ಆನಿ ಹಾಚೇ ವರ್ವಿಂ ದೆವಾನ್ ಆಪುಣ್ ಕಿತ್ಲೊ ಆಮ್ಚೊ ಮೋಗ್ ಕರ್ತಾ ತೆಂ ದಾಖೊವ್ನ್ ದಿಲೆಂ. ಕ್ರಿಸ್ತಾಚ್ಯಾ ರಗ್ತಾ ವರ್ವಿಂ ಆತಾಂ ಆಮಿ ನಿತಿವಂತ್ ಜಾಲ್ಯಾಂವ್; ತರ್ ತಾಚೇ ವರ್ವಿಂಚ್ ದೆವಾಚ್ಯಾ ಕ್ರೋಧಾಂತ್ಲಿಂಯೀ ಆಮಿ ಖಂಡಿತ್ ಬಚಾವ್ ಜಾಂವ್ಕ್ ಪಾವ್ತಲ್ಯಾಂವ್. ಆಮಿ ತಾಚೆ ದುಸ್ಮಾನ್ ಆಸ್ತಾಂ, ಆಪ್ಲ್ಯಾ ಪುತಾಚ್ಯಾ ಮೊರ್ನಾ ಮಾರಿಫತ್ ದೆವಾನ್ ಆಮ್ಕಾಂ ರಾಜಿ ಕರ್ನ್ ಘೆತ್ಲ್ಯಾಂತ್ ಜಾಲ್ಯಾರ್, ಆತಾಂ ತಾಚೆ ಈಷ್ಟ್ ಜಾಲ್ಲೆ ಆಮಿ ಜಿವಂತ್ ಕ್ರಿಸ್ತಾ ಮಾರಿಫತ್ ತಾಚೇ ಥಾವ್ನ್ ಆನಿಕ್‍ಯೀ ಚಡ್ ವಿಶೇಸ್ ಥರಾನ್ ತಾರಣ್ ಜೊಡ್ತಲ್ಯಾಂವ್. ತಿತ್ಲೆಂಚ್ ನ್ಹಯ್, ಸೊಮಿಯಾ ಜೆಜು ಕ್ರಿಸ್ತಾ ವರ್ವಿಂ ಆಮ್ಕಾಂ ರಾಜಿ ಕರ್ನ್ ಘೆತ್ಲಲ್ಯಾ ದೆವಾ ಥಂಯ್, ತ್ಯಾಚ್ ಕ್ರಿಸ್ತಾ ಉದೆಶಿಂ ಆಮಿ ಸಂತೊಸಾನ್ ಭರ್ಲ್ಯಾಂವ್.
Show more
21 October
ನವೆಂಬರ್ 02 - ಆಯ್ತಾರ್ – ಮೆಲ್ಲ್ಯಾಂ ಖಾತಿರ್ ಮಿಸಾಚಿಂ ವಾಚ್ಪಾಂ - ಸುವಾರ್ತಾ
ಜುವಾಂವ್ 6: 37-40 ತೆ ವೆಳಿಂ ಜೆಜುನ್ ಲೊಕಾಕ್ ಮ್ಹಳೆಂ: ಬಾಪಾನ್ ಮ್ಹಜೇ ಅಧೀನ್ ಕೆಲ್ಲೆಂ ಸಗ್ಳೆಂ ಮ್ಹಜೇ ಸರ್ಶಿಂ ಯೆತಲೆಂ, ಆನಿ ಮ್ಹಜೇ ಸರ್ಶಿಂ ಯೆತಲ್ಯಾಕ್ ಹಾಂವ್ ಕೆದಿಂಚ್ ಪಯ್ಸ್ ಕರಿಸೊನಾಂ. ಕಿತ್ಯಾಕ್ ಹಾಂವ್ ಸರ್ಗಿಂ ಥಾವ್ನ್ ದೆಂವುನ್ ಆಯ್ಲಾಂ ಮ್ಹಜಿ ಖುಶಿ ಕರುಂಕ್ ನ್ಹಯ್, ಬಗರ್ ಮ್ಹಾಕಾ ಧಾಡ್ಲಲ್ಯಾಚಿ ಖುಶಿ ಕರುಂಕ್. ಆನಿ ಮ್ಹಾಕಾ ಧಾಡ್ಲಲ್ಯಾಚಿ ಖುಶಿ ಹಿ: ತಾಣೆಂ ಮ್ಹಜೇ ಅಧೀನ್ ದಿಲ್ಲ್ಯಾಂತ್ಲ್ಯಾ ಎಕ್ಲ್ಯಾಕ್ ಸಯ್ತ್ ಹಾಂವೆಂ ಹೊಗ್ಡಾಯ್ನಾಯೆ, ಬಗರ್ ನಿಮಾಣ್ಯಾ ದಿಸಾ ತಾಂಕಾಂ ಹಾಂವೆಂ ಜಿವಂತ್ ಉಠಯ್ಜಯ್ ಮ್ಹಣ್. ಪುತಾಕ್ ದೆಖ್ತಲ್ಯಾ ಆನಿ ಸತ್ಮಾನ್ತಲ್ಯಾ ಪ್ರತಿ ಎಕ್ಲ್ಯಾಕ್ ಸಾಸ್ಣಿಕ್ ಜಿವಿತ್ ಮೆಳಜಯ್, ಹಿಚ್ ಮ್ಹಜ್ಯಾ ಬಾಪಾಚಿ ಖುಶಿ. ಹಾಂವ್‍ಯೀ ತಾಂಕಾಂ ನಿಮಾಣ್ಯಾ ದಿಸಾ ಜಿವಂತ್ ಉಠಯ್ತಲೊಂ.”
Show more
21 October
ನವೆಂಬರ್ 01- ಸಗ್ಳೆ ಸಾಂತ್-ಭಕ್ತಾಂಚೊ ದಿವಸ್ - ಪಯ್ಲೆಂ ವಾಚಪ್
ಉಗ್ಡಾ. 7: 2-4, 9-14 ತೆದ್ವಾಂ ದುಸ್ರೊ ಏಕ್ ದೇವ್‍ದೂತ್ ಹಾಂವೆಂ ದೆಖ್ಲೊ. ಜಿವಂತ್ ದೆವಾಚಿ ಮ್ಹೊರ್ ಹಾತಿಂ ಘೆವ್ನ್ ಉದೆಂತಿಂತ್ಲೊ ತೊ ಉಠುನ್ ಯೆತಾಲೊ. ಧರ್ಣಿಚಿ ಆನಿ ದರ್ಯಾಚಿ ದೆಸ್ವಾಟ್ ಕರುಂಕ್ ಮ್ಹಣ್ ಪದ್ವಿ ಆಸ್ಲಲ್ಯಾ ಚೊವ್ಗ್ ದೇವ್‍ದುತಾಂಕ್ ವ್ಹಡ್ಲ್ಯಾ ತಾಳ್ಯಾನ್ ತಾಣೆಂ ಬೊಬ್ ಮಾರ್ನ್ ಮ್ಹಳೆಂ: “ನಾಕಾ, ಆಮ್ಚ್ಯಾ ದೇವ್‍ಸೆವಕಾಂಚ್ಯಾ ಕಪಾಲಾಂಚೆರ್ ಆಮಿ ಮ್ಹೊರ್ ಘಾಲಿಸರ್ ಭುಮಿಕ್ ಜಾಂವ್, ದರ್ಯಾಕ್ ಜಾಂವ್ ವಾ ರೂಕ್‍ಝಾಡಾಂಕ್ ಜಾಂವ್ ಕಿತೆಂಚ್ ಬಾಧಕ್ ಕರಿನಾಕಾತ್.” ಆನಿ ಮ್ಹೊರ್ ಘಾಲ್ಲ್ಯಾಂಚೊ ಸಂಖೊ ಎಕ್ಶೆಂ ಚಾಳೀಸ್ ಆನಿ ಚಾರ್ ಹಜಾರ್ ಮ್ಹಣ್ ಮೆಜ್ಲಲೆಂ ಮ್ಹಾಕಾ ಆಯ್ಕಲೆಂ. ಇಸ್ರಾಯೆಲಾಚ್ಯಾ ಸಮೆಸ್ತ್ ಕುಳಿಯಾಂ ಮಧ್ಲೆ ತೆ. ಹೆಂ ಜಾತಚ್ ಕೊಣಾಚ್ಯಾನ್‍ಯೀ ಮೆಜುಂಕ್ ಸಾಧ್ಯ್ ನಾ ತಿತ್ಲೊ ವ್ಹಡ್ ಏಕ್ ಲೊಕಾ ಜಮೊ ಹಾಂವೆಂ ದೆಖ್ಲೊ. ತಾಂತುಂ ಸರ್ವ್ ದೆಸಾಂಭಾಸಾಂಚೊ ಆನಿ ಜಾತಿಂಕಾತಿಂಚೊ ಲೋಕ್ ಆಸ್ಲೊ. ತೊ ಲೋಕ್ ಧವೆಂ ನ್ಹೆಸುನ್ ಆನಿ ಆಪ್ಲ್ಯಾ ಹಾತಾಂನಿ ಖಾಜ್ರಾತಾಳೆ ಘೆವ್ನ್ ಶಿಯಾಸಣಾ ಆನಿ ಶೆಳಿಯೇ ಸಮೊರ್ ಉಬೊ ಆಸ್ಲೊ ಆನಿ ವ್ಹಡ್ಲ್ಯಾ ತಾಳ್ಯಾನ್ ಬೊಬ್ ಮಾರ್ನ್ ಮ್ಹಣ್ತಾಲೊ: “ತಾರಣ್ ಶಿಯಾಸಣಾರ್ ಬಸ್ಲಲ್ಯಾ ಆಮ್ಚ್ಯಾ ದೆವಾ ಥಾವ್ನ್! ತಾರಣ್ ಶೆಳಿಯೇ ಥಾವ್ನ್!” ಶಿಯಾಸಣಾ ಭೊಂವ್ತಿಂ, ಮಾಲ್ಗಡ್ಯಾಂ ಆನಿ ಚಾರ್ ಜಿವಿಯಾಂ ಭೊಂವ್ತಿಂ ಉಬೆ ಆಸ್ಲಲೆ ಸಮೆಸ್ತ್ ದೇವ್‍ದೂತ್ ಶಿಯಾಸಣಾ ಸಮೊರ್ ಸಾಷ್ಟಾಂಗ್ ಸರ್ಪಡ್ಲೆ, ಆನಿ ದೆವಾಕ್ ಆರಾಧನ್ ಕರ್ನ್ ಮ್ಹಣಾಲೆ: “ವ್ಹಯ್ ತೆಂ! ಆಶೀರ್ವಾದ್ ಆನಿ ಮಹಿಮಾ, ಜಾಣ್ವಾಯ್ ಆನಿ ಉಪ್ಕಾರ್‍ಸ್ತುತಿ, ಮಾನ್, ಪದ್ವಿ ಆನಿ ಬಳ್ ಆಮ್ಚ್ಯಾ ದೆವಾಕ್ ಸಾಸ್ಣಾಚ್ಯಾ ಸಾಸ್ಣಾಕ್. ಆಮೆನ್.” ತೆದ್ವಾಂ ಮಾಲ್ಗಡ್ಯಾಂ ಮಧ್ಲ್ಯಾ ಎಕ್ಲ್ಯಾನ್ ಮ್ಹಜೇಲಾಗಿಂ ವಿಚಾರ್ಲೆಂ: “ಧವೆ ದಗ್ಲೆ ಘಾಲ್ನ್ ಆಸಾತ್ ತೆ ಕೊಣ್? ತೆ ಖಂಯ್ ಥಾವ್ನ್ ಆಯ್ಲ್ಯಾತ್?” ಹಾಂವೆಂ ಜಾಪ್ ದಿಲಿ: “ಹಾಂವ್ ನೆಣಾಂ, ಧನಿಯಾ; ತುಂ ಜಾಲ್ಯಾರ್ ಜಾಣಾಯ್.” ತವಳ್ ತಾಣೆಂ ಮ್ಹಾಕಾ ಸಾಂಗ್ಲೆಂ: “ತೊ ವ್ಹಡ್ ಆಕಾಂತ್ ಉತ್ರೊನ್ ಆಯ್ಲಲೆ ಮ್ಹಳ್ಯಾರ್ ಹೆಚ್ ತೆ. ತಾಂಣಿಂ ಆಪ್ಲೆ ಧಗ್ಲೆ ಶೆಳಿಯೆಚ್ಯಾ ರಗ್ತಾಂತ್ ಧುಲ್ಯಾತ್ ಆನಿ ಧವೆ ಕೆಲ್ಯಾತ್.
Show more
21 October
ನವೆಂಬರ್ 01- ಸಗ್ಳೆ ಸಾಂತ್-ಭಕ್ತಾಂಚೊ ದಿವಸ್ - ಕೀರ್ತನ್ 24
ಶ್ಲೋಕ್: ಅಸಲಿಂ ಮನ್ಶಾಂ ತುಜೆಂ ದರ್ಶನ್ ಪಳೆಂವ್ಕ್ ಆಶೆತಾತ್, ಸರ್ವೆಸ್ಪರಾ. 1. ಪೃಥ್ವಿ ಆನಿ ತಾಂತ್ಲಿ ಗ್ರೇಸ್ತ್‍ಕಾಯ್ ಸಗ್ಳಿ ಸರ್ವೆಸ್ಪರಾಚಿ, ಸಂಸಾರ್ ಆನಿ ತಾಂತ್ಲೆ ನಿವಾಸಿಯಿ ತಾಚೆಚ್! ತಾಣೆಂಚ್ ಪೃಥ್ವಿ ದರ್ಯಾಂ ವಯ್ರ್ ಸ್ಥಾಪಿತ್ ಕೆಲ್ಯಾ, ಆನಿ ಉದ್ಕಾ ರಾಶಿಚೆರ್ ತಿಕಾ ಥಿರ್ ಕರ್ನ್ ದವರ್ಲ್ಯಾ. 2. ಸರ್ವೆಸ್ಪರಾಚ್ಯಾ ದೊಂಗ್ರಾರ್ ಕೊಣಾಕ್ ಚಡುಂಕ್ ಮೆಳತ್? ತಾಚ್ಯಾ ಪವಿತ್ರ್ ಥಳಾರ್ ಪಾಂಯ್ ದವರುಂಕ್ ಕೊಣ್ ತೊ ಯೋಗ್ಯ್? ಜೊ ನಿತಳ್ ಹಾತಾಂಚೊ ಆನಿ ನಿರ್ಮಳ್ ಅಂತಸ್ಕರ್ನಾಚೊ, ಖಂಯ್ಚ್ಯಾಯ್ ಮೂರ್ತಿಕ್ ಆಪ್ಲೆಂ ಕಾಳಿಜ್ ಉಬಾರಿನಾ, ತಸಲ್ಯಾಕ್ ಫಾವೊ! 3. ತಸಲ್ಯಾಕ್ ಸರ್ವೆಸ್ಪರಾಚೊ ಆಶೀರ್ವಾದ್ ಮೆಳ್ತಲೊ, ತಾಚ್ಯಾ ತಾರಕಾ ದೆವಾಚಿ ಕೃಪಾ ತೊ ಜೊಡ್ತಲೊ, ಅಸಲಿಂ ಮನ್ಶಾಂ ತಾಚೆಂ ದರ್ಶನ್ ಪಳೆಂವ್ಕ್ ಆಶೆತಾತ್: ತುಜೆಂ ಮುಖಮಳ್ ಪಳೆಂವ್ಕ್ ಅತ್ರೆಗ್ತಾತ್ ತಿಂ ಹಿಂಚ್, ಜಾಕೊಬಾಚ್ಯಾ ದೆವಾ.
Show more
21 October
ನವೆಂಬರ್ 01- ಸಗ್ಳೆ ಸಾಂತ್-ಭಕ್ತಾಂಚೊ ದಿವಸ್ - ದುಸ್ರೆಂ ವಾಚಪ್
1 ಜು. 3: 1-3 ಪಳೆಯಾ, ಕಿತ್ಲೊ ಮೋಗ್ ಬಾಪಾನ್ ಆಮ್ಚೇರ್ ವೊತ್ಲಾ! ಆಮ್ಕಾಂ ದೆವಾಚಿಂ ಭುರ್ಗಿಂ ಮ್ಹಣ್ ಆಪೊಂವ್ಕ್ ತಾಣೆಂ ಫಾವೊ ಕೆಲಾಂ; ನಿಜಾಕ್‍ಯೀ ಆಮಿ ದೆವಾಚಿಂ ಭುರ್ಗಿಂ. ಸಂಸಾರ್ ಆಮ್ಕಾಂ ಒಳ್ಕ್ಕಾನಾ, ಕಿತ್ಯಾಕ್ ದೆವಾಕ್‍ಯೀ ತೊ ಒಳ್ಕುಂಕ್ ನಾ. ಮೊಗಾಚ್ಯಾಂನೋ, ಆತಾಂ ಆಮಿ ದೆವಾಚಿಂ ಭುರ್ಗಿಂ. ಫುಡೆಂ ಆಮಿ ಕಿತೆಂ ಜಾತಲ್ಯಾಂವ್ ತೆಂ ಆಮ್ಕಾಂ ಎದೊಳ್ ಪರ್ಯಾನ್ ಉಗ್ಡಾಪೆಂ ಜಾಂವ್ಕ್ ನಾ. ಪುಣ್ ತೆಂ ಉಗ್ಡಾಪೆಂ ಜಾತಾನಾ ದೆವಾಕ್ ಆಮಿ ಆಸಾ ತಸೊ ಪ್ರತ್ಯಕ್ಷ್ ದೆಖ್ತಲ್ಯಾಂವ್ ಜಾಲ್ಲ್ಯಾನ್ ಆಮಿ ತಾಚೇ ಸಾರ್ಕಿಂ ಜಾತಲ್ಯಾಂವ್ ಮ್ಹಣ್ ಜಾಣಾಂವ್. ತಾಚೇ ಥಂಯ್ ಅಶೆಂ ಭರ್ವಸ್ಲಲೊ ಹರ್ಯೆಕ್ಲೊ, ಜಸೊ ದೇವ್ ಪವಿತ್ರ್ ತಸೊ ಆಪ್ಣಾಕ್‍ಯೀ ಪವಿತ್ರ್ ಕರ್ತಾ.
Show more
21 October
ನವೆಂಬರ್ 01- ಸಗ್ಳೆ ಸಾಂತ್-ಭಕ್ತಾಂಚೊ ದಿವಸ್ - ಸುವಾರ್ತಾ
ಮಾತೆವ್ 5: 1-12 ಲೊಕಾಚೊ ಜಮೊ ಪಳೆವ್ನ್ ಜೆಜು ದೊಂಗ್ರಾರ್ ಚಡ್ಲೊ. ಥಂಯ್ ತೊ ಬಸೊನ್ ಆಸ್ತಾಂ ತಾಚೆ ಶಿಸ್ ತಾಚೇ ಸರ್ಶಿಂ ಆಯ್ಲೆ. ತವಳ್ ತಾಂಚೇಲಾಗಿಂ ಉಲೊವ್ನ್ ಹೇ ಪರಿಂ ತೊ ಶಿಕೊಂವ್ಕ್ ಲಾಗ್ಲೊ. “ಆಪುಣ್ ದುರ್ಬಳಿಂ ಮ್ಹಣ್ ಜಾಣಾ ಆಸಾತ್ ತಿಂ ಕಿತ್ಲಿಂ ಭಾಗಿ! ಸರ್ಗಿಂಚೆಂ ರಾಜ್ಯ್ ತಾಂಚೆಂ. ರುದನ್ ಕರ್ತಾತ್ ತಿಂ ಕಿತ್ಲಿಂ ಭಾಗಿ! ದೇವ್ ತಾಂಕಾಂ ಭುಜಯ್ತಲೊ. ಸಾಧಿಂಭೊಳಿಂ ಕಿತ್ಲಿಂ ಭಾಗಿ! ಪೃಥ್ವಿ ಜಾತಲಿ ತಾಂಚೆಂ ದಾಯ್ಜ್. ದೆವಾಚಿ ಖುಶಿ ಕರುಂಕ್ ಭುಕೆತಾತ್ ಆನಿ ತಾನೆತಾತ್ ತಿಂ ಕಿತ್ಲಿಂ ಭಾಗಿ! ತಿಂ ಧಾದೊಶಿ ಜಾತಲಿಂ ದಯಾ ದಾಖಯ್ತಾತ್ ತಿಂ ಕಿತ್ಲಿಂ ಭಾಗಿ! ತಾಂಕಾಂ ದಯಾ ಮೆಳ್ತಲಿ. ನಿತಳ್ ಮನಾಚಿಂ ಕಿತ್ಲಿಂ ಭಾಗಿ! ದೇವ್ ತಾಂಕಾಂ ಪಳೆಂವ್ಕ್ ಮೆಳ್ತಲೊ. ಸಮಾಧಾನ್ ಹಾಡುಂಕ್ ವಾವುರ್ತಾತ್ ತಿಂ ಕಿತ್ಲಿಂ ಭಾಗಿ! ತಾಂಕಾಂ ದೆವಾಚಿಂ ಭುರ್ಗಿಂ ಮ್ಹಣ್ತಲೆ. ನಿತಿ ಪಾಸತ್ ದಗ್ದಣಿ ಭೊಗ್ತಾತ್ ತಿಂ ಕಿತ್ಲಿಂ ಭಾಗಿ! ಸರ್ಗಿಂಚೆಂ ರಾಜ್ಯ್ ತಾಂಚೆಂ. ಮ್ಹಜೇ ಪಾಸತ್ ತುಮ್ಕಾಂ ಅಕ್ಮಾನ್ ಸೊಸುಂಕ್, ದಗ್ಧಣಿ ಭೊಗುಂಕ್ ಆನಿ ಸರ್ವ್ ಥರಾಂಚಿಂ ಘಡ್ಪಾಂ ಕರ್ನ್ ತುಮ್ಚೆರ್ ಆಡ್ ಉಲಯ್ತಾತ್ ತೆಂ ಆಯ್ಕುಂಕ್ ಮೆಳತ್ ಜಾಲ್ಯಾರ್ ತುಮಿ ಕಿತ್ಲಿಂ ಭಾಗಿ! ಸಂತೊಸ್ ಆನಿ ಉಲ್ಲಾಸ್ ಪಾವಾ; ಕಿತ್ಯಾಕ್ ಸರ್ಗಾರಾಜ್ಯಾಂತ್ ಯಥೇಷ್ಟ್ ಪ್ರತಿಫಳ್ ತುಮ್ಕಾಂ ತಯಾರ್ ಆಸಾ. ತುಮ್ಚೇ ಆದಿಂ ಆಸ್‍ಲ್ಲ್ಯಾ ಪ್ರವಾದ್ಯಾಂಕ್‍ಯೀ ತಾಂಣಿಂ ತಶೆಂಚ್ ದಗ್ಧಿಲ್ಯಾತ್
Show more
21 October
ಅಕ್ತೊಬರ್ 26 - ಸಾದ್ಯಾ ಕಾಳಾಚ್ಯಾ 30ವ್ಯಾ ಹಫ್ತ್ಯಾಚೊ ಆಯ್ತಾರ್ - ಪಯ್ಲೆಂ ವಾಚಪ್
ಸಿರಾ. 35:12-14, 16-19 ಸರ್ವೆಸ್ಪರ್ ನಿತಿದಾರ್, ಆನಿ ತೊ ಪಕ್ಷಪಾತ್ ಕರಿನಾ. ದುಬ್ಳ್ಯಾಂ ವಿರೋಧ್ ತೊ ಕೊಣಾಯ್ಚೊ ಪಕ್ಷ್ ಘೆನಾ, ಅನ್ಯಾಯ್ ಜಾಲ್ಲ್ಯಾ ಮನ್ಶಾಚೆಂ ಮಾಗ್ಣೆಂ ತೊ ಆಯ್ಕತಾ. ಅನಾಥಾಚೆ ವಿನವ್ಣೆಚೊ ತೊ ತಿರಸ್ಕಾರ್ ಕರಿನಾ, ವಿಧ್ವಿಚ್ಯಾ ವಿಳಾಪಾಚಿ ಬೆಪರ್ವಾ ಕರಿನಾ. ಸಗ್ಳ್ಯಾ ಕಾಳ್ಜಾನ್ ದೆವಾಚಿ ಸೆವಾ ಕರ್ತಾ ತೊ ತಾಕಾ ಮಾನ್ವತಲೊ, ತಾಚಿಂ ಮಾಗ್ಣಿಂ ಕುಪಾಂಶಿಂ ಪಾವ್ತಲಿ. ಖಾಲ್ತ್ಯಾ ಮನ್ಶಾಚೆಂ ಪ್ರಾರ್ಥನ್ ಕುಪಾಂಕ್ ತೊಪ್ತಾ, ತೆಂ ಆಪ್ಲ್ಯಾ ಶೆವಟಾಕ್ ಪಾವಸರ್ ವಿಶೆವ್ ಘೆಂವ್ಚೆಂ ನಾ. ಮಹೋನ್ನತಾನ್ ಜಾಪ್ ದಿಸರ್, ಆನಿ ಪ್ರಾಮಾಣಿಕ್ ಮನ್ಶಾಕ್ ನೀತ್ ಕರುನ್ ದಿವ್ನ್ ಆಪ್ಲೊ ನಿರ್ಣಯ್ ಉಚಾರಿಸರ್ ತೆಂ ಒಗೆಂ ರಾಂವ್ಚೆಂ ನಾ. ಆನಿ ಸರ್ವೆಸ್ಪರ್ ಘಳಾಯ್ ಕರ್ಚೊ ನಾ.
Show more
21 October
ಅಕ್ತೊಬರ್ 26 - ಸಾದ್ಯಾ ಕಾಳಾಚ್ಯಾ 30ವ್ಯಾ ಹಫ್ತ್ಯಾಚೊ ಆಯ್ತಾರ್ – ಕೀರ್ತನ್
ಕೀರ್ತನ್ - 33 ಶ್ಲೋಕ್: ಕಷ್ಟಾತಲ್ಯಾನ್ ವ್ಹಡ್ಲ್ಯಾನ್ ಉಲೊ ಮಾರ್ಲೊ,- ಆನಿ ಸರ್ವೆಸ್ಪರಾನ್ ತಾಕಾ ಜಾಪ್ ದಿಲಿ. 1. ಸರ್ವೆಸ್ಪರಾಕ್ ಹಾಂವ್ ಸದಾಂಚ್ ಧಿನ್ವಾಸ್ತಲೊಂ, ತಾಚಿ ವಾಖಾಣ್-ಸ್ತುತಿ ಖಳನಾಸ್ತಾಂ ಮ್ಹಜ್ಯಾ ಓಂಠಾಂಚೆರ್ ಆಸ್ತಲಿ, ಸರ್ವೆಸ್ಪರಾ ವರ್ವಿಂ ಮ್ಹಜ್ಯಾ ಅತ್ಮ್ಯಕ್ ವ್ಹಡ್ವಿಕ್ ಮೆಳ್ತಾ, ಹೆಂ ಆಯ್ಕುನ್ ದುಬ್ಳ್ಯಾ-ಧಾಕ್ಟ್ಯಾಂಕ್ ಸಂತೊಸ್ ಜಾಂವ್. 2. ಸರ್ವೆಸ್ಪರ್ ಖೊಟ್ಯಾ ಮನ್ಶಾಂಕ್ ಪಾಟ್ ಕರ್ತಾ, ಸಂಸಾರಾಂತ್ ತಾಂಚೊ ಉಗ್ಡಾಸ್‍ಚ್ ಆಳ್ವುನ್ ಸೊಡ್ತಾ, ನಿತಿವಂತಾಂಚೆ ಬೊಬೆಕ್ ಸರ್ವೆಸ್ಪರ್ ಕಾನ್ ದಿತಾ, ಆನಿ ತಾಂಕಾಂ ಸರ್ವಯ್ ಕಷ್ಟಾಂ-ಅನ್ವಾರಾಂತ್ಲಿ ನಿವಾರ್ತಾ. 3. ಖಂತಿ-ದುಖಿನ್ ಭಾರ್ವತಲ್ಯಾಂಕ್ ಸೊಮಿ ಲಾಗಿಂಚ್ ಆಸಾ, ಭರ್ವಸೊ ಖಂಡ್ಲಲ್ಯಾಂಕ್ ಹಾತ್ ದೀವ್ನ್ ತೊ ಲಾಗಿಂಚ್ ಆಸಾ ಆಪ್ಲ್ಯಾ ಸೆವಕಾಂಚೊ ಜೀವ್ ಸರ್ವೆಸ್ಪರ್ ರಾಖ್ತಾ, ತಾಚ್ಯಾ ಗೊಪಾಂತ್ ಆಸ್ರೊ ಸೊದ್ಲಲ್ಯಾಂಕ್ ತೊ ಕೆದಿಂಚ್ ಶಿಕ್ಷಾ ಲಾಂವ್ಚೊ ನಾ.
Show more
21 October
ಅಕ್ತೊಬರ್ 26 - ಸಾದ್ಯಾ ಕಾಳಾಚ್ಯಾ 30ವ್ಯಾ ಹಫ್ತ್ಯಾಚೊ ಆಯ್ತಾರ್ – ದುಸ್ರೆಂ ವಾಚಪ್
2 ತಿಮೊಥಿ 4:6-8, 16-18 ಭೊವ್ ಮೊಗಾಚ್ಯಾ ಪುತಾ, ಹಾಂವ್ ಆತಾಂ, ಮ್ಹಾಕಾ ಬಲಿ ಕಸೊ ಭೆಟೊಂವ್ಚೇ ಸ್ಥಿತೆರ್ ಪಾವ್ಲಾಂ. ಹಾಂವೆಂ ವೆಚೊ ವೇಳ್ ಲಾಗಿಂ ಪಾವ್ಲಾ. ಮ್ಹಜೆಂ ಝುಜ್ ಹಾಂವ್ ಬರೆಂ ಝುಜ್ಲಾಂ. ಶೆವಟ್ ಪರ್ಯಾನ್ ಮ್ಹಜಿ ಧಾಂವ್ ಹಾಂವ್ ಧಾಂವ್ಲಾಂ, ಮ್ಹಜೊ ಭಾವಾರ್ಥ್ ಹಾಂವೆಂ ಸಾಂಬಾಳ್ಳಾ. ಆತಾಂ ನಿತಿವಂತ್ಪಣಾಚೊ ಮುಕುಟ್ ಮ್ಹಾಕಾ ತಯಾರ್ ದವರ್ಲಲೊ ಆಸಾ. ಹೊ ಮುಕುಟ್ ನಿತಿಚೊ ಮುನ್ಸುಬಿದಾರ್ ಮ್ಹಣ್ತಾತ್ ತೊ ಸೊಮಿ ತ್ಯಾ ನಿಮಾಣ್ಯಾ ದಿಸಾ ಮ್ಹಾಕಾ ದಿತಲೊ. ಮ್ಹಾಕಾ ಮಾತ್ರ್ ನ್ಹಯ್, ತಾಚ್ಯಾ ಯೆಣ್ಯಾಕ್ ಅತ್ರೆಗುನ್ ಆಸ್ಲಲ್ಯಾ ಸಮೆಸ್ತಾಂಕ್‍ಯಿ ತೊ ದಿತಲೊ. ಮ್ಹಾಕಾ ಪಯ್ಲೆ ಪಾವ್ಟಿಂ ತನ್ಕೆಕ್ ಉಬೊ ಕೆಲ್ಲ್ಯಾ ವೆಳಾರ್ ಕೊಣ್‍ಚ್ ಮ್ಹಜೆ ಪಕ್ಷೇಕ್ ರಾವ್ಲೊನಾ; ಸಕ್ಟಾಂನಿಯಿ ಮ್ಹಾಕಾ ಸಾಂಡುನ್ ಘಾಲೊ. ಹಾಚೆ ಖಾತಿರ್ ದೇವ್ ತಾಂಕಾಂ ಗುನ್ಯಾಂವ್ಕಾರ್ ಕರಿನಾ ಜಾಂವ್! ಪುಣ್ ಸೊಮಿ ಮ್ಹಜೇ ಬಗ್ಲೆನ್‍ಚ್ ರಾವ್ಲೊ ಆನಿ ತಾಣೆಂಚ್ ಮ್ಹಾಕಾ ಘಟಾಯ್ ದಿಲಿ. ದೆಕುನ್ ಹೆರ್ ಜಾತಿಂಚ್ಯಾಂನಿ ಕಾನ್ ದಿಶೆಂ ಮ್ಹಜೆ ಮಾರಿಫಾತ್ ಸುವಾರ್ತಾ ಸಂಪೂಣ್ ಥರಾನ್ ಪರ್ಗಟ್ ಜಾಲಿ. ಅಶೆಂ ಸಿಂಹಾಚ್ಯಾ ಘಾಸಾಂತ್ಲೊ ಹಾಂವ್ ಬಚಾವ್ ಜಾಲೊಂ. ಸರ್ವ್ ವಾಯ್ಟಾಂತ್ಲೊ ಆನಿಕ್‍ಯಿ ಸೊಮಿ ಮ್ಹಾಕಾ ನಿವಾರ್ತಲೊ ಆನಿ ಆಪ್ಲ್ಯಾ ಸರ್ಗಿಂಚ್ಯಾ ರಾಜ್ಯಾಂತ್ ಶಾಬಿತ್ ವ್ಹರ್ನ್ ಪಾಯ್ತಲೊ. ತಾಕಾ ಸಾಸ್ಣಾಚ್ಯಾ ಸಾಸ್ಣಾಕ್ ಮಹಿಮಾ ಜಾಂವ್, ಆಮೆನ್.
Show more
13 September
ಅಕ್ತೊಬರ್ 26 - ಸಾದ್ಯಾ ಕಾಳಾಚ್ಯಾ 30ವ್ಯಾ ಹಫ್ತ್ಯಾಚೊ ಆಯ್ತಾರ್ - ಸುವಾರ್ತಾ
ಲೂಕ್ 18: 9-14 ಆಪುಣ್ ನಿತಿವಂತ್ ಮ್ಹಣ್ ಚಿಂತುನ್, ಆಪ್ಣಾಚೆರ್‍ಚ್ ಪಾತ್ಯೆವ್ನ್ ಆಸ್ಲಲ್ಯಾ ಆನಿ ಹೆರಾಂಚಿ ಬೆಪರ್ವಾ ಕರ್ತಲ್ಯಾ ಥೊಡ್ಯಾಂಕ್ ಜೆಜುನ್ ಹಿ ಒಪಾರ್ ಸಾಂಗ್ಲಿ: “ಏಕ್ ಪಾವ್ಟಿ ದೋಗ್ ಜಣ್ ಮಾಗ್ಣೆಂ ಕರುಂಕ್ ಮ್ಹಣ್ ವಯ್ರ್ ದೆವಾಳಾಕ್ ಗೆಲೆ. ತಾಂಚೆ ಮಧ್ಲೊ ಎಕ್ಲೊ ಫಾರಿಜೆವ್, ಆನ್ಯೆಕ್ಲೊ ಸುಂಕಾಗಾರ್. ಫಾರಿಜೆವ್ ನೀಟ್ ಉಬೊ ರಾವುನ್ ಆಪ್ಣಾ ಇತ್ಲ್ಯಾಕ್ ಅಶೆಂ ಮಾಗ್ಣೆಂ ಕರಿಲಾಗ್ಲೊ: ‘ದೆವಾ, ಹಾಂವ್ ಹೆರ್ ಮನ್ಶಾಂಬರಿ ಲುಟ್ಕಾರ್, ಅನ್ನ್ಯಾಯ್‍ಗಾರ್, ಪ್ರದ್ವಾರಿ ನ್ಹಯ್, ದೆಕುನ್ ಹಾಂವ್ ತುಕಾ ಅರ್ಗಾಂ ದಿತಾಂ. ಹಪ್ತ್ಯಾಂತ್ ದೋನ್ ಪಾವ್ಟಿಂ ಹಾಂವ್ ಉಪಾಸ್ ಕರ್ತಾಂ ಆನಿ ಸಗ್ಳ್ಯಾ ಮ್ಹಜ್ಯಾ ಆದಾಯಾಂತ್ಲೊ ಧಾಂತ್ ಏಕ್ ವಾಂಟೊ ಫಾರಿಕ್ ಕರ್ತಾಂ.’ ಪುಣ್ ತೊ ಸುಂಕಾಗಾರ್ ಪಯ್ಸ್ ರಾವುನ್, ಆಪ್ಲಿ ದೀಷ್ಟ್ ಸಯ್ತ್ ಸರ್ಗಾಕ್ ಉಬಾರುಂಕ್ ಧೈರ್ ಘೆನಾಸ್ತಾನಾ, ಫಕತ್ ಆಪ್ಲೆಂ ಹರ್ಧೆಂ ಬಡೊವ್ನ್ ಮ್ಹಣಾಲೊ: ‘ದೆವಾ, ಮ್ಹಜಿ ಪಾತ್ಕ್ಯಾಚಿ ಕಾಕುಳ್ತ್ ಕರ್!’ ಹಾಂವ್ ತುಮ್ಕಾಂ ಸಾಂಗ್ತಾಂ: ಹೊ ಮನಿಸ್ ದೆವಾಕ್ ಮಾನ್ವಲ್ಲೊ ಜಾವ್ನ್ ಆಪ್ಲ್ಯಾ ಘರಾ ಪಾಟಿಂ ಗೆಲೊ; ಪುಣ್ ತೊ ಅನ್ಯೆಕ್ಲೊ ತಾಕಾ ಮಾನ್ವಲೊನಾ. ಕಿತ್ಯಾಕ್ ಆಪ್ಣಾಕ್‍ಚ್ ವರ್ತೊ ಕರ್ತಾ ತಾಕಾ ದೇವ್ ಖಾಲ್ತೊ ಕರ್ತಲೊ ಆನಿ ಆಪ್ಣಾಕ್‍ಚ್ ಖಾಲ್ತೊ ಕರ್ತಾ ತಾಕಾ ದೇವ್ ವರ್ತೊ ಕರ್ತಲೊ.”
Show more
